சென்னை: தமிழ்நாடு அரசில் கிராம நிர்வாக அலுவலர், இளநிலை உதவியாளர், தட்டச்சர், சுருக்கெழுத்து தட்டச்சர், தனி உதவியாளர், கிளார்க், தனிச் செயலாளர், இளநிலை நிர்வாகி, வரவேற்பாளர், பால் பதிவாளர், ஆய்வக உதவியாளர், பில் கலெக்டர், தொழிற்சாலை மூத்த உதவியாளர், வன பாதுகாவலர், காவலர், இளநிலை ஆய்வாளர் உள்ளிட்ட பல்வேறு பிரிவுகளில் உள்ள 6,244 காலிப் பணியிடங்களுக்கான குரூப் 4 எழுத்து தேர்வு இன்று நடைபெற்றது.
முன்னதாக, இதற்கான அறிவிப்பை கடந்த ஜனவரி 30ஆம் தேதி வெளியிட்ட தமிழ்நாடு அரசுப் பணியாளர் தேர்வாணையம், பிப்ரவரி 28ஆம் தேதி வரை விண்ணப்பிக்க கால அவகாசம் வழங்கியது. இந்த தேர்வு எழுத 10ஆம் வகுப்பு தேர்ச்சி தகுதியாக இருக்கும் நிலையில், பட்டதாரிகள், முதுநிலை பட்டதாரிகள், பொறியியல் பட்டதாரிகள், எம்பில் முடித்தவர்கள் என உயர்கல்வி தகுதி பெற்றவர்களும் போட்டி போட்டு விண்ணப்பித்தனர்.
இதனையடுத்து, குரூப் 4 எழுத்துத் தேர்வு இன்று காலை 9.30 மணிக்கு தொடங்கப்பட்டு, மதியம் 12.30 மணி வரை மூன்று மணி நேரம் நடைபெற்றது. அதன் பின்னர், 15 நிமிடங்கள் மாணவர்கள் விடைத்தாளில் உள்ள விவரங்களைப் பூர்த்தி செய்ய அனுமதிக்கப்பட்டனர்.
பின்னர், 12.45 மணிக்கு தேர்வு அறையை விட்டு தேர்வர்கள் வெளியே வந்தனர். இந்த தேர்வினை எழுத 20 லட்சத்து 36 ஆயிரத்து 774 பேர் அனுமதிக்கப்பட்டனர். இதில் 20 சதவீதத்துக்கும் மேற்பட்டோர் காலை 9 மணிக்கு மேல் தேர்வு மையங்களுக்கு வந்ததால், அவர்கள் யாரும் தேர்வு எழுத அனுமதிக்கப்படவில்லை என கூறப்படுகிறது.
இந்த நிலையில், டிஎன்பிஎஸ்சி குரூப் 4' எப்படி இருந்தது? என தேர்வு எழுதிய தேர்வர்கள் சிலர் நம்மிடையே பகிர்ந்து கொண்டதாவது, "கேள்வித்தாளில் தமிழ் பாடப்பிரிவுகளில் வினாக்கள் எளிமையாக இருந்தது. பொது அறிவு மற்றும் நுண்ணறிவு திறன் பகுதிகளில் இருந்து கேட்கப்பட்ட கேள்விகளில் கணக்கு சற்று கடினமாகவும், மற்றவை சிந்தித்து விடையளிக்கும் வகையில் அமைந்திருந்தது" எனத் தெரிவித்தனர்.
இதையும் படிங்க: டிஎன்பிஎஸ்சி குரூப் 4 தேர்வு எழுதியவர்களுக்கு ஷாக்.. இதெல்லாம் செய்தால் மதிப்பெண்கள் கட்!
