சென்னை: கடந்த சில நாட்களாகவே தமிழகத்தின் பல்வேறு மாவட்டங்களில் வெப்பம் அதிகரித்துக் கொண்டு இருக்கிறது. முன்பு எப்பொழுதும் இல்லாத அளவில் வெப்பம் பதிவாகி இருக்கிறது. குறிப்பாக வேலூர், ஈரோடு, கரூர் உள்ளிட்ட மாவட்டங்களில் வரலாறில் இல்லாத அளவிற்கு வெப்பம் பதிவாகி இருந்தது. இதனால், பொதுமக்கள் வெளியில் செல்ல முடியாது சூழல் ஏற்பட்டிருந்தது. தமிழகத்தில் ஒரு சில இடங்களில் கோடை மழை பெய்தாலும் சில இடங்களில் வெயிலின் தாக்கம் அதிகரித்துக் கொண்டே வருகிறது.
குறிப்பாக, சென்னை போன்ற கடலோர மாவட்டங்களில் வெப்பம் குறைவாக பதிவாகி இருந்தாலும் காற்றில் ஈரப்பதம் அதிகமாக இருந்ததால் வெப்பம் அதிகளவு உணர முடிந்தது. எனவே, சில நேரங்களில் வெப்பத்தின் காரணமாக, பொதுமக்கள் வெளியில் வராமல் சாலைகள் வேறிச்சோடியும் காணப்பட்டது. அதிகளவு வெப்பம் பதிவாகுவதற்கு எல் நினோ (El-Nino) ஒரு முக்கிய காரணம் என வானிலை ஆய்வாளர்கள் தெரிவித்து இருந்தனர். அதிக வெயிலில் இருப்பதால், பொதுமக்கள் பாதுகாப்பாக வீடுகளிலோ அலுவலகத்திலோ இருக்குமாறு அறிவுறுத்தப்பட்டிருக்கிறது.
இந்த வெப்பமானது, 'இன்னும் ஆறு தினங்களுக்கு தொடரும்' எனவும் தமிழக உள் மாவட்டங்களில் 'கோடை மழை' சில இடங்களில் வெப்பம் குறைய வாய்ப்பு உள்ளது. 'வெப்ப அலை' குறித்தும் கோடை மழை குறித்தும் வானிலை ஆய்வு மையத்தின் தென்மண்டல வானிலை மைய இயக்குனர் பாலச்சந்திரன் ஈடிவி பாரத்திற்கு பிரத்தியேகமாக பேட்டி அளித்துள்ளார்.
அப்போது பேசிய அவர், 'கோடை என்பது வெப்பம் அதிகமாக இருக்கக்கூடிய காலகட்டம் தான், வெப்ப அலை அதிகமாக பதிவாகி இருக்கிறது. மே 6 ஆம் தேதி வரை வெப்பநிலை அதிகரிக்கும். வெப்ப நிலையை பொறுத்தவரை, குறிப்பிட்ட காரணங்கள் சொல்ல முடியாது; இது அந்தந்த மாவட்டத்தின் தன்மையைப் பொறுத்து அமைகிறது.
20 வருடங்களுக்கு முன்பு இருந்த மலைப்பகுதி தற்போது இல்லை. மாற்றம் ஏற்பட்டு இருக்கிறது. இந்த பகுதியில் கோடை மழை குறைந்து, ஈரத்தன்மை குறைவாக இருந்துள்ளது. அந்த பகுதியில் சூழ்நிலை மாறி உள்ளது. அதன் விளைவுகளாக வெப்ப நிலைகள் சில இடங்களில் கூடுகிறது.
பொதுவாக பார்க்கும் பொழுது, கடலோர மாவட்டங்களில் வெப்பம் பதிவு குறைவாக இருந்தாலும், வெப்ப உணர்வு அதிகமாக இருப்பதற்கு ஈரப்பதம் காற்றில் இருப்பது காரணமாக இருக்கிறது. அதிக வெப்பமும் ஈரப்பதமும் கலந்து இருப்பதால் அசௌகரியம் ஏற்படுகிறது.
வெப்பநிலை தொடர வாய்ப்பு உள்ளது. கடலோர மாவட்டங்களில் கோடை மழை வருவதற்கு வாய்ப்பு குறைவாக உள்ளது. உள் மாவட்டங்களில் கோடை மழை பெய்து வருகிறது. இதனால், அப்பகுதிகளில் வெப்ப சற்று குறைய வாய்ப்புள்ளது' எனத் தெரிவித்துள்ளார்.
இதையும் படிங்க: தமிழ்நாட்டில் 22 மாவட்டங்களில் சதம் அடித்த வெயில்.. மக்கள் கடும் அவதி! - Tamil Nadu Weather Report
