சென்னை: விளையாட்டுப் போட்டிகளின் போது ஏற்படும் அசம்பாவித சம்பவங்களால் பாதிக்கப்படுவோருக்கு இழப்பீடு வழங்குவது குறித்து திட்டம் வகுக்க தமிழக விளையாட்டு மேம்பாட்டு துறைக்கு சென்னை உயர்நீதிமன்றம் ஆலோசனை தெரிவித்துள்ளது.
திருவள்ளூர் மாவட்டத்தில் உள்ள ஒத்திக்காடு ஏரியில் கடந்த 2020 ஆம் ஆண்டு டிசம்பர் மாதம் நடத்தப்பட்ட கிரிக்கெட் போட்டியின் போது பந்து தாக்கி லோகநாதன் என்ற சட்டக்ல்லூரி மாணவர் உயிரிழந்தார். இதையடுத்து உயிரிழந்த லோகநாதனுன் தந்தை தாமோதரன் அளித்த புகாரின் அடிப்படையில் கிரிக்கெட் போட்டி ஏற்பாடு செய்திருந்த ராசு மற்றும் ஐயப்பன் ஆகியோருக்கு எதிராக புல்லரம்பாக்கம் போலீசார், கொலை செய்யும் நோக்கம் இல்லாமல் மரணத்தை விளைவித்த பிரிவின் கீழ் வழக்கு பதிவு செய்தனர்.
இந்த வழக்கை ரத்து செய்யக்கோரி ராசு மற்றும் ஐயப்பன் ஆகியோர் சென்னை உயர்நீதிமன்றத்தில் மனு தாக்கல் செய்திருந்தனர். இந்த மனு நீதிபதி ஜெயச்சந்திரன் முன்பு விசாரணைக்கு வந்தபோது பலியான இளைஞர் லோகநாதனின் தந்தை தாமோதரன் நேரில் ஆஜராகி வாதிட்டார்.
அனைத்து தரப்பு வாதங்களையும் கேட்ட நீதிபதி, லோகநாதன் தாமாக முன்வந்து விளையாட்டில் பங்கெடுத்திருக்கிறார். கார்க் பந்து தாக்கியதில் லோகநாதன் மரணம் அடைந்திருக்கிறார். கிரிக்கெட் விளையாட்டில் கார்க் பந்து பயன்படுத்த எந்த தடையும் இல்லை. கிரிக்கெட் பேட்ஸ்மேன்களுக்கோ? ஏற்பாட்டளர்களுக்கோ? லோகநாதனுக்கு மரணம் ஏற்படுத்த வேண்டும் என்ற எந்த உள்நோக்கமும் இல்லை எனக் கூறிய நீதிபதி, ராசு மற்றும் ஐயப்பன் மீதான வழக்கை ரத்து செய்து உத்தரவிட்டார்.
மேலும் பெற்றோருக்கு ஒரே மகனான லோகநாதனின் மரணத்திற்கு அவரது பெற்றோருக்கு உரிய இழப்பீடு பெற்றுத் தர வேண்டும் என திருவள்ளூர் மாவட்ட சட்டப் பணிகள் ஆணைக் குழுவுக்கு உத்தரவிட்ட நீதிபதி, விளையாட்டுப் போட்டிகளின் போது ஏற்படும் மரணங்களுக்கு உரிய இழப்பீடுகள் வழங்குவது தொடர்பான திட்டத்தை வகுக்கும்படி இளைஞர் நலம் மற்றும் விளையாட்டு மேம்பாட்டு துறைக்கு யோசனை தெரிவித்துள்ளார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்.
