ஸ்ரீநகர்: பனி படர்ந்த ஜம்மு காஷ்மீரில் அமைந்துள்ளது, தால் ஏரி. இயற்கை எழில் கொஞ்சும் காஷ்மீரில் இருக்கும் இரண்டாவது மிகப்பெரிய ஏரி. இந்தப் பகுதியில் வசிப்போருக்கு மருத்துவ வசதி கிடைப்பதில் எப்போதும் சிக்கல் இருந்துள்ளது. ஒருவருக்கு உடல்நலக் குறைவு ஏற்பட்டால் படகில் அமர்த்தி ஏரியைக் கடந்துதான் மருத்துவமனைக்குச் செல்ல வேண்டும்.
நெடுங்காலமாக இருந்த இச்சிக்கலை நீக்க முடிவு செய்தார், அப்பகுதியில் வசிக்கும் சமூக செய்ற்பாட்டாளர் அகமது பட்லு. அவரது யோசனைதான் ’மிதக்கும் ஆம்புலன்ஸ்’.
அதென்ன மிதக்கும் ஆம்புலன்ஸ்?
இந்தப் பகுதியில் ஏற்கனவே உலகப் புகழ்பெற்ற மிதக்கும் சந்தை (Floating Market) அமைந்துள்ளது. அகமது அதைப் போலவே மிதக்கும் படகு ஆம்புலன்ஸ் சேவையை ஏற்பாடு செய்துவருகிறார். அதாவது ஏரிக்குள் படகு போன்ற அமைப்பிலான ’ஆம்புலன்ஸ் சேவை’.
”எனக்கு கரோனா பாதிப்பு உறுதியான சமயத்தில் என் அருகில் வருவதற்கே அனைவரும் பயந்தார்கள். இங்கிருந்து மருத்துவமனைக்கு சென்றுவருவதும் சிரமம். எந்த படகு உரிமையாளர்தான் கரோனா தொற்று இருப்பவர்களை தன் படகில் ஏற்றுவார். அப்போதுதான் இந்தப் பகுதிக்கு ஆம்புலன்ஸ் தேவை என்ற யோசனை வந்தது”என்கிறார், அகமது.
பொருளாதார உதவி
பார்ப்பதற்கு சிறிய படகு போல இருக்கும் இந்த மிதக்கும் ஆம்புலன்ஸ், மோட்டார் பொருத்தி முதற்கட்ட சோதனை செய்ய தயாராகிவருகிறது. இந்த ஆம்புலன்ஸில் பணியாற்ற மருத்துவ ஊழியர்களை ஏற்பாடு செய்ய அகமது மும்முரமாகியுள்ளார்.
அகமது இந்தத் திட்டத்திற்கு தன்னால் முடிந்தளவு முதலீடு செய்திருந்தாலும், பொருளாதார ரீதியாக டெல்லியைச் சேர்ந்த 'சத்ய ரேகா' என்ற தன்னார்வ தொண்டு நிறுவனமும் உதவி வருகிறது.
ஆதரவுக் கரம் நீட்டுமா அரசு?
ஆம்புலன்ஸின் பாராமரிப்பை தான் பார்த்துக்கொள்வதாகத் தெரிவிக்கும் அகமது, மருத்துவ உபகரணங்கள், மருத்துவ ஊழியர்களின் தேவைகளை உறுதி செய்ய அரசு உதவ வேண்டும் என கோரிக்கை விடுக்கிறார். பொதுமக்களின் அடிப்படைத் தேவைகளை நிறைவேற்றுவது அரசின் கடமைதானே!
இதையும் படிங்க: வெள்ளத்தால் உருவான தீவு: இன்னல்களுக்கு மத்தியில் விவசாயம் செய்யும் தண்பாரா விவசாயிகள்
