சென்னை : அரசு மருத்துவர்கள் மற்றும் பட்டமேற்படிப்பு மருத்துவர்கள் சங்கத்தின் மாநிலத் தலைவர் சாமிநாதன், பொதுச் செயலாளர் ராமலிங்கம் ஆகியோர் சென்னையில் செய்தியாளர்களை சந்தித்து பேசினர். அப்போது அவர்கள் பேசியதாவது, "மறைந்த முன்னாள் முதலமைச்சர் கருணாநிதி போட்ட அரசாணை 354ன் படி ஊதியம் மற்றும் பதவி உயர்வு வழங்குவதற்கு பேச்சுவார்த்தை நடத்த வேண்டும்.
மேலும், அரசாணை 293-ஐ மாற்றம் செய்து வழங்கியதில் ஆரம்ப சுகாதாரநிலைய மற்றும் பல் மருத்துவர்களுக்கு இன்னும் கிடைக்க வேண்டிய பலன்கள் கிடைக்க வில்லை. எனவே, அதனை உடனடியாக வழங்க வேண்டும்.
அரசு மருத்துவர்கள், செவிலியர்கள், ஊழியர்கள் ஆகிய அனைத்து காலிப்பணிடங்களை உடனடியாக நிரப்ப வேண்டும்.
கடந்த 10 வருடமாக ஆரம்ப சுகாதார நிலையம், மாவட்ட மருத்துவமனைகள், புதியதாக ஆரம்பிக்கப்பட்ட 11 மருத்துவக்கல்லூரி ஆகியவற்றில் புதியாக மருத்துவர், செவிலியர் பணியிடங்களை உருவாக்கவில்லை. சீமாங் திட்டத்தை ஆரம்பிக்கும் போது அங்கு பணிபுரிந்து வரும் மருத்துவர்களை மாற்றுப் பணியில் அமர்த்தினர். அந்த திட்டத்திற்கு என புதியதாக மருத்துவர்களை நியமனம் செய்யவில்லை. விபத்து அவசர சிகிச்சையை அளிக்கும் தாய் திட்டத்திற்கும் புதியதாக மருத்துவர்களை நியமனம் செய்யவில்லை.
புதிதாக ஆரம்பிக்கப்பட்ட 11 மருத்துவக் கல்லூரியிலும், தேசிய மருத்துவ ஆணையத்தின் விதிகளின் படி மருத்துவர், செவிலியர் பணியிடங்களை அனுமதிக்கவில்லை. சுமார் 2 ஆயிரம் காலிப் பணியிடங்கள் உள்ளது. மேலும், அரசு மருத்துவமனைகளில் நோயாளிகளின் எண்ணிக்கை அதிகரித்து வரும் நிலையில் அதற்கு ஏற்ப மருத்துவர்கள், செவிலியர்கள் நியமனம் செய்யப்படவில்லை.
குறைந்த அளவில் மருத்துவர்களை வைத்துக்கொண்டு 24 மணி நேரமும் பணி செய்ய அழுத்தம் தருகின்றனர். இதனால் மக்களுக்கு சரியான சிகிச்சை அளிக்க முடியாத நிலையும், மருத்துவர்களின் உடல் நலன் பாதிப்பும் ஏற்படுகிறது. எனவே, அரசு அனைத்து மருத்துவமனைகளிலும் சுழற்சி முறையில் பணி செய்யும் நடைமுறையை ஏற்படுத்த வேண்டும்.
இதையும் படிங்க : 'மருத்துவப் பணியாளர்களை பணி நிரந்தரம் செய்யமாட்டோம்'? தமிழக அரசு மீது சமூக சமத்துவத்திற்கான மருத்துவர்கள் சங்கம் வருத்தம்!
ஆரம்ப சுகாதார நிலையம், நகர்புற ஆரம்ப சுகாதார நிலையம், மாவட்ட தலைமை மருத்துவமனைகளிலும் போதுமான அளவிற்கு மருத்துவர்கள் நியமனம் செய்யப்படாமல் உள்ளது. குறிப்பாக ஆரம்ப சுகாதார நிலையங்களில் 24 மணி நேரமும் பணியில் 2 மருத்துவர்கள் இருக்கும் அவல நிலையும் உள்ளது. எனவே 2 மருத்துவர்கள் இருக்கும் இடத்தில் 7 மருத்துவர்களை நியமனம் செய்து சுழற்சி முறையில் பணி வழங்க வேண்டும்.
மேலும், மருத்துவர்கள் தமிழ்நாடு அரசுப் பணியாளர் தேர்வாணையம் மூலம் தேர்வு செய்தால் காலதாமதம் ஏற்படும் என்பதால், மருத்துவப் பணியாளர் தேர்வு வாரியம் உருவாக்கப்பட்டது. திமுக ஆட்சி அமைந்த பின்னர் 3 வருடமாக சுமார் 4 ஆயிரம் பணியிடங்களை மட்டுமே நிரப்பி உள்ளனர்.
அதிலும் 1,000 மருத்துவர் பணியிடங்களுக்கு தேர்வு நடத்தி முடிவுகள் வெளியிட்டத்தில் 700-800 மருத்துவர்கள் மட்டுமே பணியில் சேர்ந்துள்ளனர். எனவே, காத்திருப்பு பட்டியலில் உள்ளவர்களை அழைத்து காலியிடத்தை நிரப்ப வேண்டும்.
அரசு மருத்துவர்களின் செயல்பாடுகள் குறித்து அறிக்கை கேட்கும் மருத்துவம் மற்றும் மக்கள் நல்வாழ்வுத்துறை மருத்துவப் பணியாளர் தேர்வு வாரியம் கடந்த ஜனவரி மாதம் 2,400 மருத்துவப் பணியிடங்கள் நிரப்பப்படும் என அறிவித்தது. தற்போது வரை அது அறிவிப்போடு இருக்கிறது. பரீட்சை நடக்கவில்லை, பணியிடங்கள் நிரப்பபடாமல் உள்ளது. எனவே, மருத்துவப் பணியாளர் தேர்வு வாரியத்திடமும் செயல்திட்ட அறிக்கையை கேட்க வேண்டும்.
மருத்துவமனைக்கான கட்டடங்களும், உபகரணமும் இருந்தால் மட்டும் போதாது. மருத்துவர்கள் நியமனம் செய்ய வேண்டும் என மறைந்த முன்னாள் முதலமைச்சர் கருணாநிதி கூறியுள்ளார். அதன்படி மருத்துவமனைக்கு தேவையான பணியாளர்களை நியமனம் செய்ய முதலமைச்சர் மு.க.ஸ்டாலின் நடவடிக்கை எடுக்க வேண்டும்.
மருத்துவர்கள் நியமனம் செய்ய நிதி இல்லை என நிதித்துறை கூறுகிறது. எனவே, மருத்துவர்கள், செவிலியர்கள் நியமனத்திற்கு தேவையான நிதியை வழங்க நிதித்துறைக்கு உத்தரவிட வேண்டும். முதலமைச்சரின் மருத்துவக் காப்பீட்டு திட்டத்திற்கு பணத்தை அளித்து, அந்த நிதி தனியார் மருத்துவமனைகளுக்கு செல்கிறது. எனவே, காப்பீட்டு திட்டத்திற்கு அளிக்கும் நிதியை அரசு மருத்துவமனைகளுக்கு வழங்க வேண்டும்.
அரசு மருத்துவர்களின் ஊதிய பிரச்னைக்காக அதிமுக ஆட்சியில் போராடிய போது அப்போதைய எதிர்க்கட்சி தலைவராக இருந்த மு.க.ஸ்டாலின் களத்திற்கு நேரடியாக வந்து திமுக ஆட்சிக்கு வந்தால் மருத்துவர்களின் ஊதிய பிரச்னை தீர்க்கப்படும் என தெரிவித்தார். ஆனால், தற்பொழுது முதலமைச்சராக பதவி ஏற்ற பின் ஊதிய பிரச்னையை தீர்க்கவில்லை" என குற்றம் சாட்டினர்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
