திருநெல்வேலி: திருநெல்வேலி மாவட்டம், அம்பாசமுத்திரம் மேற்கு தொடர்ச்சி மலைப்பகுதியில் அமைந்துள்ள மலைக் கிராமங்களான மாஞ்சோலை, ஊத்து, காக்காச்சி, நாலு முக்கு உள்ளிட்ட இடங்களில் உள்ள தேயிலைத் தோட்டங்களை காலி செய்து அங்கு வசித்து வரும் தொழிலாளர்களை வெளியேற்றும் நடவடிக்கை நடந்து வருகிறது.
இந்த நிலையில், தேயிலை தோட்ட தொழிலாளர்கள் சார்பில், நீதிமன்றத்தில் தொடரப்பட்ட வழக்கில் வனத்துறை விளக்கம் அளித்து அறிக்கை தாக்கல் செய்ய நீதிமன்றம் உத்தரவு பிறப்பித்தது. எனவே, களக்காடு முண்டந்துறை புலிகள் காப்பக துணை இயக்குனர் சார்பில் 13 பக்க அறிக்கை நீதிமன்றத்தில் சமர்ப்பிக்கப்பட்டுள்ளது.
இந்த நிலையில், மாஞ்சோலை மக்கள் வாழ்வுரிமை மீட்புக் குழு சார்பில், நெல்லை மாவட்ட காங்கிரஸ் கமிட்டி அலுவலகத்தில் செய்தியாளர்கள் சந்திப்பு நடைபெற்றது. இதில், அமைப்பின் நிர்வாகிகளான டேனியல் மற்றும் சுபத்ரா உள்ளிட்டோர் செய்தியாளர்களைச் சந்தித்து மாஞ்சோலை மலைக் கிராமம் சார்பில் பல்வேறு தகவல்களை தெரிவித்தனர்.
அப்போது டேனியல் கூறும்போது, "மாஞ்சோலை மலைப்பகுதி தேயிலைத் தோட்ட தொழிலாளர்களிடம் நடத்தப்பட்ட கணக்கெடுப்பில் 90 சதவீதத்திற்கும் அதிகமான மக்கள் மாஞ்சோலை பகுதியிலேயே தொடர்ந்து வாழ விருப்பம் தெரிவித்துள்ளனர். இந்த நிலையில், அரசு சார்பில் எந்த ஒரு குழுவும் அமைக்காமல் மக்களிடம் கருத்துக்களை கேட்காமல் தன்னிச்சையான முறையில் வனத்துறை சார்பில் நீதிமன்றத்தில் நிலை அறிக்கை தாக்கல் செய்யப்பட்டு, பல்வேறு முன்னுக்குப் பின் முரணான தகவல்கள் கொடுக்கப்பட்டுள்ளது.
களக்காடு முண்டந்துறை புலிகள் காப்பக உதவி இயக்குனரால் தாக்கல் செய்யப்பட்ட நிலை அறிக்கையில், மலைவாழ் மக்களின் அடிப்படை உரிமைகள் பறிக்கும் தகவல்கள் இடம்பெற்றுள்ளது. டான்டீ மூலம் தமிழக அரசு தற்போதைய தேயிலை நிறுவனத்தை கையகப்படுத்த முடியாது. ஒப்பந்தத்தை நீட்டிக்க முடியாது.
வன உரிமைச் சட்டத்தின் கீழ் மக்களுக்கு சமூக பாதுகாப்பு அளிக்க முடியாது என நிலை அறிக்கையில் குறிப்பிட்டுள்ளது. மாஞ்சோலை விவகாரத்தில் அரசு எந்த முறையான தகவல்களும் மக்களுக்கு தெரிவிக்கவில்லை. வனத்துறை துணை இயக்குனர் அளித்த தகவல்கள் அரசின் கொள்கை முடிவைப் போல் குறிப்பிடப்பட்டுள்ளது.
எட்டு நாட்களாக குடிநீர், மின்சாரம் உள்ளிட்ட எந்த விதமான அடிப்படை வசதியும் இல்லாமல் மாஞ்சோலை மக்கள் வாழ்கின்றனர். மாவட்ட ஆட்சியர், பொறுப்பு அமைச்சர் ஆகியோர் கூட இந்த விவகாரத்தில் மக்களுக்கான எந்த ஒரு நடவடிக்கையையும் மேற்கொள்ளவில்லை.
மக்களின் கஷ்டத்தை அரசு புரிந்து கொள்ளாமல் செயல்பட்டு வருகிறது. திராவிட மாடல், சமூக நீதி என சொல்லும் அரசு மாஞ்சோலை விவகாரத்தில் முறையாக பதிலளிக்காமல் பாராமுகமாக உள்ளது. அரசின் கொள்கை முடிவை அரசு தான் அறிவிக்க வேண்டுமே தவிர, வனத்துறை அறிவிக்கக்கூடாது" என தெரிவித்தார்.
பின்னர், சுபத்ரா செய்தியாளர்களிடம் கூறும்போது, "எட்டு நாட்களுக்கு மேலாக மின்சாரம் உள்ளிட்ட அடிப்படை வசதி எதுவும் இல்லாமல் மக்கள் சிரமத்திற்கு உள்ளாகி உள்ளனர். கடந்த 65 தினங்களுக்கு மேலாக தேயிலைத் தோட்டத்தில் பணி செய்த ஊழியர்கள் ஊதியம் இல்லாமல் சிரமத்திற்கு உள்ளாகியுள்ளனர்.
அடுத்த வேலை உணவுக்கு கூட வழியில்லாத சூழல் அங்கு உருவாகியுள்ளது. தேயிலைtஹ் தோட்டங்களில் உள்ள கீரைகளைப் பறித்து சாப்பிட்டு உணவுத் தேவையை பூர்த்தி செய்து வருகின்றனர். எட்டு நாட்களுக்கு மேல் மின்சாரம் இல்லாமல் இருக்கும் அப்பகுதி மக்களுக்கு குடிநீர், தொலைத்தொடர்பு சாதனங்கள் என எதுவும் கிடைக்கப் பெறாமல் சிரமத்திற்குள்ளாகி உள்ளனர். ஊதியமில்லாமல் சிரமத்தைச் சந்தித்து வரும் அப்பகுதி மக்கள் என்ன செய்வது என்று தெரியாமல் தவித்து வருவதுடன், அங்குள்ள ஆண்கள் வெளிப் பகுதிகளுக்குச் சென்று வேலை தேடும் நிலையில் இருக்கின்றனர்.
வெளியூர் சென்ற ஆண்கள் என்ன செய்கிறார்கள் என்று தெரியாமல் அவர்களை தொடர்பு கொள்ள முடியாத நிலைக்கு மாஞ்சோலை பகுதி மக்கள் தள்ளப்பட்டுள்ளனர். தேயிலைத் தோட்ட நிறுவனங்களால் பராமரிக்கப்பட்டு வந்த குடியிருப்பு பகுதிகள் தற்போது எந்தவித பராமரிப்பு பணிகளும் மேற்கொள்ளப்படாமல் முதர் மண்டி காட்சியளிக்கிறது.
மின்சாரம் இல்லாத சூழலில் இரவு நேரங்களில் புதர்களில் இருந்து பாம்பு, உடும்பு உள்ளிட்ட விஷ ஜந்துக்கள் வீடு இருக்கும் பகுதிகளில் சுற்றி வருவதால் வீடுகளில் இருந்து வெளியே வர முடியாத நிலைக்கு தள்ளப்பட்டுள்ளனர். அங்குள்ள பெண்கள் உணவு உள்ளிட்ட அடிப்படை வசதிகள் கிடைக்கப் பெறாமல் தவித்து வரும் சூழலில் மனமுடைந்து காணப்படுகின்றனர். தமிழக அரசு அப்பகுதி மக்களின் அடிப்படை தேவைகளை பூர்த்தி செய்யும் வகையில், உடனடியாக நடவடிக்கை எடுக்க கோரிக்கை வைக்கப்பட்டுள்ளது” என்றார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க : சிறுவாணி அணை விவகாரம்; கேரள அரசுக்கு எஸ்.பி.வேலுமணி கண்டனம்! - Siruvani Dam Water Reservoir Issue
