சென்னை: இந்தியா முழுவதும் ஏப்ரல் 19ஆம் தேதி தொடங்கி ஜூன் 1ஆம் தேதி வரை மக்களவைத் தேர்தல் ஏழு கட்டங்களாக நடத்த இந்தியத் தேர்தல் ஆணையம் திட்டமிட்டுள்ளது. இந்த சூழலில், தமிழ்நாடு முழுவதும் வருகின்ற ஏப்ரல் 19ஆம் தேதி ஒரே கட்டமாக மக்களவைத் தேர்தலுக்கான வாக்குப்பதிவு நடைபெறும் என்றும் அறிவிக்கப்பட்டுள்ளது.
இந்த நிலையில், பல்வேறு பிரதான கட்சிகளின் வேட்பாளர்களும், சுயேச்சை வேட்பாளர்களும் தாங்கள் போட்டியிடும் தொகுதிகளில் தீவிரமாக வாக்குகளைச் சேகரிப்பதற்கு வாக்காளர்களைச் சந்தித்து பிரச்சாரத்தில் ஈடுபட்டு வருகின்றனர்.
இதற்கிடையில், தமிழ்நாடு முழுவதும் பல இடங்களில் தேர்தல் விதிகளை மீறி பணப்பட்டுவாடா நடக்காமல் தடுக்க பறக்கும் படையினர் சோதனை மேற்கொண்டு வருகின்றனர். அந்த வகையில், தமிழகம் முழுவதும் பல்வேறு மாவட்டங்களில், பல கோடி ரூபாய் மதிப்பிலான பரிசுப் பொருட்கள் மற்றும் ரொக்கப்பணத்தை தேர்தல் பறக்கும் படையினர் பறிமுதல் செய்துள்ளனர்.
இந்த நிலையில், சென்னை தலைமைச் செயலகத்தில் செய்தியாளர்களைச் சந்தித்துப் பேசிய தலைமைத் தேர்தல் அதிகாரி சத்யபிரதா சாகு, தேர்தல் பணிகளுக்கான ஏற்பாடுகள் குறித்து விவரித்தார். அப்போது அவர் பேசுகையில், "இதுவரை தேர்தல் பாதுகாப்புப் பணிக்காக 165 கம்பெனிகளைச் சேர்ந்த துணை ராணுவப் படையினர் தமிழகம் வந்துள்ளனர் எனவும் நடைபெறவிருக்கின்ற மக்களவை தேர்தலுக்காக மொத்தம் 190 கம்பெனிகளைச் சேர்ந்த துணை ராணுவ படையினர் தமிழகத்தில் பாதுகாப்புப் பணியில் ஈடுபட உள்ளதாகவும்" தெரிவித்தார்.
தொடர்ச்சியாகப் பேசிய அவர், "குறிப்பாக, பதற்றமான வாக்குச்சாவடிகளாகக் கண்டறியப்பட்டுள்ள வாக்குச்சாவடிகளில் இந்த துணை ராணுவ படையினர் பாதுகாப்புப் பணியில் ஈடுபடுவார்கள். இதுமட்டும் அல்லாது, தேர்தல் தேதி அறிவிக்கப்பட்டதால் விதிமுறைகளின்படி கலைஞர் நினைவிடத்தில் ஒளிபரப்பு செய்யப்பட்டு வந்த ஒளி - ஒலி காட்சி நிறுத்தப்பட்டுள்ளது.
மேலும், தேர்தல் பறக்கும் படை மற்றும் நிலையான கண்காணிப்புக் குழுக்களின் எண்ணிக்கை அதிகரிக்கப்பட்டு உள்ளது. அதேபோல, தேர்தல் பார்வையாளர்களின் பரிந்துரையின் அடிப்படையில், இந்த எண்ணிக்கை அதிகரிக்கப்பட்டு உள்ளது.
அந்த வகையில், ஒரு சட்டமன்றத் தொகுதிக்கு ஒரு அனைத்து மாற்றுத்திறனாளி வாக்குச்சாவடி, ஒரு அனைத்து பெண்கள் வாக்குச்சாவடி, மாவட்டத்திற்கு ஒரு அனைத்து இளைஞர்கள் வாக்குச்சாவடி பிரத்தியேகமாக அமைக்கப்படும்.
இதனைத் தவிர்த்து, தேர்தல் ஏற்பாடுகள் தொடர்பாக நேற்று (ஏப்.02) அனைத்து மாவட்ட தேர்தல் அதிகாரிகளுடனும் நடத்தப்பட்ட ஆலோசனையில் பல்வேறு அறிவுறுத்தல்கள் அவர்களுக்கு வழங்கப்பட்டுள்ளதாகவும்" அவர் தெரிவித்துள்ளார்.
இதையும் படிங்க: பணப் பட்டுவாடா புகார்: தமிழகத்தில் ஒரே நாளில் ரூ.4 கோடி பறிமுதல்... வருமான வரித்துறை அதிரடி!
