பெங்களூரு : கர்நாடக மாநிலத்தின் 23ஆவது முதலமைச்சராக பாஜக மூத்தத் தலைவரும், மாநிலத்தின் உள்துறை அமைச்சராக பொறுப்பு வகித்தவருமான பசவராஜ் சோமப்பா பொம்மை இன்று பதவியேற்றுக்கொண்டார். அவருக்கு ஆளுநர் தாவர் சந்த் கெலாட் (Thawar Chand Gehlot) பதவி பிரமாணம் மற்றும் இரகசிய காப்பு பிரமாணம் செய்து வைத்தார்.
பி.எஸ். எடியூரப்பாவின் ராஜினாமாவை தொடர்ந்து பசவராஜ் முதலமைச்சராக பொறுப்பேற்றுள்ளார். அரசியலில் நீண்ட பாரம்பரியம் கொண்ட பசவராஜ், முன்னாள் முதலமைச்சர் எஸ்ஆர் பொம்மையின் மகன் ஆவார்.
இவர் ஏற்கனவே ஒருங்கிணைந்த ஜனதா தளத்தின் தலைவராக பொறுப்பு வகித்துள்ளார். 1960ஆம் ஆண்டு ஜனவரி 28ஆம் தேதி பிறந்த பசவராஜ், சாதரா லிங்காயத் சமூகத்தைச் சேர்ந்தவர் ஆவார்.
இவருக்கு முன்னதாக முதலமைச்சராக பொறுப்பு வகித்த பி.எஸ். எடியூரப்பாவும் அதே சமூகத்தைச் சேர்ந்தவர் ஆவார். இந்தச் சமூகத்தினர் மாநிலத்தில் 17 விழுக்காடு உள்ளனர்.
பசவராஜ் ஏற்கனவே நீர்பாசனம், சட்டம், நாடாளுமன்ற விவகாரங்கள் அமைச்சர் என பல்வேறு பொறுப்புகள் வகித்துள்ளார். இவர் 2008-2013ஆம் ஆண்டு நீர்பாசன அமைச்சராக இருந்தபோது பல்வேறு திட்டங்கள் மாநிலத்தில் முன்னெடுக்கப்பட்டுள்ளன.
இதையும் படிங்க : ‘பஜ்ரங்தளத்தை தடை செய்யும் பேச்சுக்கே இடமில்லை’ - பசவராஜ் பொம்மை திட்டவட்டம்
