தூத்துக்குடி: தூத்துக்குடி மாவட்டம் ஒட்டப்பிடாரம் சட்டமன்றம் செக்காரக்குடி கிராமத்தை சுற்றி பல கிராமங்கள் உள்ளது. இந்த பகுதிகளில் நேற்று (அக்.10) மாலை சுமார் 3 மணி நேரம் பலத்த மழை பெய்ததுள்ளது. இதன் காரணமாக செக்காரக்குடி, மகிழம்பூ ஓடையில் காட்ற்றாற்று வெள்ளம் பெருக்கெடுத்து ஓடியது.
கனமழையும் மூழ்கிய பாலங்களும்: காட்ற்றாற்று வெள்ளம் காரணமாக கொம்புக்காரநத்தம் பகுதியில் உள்ள தரைப்பாலம் மூழ்கியது. இதேபோன்று செக்காரக்குடி ஊருக்கு செல்லும் பாலமும் தண்ணீரில் மூழ்கியுள்ளதால் போக்குவரத்து கடுமையாக பாதிக்கப்பட்டுள்ளது. மேலும், காட்ற்றாற்று வெள்ளம் காரணமாக செக்காரக்குடி, நடு செக்காரக்குடி, மேல செக்காரக்குடி, சொக்கலிங்கபுரம் உள்ளிட்ட கிராமங்களுக்கு போக்குவரத்து துண்டிக்கப்பட்டுள்ளது.
மின்சாரம் இல்லாமல் மழைநீர் சூழ்ந்த கிராமம்: மேலும் மின்சாரம் இல்லாததால் பொதுமக்கள் மிகவும் பாதிக்கப்பட்டுள்ளனர். அதே போல் கிராமத்தின் தாழ்வான பகுதிகளில் மழைநீர் சூழ்ந்து காணப்படுகிறது. இது குறித்து உடனடியாக மாவட்ட நிர்வாகம் முன்னெச்சரிக்கை நடவடிக்கையை மேற்கொள்ள வேண்டும் என கிராம மக்கள் தெரிவித்துள்ளனர்.
இதையும் படிங்க: வடகிழக்கு பருவமழை: தமிழகத்தில் 1000 இடங்களில் மருத்துவ முகாம்கள் ரெடி - அமைச்சர் மா.சுப்பிரமணியன் தகவல்
முன்னெச்சரிக்கை பயிற்சி: இந்நிலையில் தூத்துக்குடி மாவட்டத்தில் உள்ள சாத்தான்குளத்தில் வடகிழக்கு பருவ மழை முன்னெச்சரிக்கை குறித்து பொதுமக்களுக்கு பயிற்சி வழங்கப்பட்டது. கடந்த 2023 ஆம் ஆண்டு டிசம்பர் மாதம் பெய்த கனமழையின் காரணமாக பல்வேறு இடங்களில் மழை வெள்ளம் சூழ்ந்தது. இதன் காரணமாக இந்த முன்னெச்சரிக்கை பயிற்சி நடத்தப்பட்டுள்ளது.
பருவமழை தற்காப்பு: கடந்த அக்.1 ஆம் தேதி முதல் வடகிழக்கு பருவமழை தொடங்கியுள்ள நிலையில் பருவமழை தீவிரமடையும் முன்பு சாத்தான்குளம் தாலுகாவில் உள்ள பொதுமக்கள் மற்றும் சமூக ஆர்வலர்களுக்கு தீயணைப்பு துறை சார்பில் பொதுமக்களுக்கு பயிற்சி வழங்கப்பட்டது.
பயிற்சியில் கற்பிக்கப்பட்டது: இந்த பயிற்சியில் மழை வெள்ளம் காலங்களில் பாதிக்கப்பட்டவர்களை எவ்வாறு காப்பாற்ற வேண்டும் என்பது குறித்து அதிகாரிகள், பொதுமக்கள் மற்றும் சமூக ஆர்வலர்களுக்கு பயிற்சி அளிக்கப்பட்டது. இதில் கோட்டாட்சியர் சுகுமாரன் மற்றும் வட்டாட்சியர் இசக்கி முருகேஸ்வரி ஆகியோர் கலந்து கொண்டனர்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
