சென்னை: சென்னை பெரம்பூர் பகுதியில் கடந்த மாதம் 5ம் தேதி பகுஜன் சமாஜ் கட்சி மாநில தலைவர் ஆம்ஸ்ட்ராங் வெட்டி படுகொலை செய்யப்பட்டார். இந்த வழக்கில் இதுவரை 22 பேரை போலீசார் கைது செய்துள்ளனர். மேலும், இந்த வழக்கில் சிறையில் இருக்கும் சென்னையை சேர்ந்த பிரபல ரவுடி நாகேந்திரன் பெயரும் இணைக்கப்பட்டுள்ளதாக கூறப்படுகிறது.
தொடர்ந்து அவரை கைது செய்து விசாரணை செய்ய போலீசார் திட்டமிட்டு வருகின்றனர். இந்தநிலையில், சென்னை அயனாவரம் பகுதியில் அடுக்குமாடி குடியிருப்பில் வசித்து வரும் ஆம்ஸ்ட்ராங்கின் மனைவி, குழந்தைக்கு கொலை மிரட்டல் கடிதம் ஒன்று அனுப்பப்பட்டிருந்தது.
இது குறித்து அளித்த புகாரின் பெயரில் செம்பியம் தனிப்படை போலீசார் தீவிர விசாரணை நடத்தி வந்தனர். மேலும், கொலை மிரட்டல் கடிதத்தில் சதீஷ் என்ற நபர் இந்த கடிதத்தை அனுப்பியதாக குறிப்பிட்டு இருந்தது. மேலும், கொலை மிரட்டல் கடிதம் வந்ததையடுத்து ஆம்ஸ்ட்ராங் மனைவி குழந்தை வசித்து வரும் வீட்டிற்கு பலத்த போலீஸ் பாதுகாப்பு போடப்பட்டு தீவிர கண்காணிப்பில் ஈடுபட்டு வந்தனர். இதையடுத்து சதீஷை பிடித்து தனிப்படை போலீசார் விசாரணை மேற்கொண்டபோது அவர் இந்த கடிதத்தை அனுப்பவில்லை என்பது தெரிய வந்தது.
மேலும், விசாரணையில் இந்த கடிதத்தை கடலூர் பகுதியைச் சேர்ந்த தனியார் பள்ளி தாளாளர் அருண்ராஜ் என்பவர் அனுப்பியது கண்டுபிடிக்கப்பட்டது. அதனை தொடர்ந்து போலீசார் அவரை தேடி வந்த நிலையில் அருண்ராஜ் தலைமறைவானார். இதையடுத்து இன்று அருண்ராஜை தனிப்படை போலீசார் கைது செய்து சென்னை செம்பியம் காவல் நிலையத்திற்கு அழைத்து வந்து விசாரணை நடத்தியுள்ளனர்.
விசாரணையில் எப்போதோ நடந்த ஒரு வழக்கில் அருண்ராஜுக்கு எதிராக சதீஷ் சாட்சியம் சொல்லியதால் அவரை ஆம்ஸ்ட்ராங் கொலை வழக்கில் சிக்க வைக்க இந்த கடிதம் அனுப்பியதாக வாக்குமூலம் அள்ளித்துள்ளார்.
இதையடுத்து அருண்ராஜ் மீது வழக்கு பதிவு செய்து நீதிமன்ற நடவடிக்கை எடுக்க போலீசார் ஈடுபட்டுள்ளனர்.
இதையும் படிங்க: ரத்தக்களறி செய்யும் 'அக்னி பிரதர்ஸ்'... பழிக்கு பழியாக 4வது கொலை.. போஸ்ட் போட்டு தீர்த்துக்கட்டும் ரவுடிகள்!
