சென்னை: இசை அமைப்பாளரும் நடிகருமான ஜி.வி.பிரகாஷ் குமார் தமிழ் சினிமாவில் முன்னணியில் உள்ளார். சமீப காலமாக திரைப்படங்களில் பிஸியாக நடித்து வருகிறார். ஏ.ஆர்.ரஹ்மானின் உறவினரான இவர் வசந்தபாலன் இயக்கிய வெயில் படத்தின் மூலம் இசை அமைப்பாளராக அறிமுகமானார். அப்படத்தில் இடம்பெற்ற அனைத்து பாடல்களும் மிகப் பெரிய ஹிட் ஆனது.
இவரும் அவரது பள்ளித் தோழியான சைந்தவியும் நீண்ட வருடங்களாக காதலித்து வந்த நிலையில் கடந்த 2013ம் ஆண்டு திருமணம் செய்து கொண்டனர். இவர்களுக்கு ஒரு மகள் உள்ளார். இந்நிலையில், ஜி.வி.பிரகாஷ் சைந்தவி தம்பதியினர் தங்களது 11 வருட திருமண வாழ்க்கையில் இருந்து பிரிந்ததாக அறிவித்தனர். இது ரசிகர்கள் மற்றும் திரைத்துறையினர் மத்தியில் அதிர்ச்சியை ஏற்படுத்தியது. இந்த நிலையில், இவர்களது விவாகரத்து குறித்து சமூக வலைத்தளங்களில் பல்வேறு கருத்துக்கள் பரவி வருகின்றன.
இந்த நிலையில், இதுகுறித்து விளக்கமளித்து ஜி.வி.பிரகாஷ் குமார் தனது சமூக வலைத்தள பக்கத்தில் பதிவிட்டுள்ளார். அதில், “புரிதலும், போதுமான விவரங்கள் இல்லாமலும் அனுமானத்தின் பேரில் இரு மனங்கள் இணைவது, பிரிவது குறித்து பொதுவெளியில் விவாதிக்கப்படுது துரதிஷ்டவசமானது. பிரபலமான நபராக இருப்பதாலே ஒருவரின் தனிப்பட்ட வாழ்விற்குள் அத்துமீறி நுழைந்து தரம் தாழ்ந்த விமர்சனங்கள் வைப்பதும் ஏற்புடையதல்ல.
தங்களின் கற்பனைக்கு வார்த்தைகள் மூலம் வடிவம் கொடுத்து சமூக ஊடகங்களில் வெளிப்படுத்துவதால் அது
"யாரோ ஒரு தனிநபரின் வாழ்க்கையை பாதிக்கும் என்பதை உணராத அளவுக்கு தமிழர் மாண்பு குறைந்து விட்டதா...?
இருவரும் பரஸ்பரம் ஒப்புக்கொண்டு பிரிந்ததன் பின்னணியையும், காரணங்களையும் என்னுடன் நெருங்கிய பழகிய நண்பர்கள், உறவினர்கள் நன்கறிவார்கள். அனைவரிடமும் கலந்தாலோசித்து பின்புதான் இருவரும் இந்த முடிவை மேற்கொண்டோம்.
எங்களை பிரபலங்களாக உருவாக்கிய உரிமையிலோ அல்லது என் தனிப்பட்ட வாழ்க்கை மீது தங்களுக்கு இருந்த பேரன்பின் வெளிப்பாடாகவோ தங்களின் ஆதங்கமான விமர்சனங்கள் இருந்தாலும் சம்பந்தப்பட்டவர்களின் மனதை அது மிகவும் காயப்படுத்துகிறது என்பதை உணர்த்தவே இதை பதிவிடுகிறேன். ஒவ்வொரு தனி மனிதரின் நியாயமான உணர்வுக்கும் மதிப்பளியுங்கள். தங்களின் பேரன்புக்கும் ஆதரவுக்கும் என் நெஞ்சார்ந்த நன்றி” என்று பதிவிட்டுள்ளார்.
