கரோனா வைரசின் தாக்கம் நாளுக்கு நாள் தீவிரமடைந்துவருகிறது. குறிப்பாக, மகாராஷ்டிரா, தமிழ்நாடு, டெல்லி ஆகிய மாநிலங்கள் கரோனாவின் கோர தாண்டவத்தில் சிக்கித்தவித்துவருகின்றன. பெருந்தொற்றுக்கான மருந்தைக் கண்டுபிடிக்க முடியாமல் உலகிலுள்ள மருத்துவ ஆராய்ச்சியாளர்கள் திணறிவருகின்றனர்.
இருப்பினும், நோயாளிகளைக் குணப்படுத்த பிளாஸ்மா சிகிச்சை முறை அளிக்கப்பட்டுவருகிறது. குணமடைந்த நோயாளிகளின் ரத்தத்திலிருந்து கரோனா ஆன்டிபாடிகளை பிரித்து எடுத்து அவற்றை நோயாளிகளின் உடலில் செலுத்துவதே பிளாஸ்மா தெரபி என அழைக்கப்படுகிறது. இதனிடையே, இந்தியாவின் முதல் பிளாஸ்மா வங்கி டெல்லியில் அமைக்கப்பட்டது.
இந்நிலையில், பிளாஸ்மா தானத்தை மேற்கொள்ளும்படி குணமடைந்த நோயாளிகளிடம் மருத்துவமனை ஆலோசனை வழங்க வேண்டும் என கெஜ்ரிவால் தெரிவித்துள்ளார். இதுகுறித்து மேலும் அவர் கூறுகையில், "தானம் செய்ய முன்வருபவர்கள் 1031 என்ற எண்ணைத் தொடர்புகொள்ளலாம் அல்லது 88000 07722 என்ற எண்ணுக்கு வாட்ஸ்அப் செய்யலாம்.
18 முதல் 60 வயதானவர்கள் 50 கிலோ எடைக்கு மேல் இருந்தால் தானம் செய்யலாம். புற்றுநோயாளிகள், கர்ப்பிணி, உயர் ரத்த அழுத்தம் உடையவர்கள், சிறுநீரகம், இதயம், நுரையீரல் போன்றவற்றில் பிரச்னை உடையவர்கள் தானத்தை மேற்கொள்ளக் கூடாது" என்றார்.
கரோனாவிலிருந்து குணமடைந்த டெல்லி சுகாதாரத் துறை அமைச்சர் சத்யேந்திர ஜெயின், ஆம் ஆத்மி எம்எல்ஏ அதிஷி மர்லேனா ஆகியோர் பிளாஸ்மாவை தானம் செய்ய முன்வந்துள்ளார்கள்.
இதையும் படிங்க: நேரு மீது மீண்டும் பழிபோடும் பாஜக
