நித்தியானந்தாவிடமிருந்து குழந்தைகளைக் காப்பாற்றி தாருங்கள் - கதறும் பெற்றோர்!

காந்திநகர்: நித்தியானந்தா ஆசிரமத்தில் உள்ள தங்களின் பெண் குழந்தைகளைக் காப்பாற்றி தருமாறு குஜராத் உயர் நீதிமன்றத்தில் பெற்றோர் மனுதாக்கல் செய்துள்ளனர்.

பல பெண் குழந்தைகளை நித்தியானந்தா தனது ஆசிரமத்தில் சட்டவிரோதமாக வைத்திருப்பதாக குற்றச்சாட்டு எழுப்பப்பட்டுவருகிறது. இந்நிலையில், குஜராத் உயர் நீதிமன்றத்தில், ஜனார்த்தனா சர்மா என்பவரும் அவரின் மனைவியும் தங்களின் குழந்தைகளை மீட்டு தருமாறு மனு தாக்கல் செய்துள்ளனர்.

இதுகுறித்து மனுவில், "7 - 15 வயதுடைய எனது நான்கு பெண் குழந்தைகளை 2013 ஆம் ஆண்டு நித்தியானந்த நிறுவிய கல்வி நிலையத்தில் சேர்த்தேன். தற்போது அவர்கள் அகமதாபாத்தில் உள்ள நித்தியானந்தாவின் மற்றொரு ஆசிரமத்திற்கு மாற்றப்பட்டுள்ளனர். அவர்களை சந்திக்க முயற்சித்தோம். குழந்தைகளை சந்திக்க கல்வி நிலையத்தின் அலுவலர்கள் மறுப்பு தெரிவித்தனர்" என குறிப்பிடப்பட்டுள்ளது.

காவல்துறையின் உதவியோடு இரு பெண் குழந்தைகளை சந்தித்துவிட்டதாகவும், ஆனால், லோபமுத்ரா, நந்திதா ஆகியோர் தங்களை சந்திக்க வரவில்லை எனவும் பெற்றொர் தெரிவித்துள்ளனர்.

தங்களின் பெண் குழந்தைகளை கடத்தி தூக்கமின்றி இரு வாரங்களாக வைத்துள்ளதாகவும் பெற்றோர் குற்றஞ்சாட்டியுள்ளனர். இதுகுறித்த முதல் தகவல் அறிக்கையை பதிவு செய்துவிட்டதாக பெற்றோர் கூறியுள்ளனர்.

இதையும் படிங்க: சபரிமலை கோயிலுக்குச் சென்ற சிறுமி தடுத்து நிறுத்தம்!