அயோத்தி ராமர் கோயில் அமைப்பது தொடர்பான தற்காலிக பணிகளை ஸ்ரீ ராம ஜென்ம பூமி தீர்த்த க்ஷேத்ரா அறக்கட்டளை முன்னெடுத்துள்ளது.
இந்தப் பணிகளில் 2 ஜேசிபி இயந்திரங்கள் உள்பட 40 தொழிலாளர்கள் ஈடுபட்டுள்ளனர். பணிகள் 23 நாட்களுக்குள் நிறைவடையும் என்றும் தெரிவிக்கப்பட்டுள்ளது. அயோத்தி ராமர் கோயிலுக்கு பக்தர்கள் வருகை அதிகரித்துள்ளது.
இதனால் அப்பகுதியில் பலத்த பாதுகாப்பு ஏற்பாடுகள் செய்யப்பட்டுள்ளன. இதுபற்றி விசுவ இந்து பரிஷத் செய்தித் தொடர்பாளர் சரத் சர்மா கூறுகையில், “மக்கள் வழிபாட்டு தலத்தில் எவ்வித இடையூறும் ஏற்படாது என்பதை உறுதி செய்ய இந்த தற்காலிக கட்டுமானப் பணிகள் நடக்கின்றன.
அதன் பின்னர் பிரதான கோயில் கட்டுமானம் தொடங்கும். அரசாங்கம் உச்சக்கட்ட பாதுகாப்பு வழங்கியுள்ளதை வரவேற்கிறோம். ராமர் கோயில் கட்டுமானம் விரைவில் தொடங்கும்” என்றார்.
அயோத்தி ராமர் கோயில் விவகாரத்தில் இரு தரப்புக்கு இடையே நூற்றாண்டு காலமாக நடந்த நிலப்பிரச்னையில் கடந்தாண்டு நவம்பர் 9ஆம் தேதி உச்ச நீதிமன்றம் தீர்ப்பை வழங்கியது.
அந்த தீர்ப்பில் ராமர் கோயில் கட்டிக்கொள்ள அனுமதி வழங்கியதுடன், எதிர் தரப்புக்கு மசூதி கட்டிக்கொள்ள ஐந்து ஏக்கர் நிலம் வழங்க உத்தரவிட்டது.
இதையும் படிங்க: 'இலங்கை-தமிழ்நாடு கப்பல் போக்குவரத்து விரைவில் தொடக்கம்' - மனுசுக் மாண்டேவியா
