கோயம்புத்தூர்: தமிழ் மாநில காங்கிரஸ் கட்சியின் தலைவர் ஜி.கே.வாசன், நாடாளுமன்ற கூட்டத்தொடரில் பங்கேற்பதற்காக டெல்லி செல்கிறார். இதற்காக கோவை விமான நிலையம் வந்த அவர், செய்தியாளர்களைச் சந்தித்து நாடாளுமன்ற கூட்டத்தொடர் நாளை (பிப்.5) காலை நடக்க இருப்பதால், டெல்லி செல்வதாகவும் தெரிவித்தார்.
தொடர்ந்து பேசிய அவர், "தமிழ் மாநில காங்கிரஸ் கட்சியின் செயற்குழு கூட்டம் இந்த மாதம் 12ஆம் தேதி சென்னையில் நடைபெற உள்ளது. இந்த கூட்டத்தில் இயக்கத்தின் மூத்த தலைவர்கள், மாவட்டத் தலைவர்கள், மாநில நிர்வாகிகள், செயற்குழு உறுப்பினர்கள் கலந்து கொண்டு, வரும் நாடாளுமன்றத் தேர்தலில் இயக்கத்தின் பணிகள், தேர்தல் வியூகம், குறிப்பாக இயக்கத்தின் கூட்டணிகள் குறித்து ஆலோசனை செய்யப்படும்.
செயற்குழு கூட்டத்திற்குப் பின்பு, செயற்குழு உறுப்பினர்களின் ஆலோசனைகளின்படி நான்கைந்து நாட்களில் தேர்தல் சம்பந்தமான அறிவிப்புகள் அதிகாரப்பூர்வமாக கட்சியிலிருந்து வெளிவரும். பாஜகவில் கட்சி சம்பந்தமாக தேர்தல் சம்பந்தமாக, கூட்டணி சம்பந்தமாக இந்தியா முழுவதும் பேசுவதற்கு அக்கட்சியின் பொறுப்பாளர்கள், மூத்த தலைவர்கள் இருக்கிறார்கள்.
பல மாநிலங்களில் தேர்தல் வியூகங்களை வகுத்து, அதன் அடிப்படையில் தொடர்ந்து வெற்றி பெற்றிருப்பதை நினைவு கூற விரும்புகிறேன். எனவே, பாஜகவிற்கு தமிழகத்தில் மட்டுமல்லாமல், எந்த மாநிலத்திலும் கூட்டணிக்காக பேசுவதற்கு தயவும் இல்லை, அவசியமும் இல்லை என்பது என்னுடைய கருத்து.
தமிழ் மாநில காங்கிரஸ் கட்சியின் தலைவர் என்ற முறையில், கூட்டணி தலைவர்களை ஒத்த கருத்தோடு தேர்தலில் நின்று அதன் அடிப்படையில், கட்சிகளோடு நட்பு கட்சியாக செயல்பட்டுக் கொண்டிருக்கும் காரணத்தினால், தலைவர்களைச் சந்தித்து நாட்டு நலன், மக்கள் நலன் குறித்து பேசுவதை வழக்கமாக வைத்திருக்கிறேன்" எனத் தெரிவித்தார்.
தொடர்ந்து பேசிய அவர், "கட்சியின் தலைவர் என்ற காரணத்தினால், என்னுடைய கட்சியின் இறுதி முடிவை என்னால் கூட சொல்ல முடியாது. செயற்குழு உறுப்பினர்கள், மூத்த உறுப்பினர்கள் எல்லாம் கருத்துக்களை கூறிய பிறகுதான் முடிவுகளைக் கூற முடியும். அந்த வகையில், மற்ற கட்சிகளுக்காக நான் பேசுவதற்கு எந்த தேவையும் இல்லை, அவசியமும் இல்லை, அந்த அதிகாரமும் இல்லை" எனத் தெரிவித்தார்.
அதனைத் தொடர்ந்து, தமிழ் மாநில காங்கிரஸ் சார்பில் பாஜகவில் குறிப்பிட்ட இடங்களைக் கேட்டதாக வந்த தகவல்கள் குறித்து செய்தியாளர்கள் கேள்வி எழுப்பினர். அதற்கு, "அது முற்றிலும் தவறான தகவல். அடிப்படை ஆதாரம் இல்லாதது, அது போன்ற தகவல்களைக் கூறுபவர்களை நம்பத் தேவையில்லை" என பதிலளித்தார்.
பின்னர், நடிகர் விஜய் கட்சி துவங்கியது குறித்து செய்தியாளர்கள் கேட்டதற்கு, "கட்சியை ஆரம்பிப்பதற்கு எந்த துறையைச் சார்ந்தவர்களாக வேண்டுமானாலும் இருக்கலாம். அதற்கு ஜனநாயகத்தில் எந்த தடையும் இல்லை. வாக்காளர்கள்தான் ஜனநாயகத்தில் எஜமானர்கள். அவர்களது முடிவுதான் இறுதி முடிவு.
வாக்காளர்களின் எண்ணம் போல் செயல்பட்டால், வெற்றி பெறுவதற்கான வாய்ப்பு பிரகாசமாக இருக்கும். அந்த வகையில், நடிகர் நடிகர் விஜய் துவங்கியுள்ள புதிய கட்சிக்கு தமிழ் மாநில காங்கிரஸ் சார்பில் வாழ்த்துக்கள்" என தமிழ் மாநில காங்கிரஸ் தலைவர் ஜி.கே.வாசன் தெரிவித்தார்.
இதையும் படிங்க: "புதிய கட்சி தொடங்கியுள்ள நடிகர் விஜய்க்கு வாழ்த்துகள்" - அமைச்சர் முத்துச்சாமி!
