"ஜனநாயகத்தின் மீது நம்பிக்கையற்றவர்கள் ஆர்எஸ்எஸ், பாஜகவினர்" - செல்வப்பெருந்தகை விளாசல்! - Rajiv gandhi death anniversary

TN Congress Committee President Selvaperunthagai: ஜனநாயகத்தின் மீது நம்பிக்கையற்றவர்கள் தான் பாஜக மற்றும் ஆர்.எஸ்.எஸ்ஸை சார்ந்தவர்கள் எனவும், இந்தியாவில் கலவரத்தை ஏற்படுத்துவதற்கும், அமைதியை சீர்குலைப்பதற்கும் அடுத்தகட்ட பிரச்சாரத்தை பயன்படுத்துவார்கள் எனவும் தமிழ்நாடு காங்கிரஸ் கமிட்டி தலைவர் செல்வப்பெருந்தகை குற்றம் சாட்டியுள்ளார்.

சென்னை: மறைந்த முன்னாள் பிரதமர் ராஜீவ் காந்தியின் நினைவு தினத்தை முன்னிட்டு, கடந்த 15ஆம் தேதி பெங்களூருவில் தொடங்கிய முன்னாள் பிரதமர் ராஜீவ் காந்தி நினைவு ஜோதி யாத்திரையானது கேரளா, புதுச்சேரி வழியாக தமிழ்நாடு முழுவதும் சுற்றுப்பயணம் செய்து, நேற்று (திங்கட்கிழமை) மாலை சென்னை வந்தடைந்தது. அதனைத் தொடர்ந்து, சென்னை அண்ணா சாலையில் அமைந்துள்ள காமராஜர் சிலைக்கு மாலை அணிவித்து மரியாதை செலுத்தி தமிழ்நாடு காங்கிரஸ் கமிட்டி தலைவர் செல்வப்பெருந்தகை வரவேற்றார்.

அதைத் தொடர்ந்து செய்தியாளர்களிடம் பேசிய செல்வப்பெருந்தகை, "தொடர்ந்து 33 ஆண்டுகளாக கர்நாடக மாநிலத்திலிருந்து ஜோதியை எடுத்து வருகிறார்கள். கர்நாடகாவில் இருந்து கடந்த 15ஆம் தேதி புறப்பட்டு கேரளா, பாண்டிச்சேரி வழியாக தமிழ்நாடு முழுவதும் சுற்றுப்பயணம் செய்து தற்போது சென்னை வந்தடைந்திருக்கிறார்கள். தொடர்ந்து, மே 21 ஸ்ரீபெரும்புதூரில் உள்ள ராஜீவ் காந்தி அவர்களின் நினைவிடத்தில் அஞ்சலி செலுத்த இருக்கிறார்கள்.

நாளைய தினம் தீவிரவாத எதிர்ப்பு உறுதி மொழியை ஏற்க இருக்கிறோம். மாநிலங்களுக்கு இடையே அணையை கட்டுவது மாநிலங்களில் உள்ள ஒருமைப்பாட்டை உறவைச் சீர்குலைக்கும். நீர் எங்கு சென்றடைகிறதோ அவர்களுக்குத்தான் சொந்தம் என்று நீர் ஆதாரத்தைக் கொடுத்து உலகமே எடுத்துரைக்கிறது. கேரளா தங்களை முழுவதுமாக தேசப்பற்றுடன் இணைத்துக் கொள்ள வேண்டும் என்பதுதான் எங்கள் கோரிக்கை. தமிழ்நாட்டிற்குக் கிடைக்க வேண்டிய உரிமைகளை அவர்கள் தரவேண்டும்.

பிரதமர் மோடி பல செய்தி நிறுவனங்களுக்கு அளித்த பேட்டி இன்னும் சமூக வலைத்தளங்களில் இருக்கிறது. இப்படி எல்லாம் நாகரீகம் இல்லாமல் பேசிவிட்டு நான் பேசவில்லை என சொல்வது பிரதமருக்கு அழகில்லை. பிரதமர் மோடி என்ன பேசி இருக்கிறார் என்று நாடு மற்றும் நாட்டு மக்கள் அறிவார்கள். வெறுப்பு அரசியல், மத அரசியல், மொழி அரசியல், சாதி அரசியல் போன்ற சகதிகளில் பிரதமர் மோடி மூழ்கி இருக்கிறார்.

பிரதமர் மோடி அரசியல் அரங்கிலிருந்து அதிகாரத்தில் இருந்து அகற்றப்படுவது உறுதி. ஜனநாயகத்தின் மீது நம்பிக்கை அற்றவர்கள் தான் பாஜக மற்றும் ஆர்எஸ்எஸ்-ஐ சார்ந்தவர்கள். கலவரத்தை ஏற்படுத்துவதற்கும், அமைதியை சீர்குலைப்பதற்கும் அடுத்த கட்ட பிரச்சாரத்தைப் பயன்படுத்துவார்கள்"‌ எனத் தெரிவித்தார்.