சென்னை: முல்லைப் பெரியாறு அணை குறித்து பொய் பிரச்சாரம் மேற்கொள்பவர்களை கண்டித்து முன்னாள் முதலமைச்சர் ஓ.பன்னீர்செல்வம் அறிக்கை ஒன்றை வெளியிட்டுள்ளார். அதில், “தென் தமிழக மக்களின் உயிர்நாடியாக விளங்கும் முல்லைப் பெரியாறு அணை இன்றைக்கும் வலுவாக இருப்பதற்கு காரணம், அணை புவி ஈர்ப்பு விசையின் அடிப்படையில் கட்டப்பட்டுள்ளது. பொதுவாக புவி ஈர்ப்பு விசையின் அடிப்படையில் கட்டப்படும் அணைகள் சக்தி வாய்ந்தவை.
இப்படிப்பட்ட புவி ஈர்ப்பு அடிப்படையில் கட்டப்பட்ட முல்லைப் பெரியாறு அணை இன்றளவும் உறுதியாகவும், வலிமை மிக்கதாகவும் விளங்குகிறது. இது மட்டுமல்லாமல் குறுகிய கால திட்டமாக, அணையின் எடையை அதிகரிக்கும் பொருட்டு 21 அடி அகலத்திற்கு, மூன்று அடி பருமன் கொண்ட ஆர்.சி.சி கட்டுமானப் பணி அணையின் முழு நீளத்திற்கு அதன் மேற்பகுதியில் மேற்கொள்ளப்பட்டுள்ளது.
வயநாடு நிலச்சரிவினை ஒப்பிட்டு முல்லைப் பெரியாறு அணை குறித்து விஷமப் பிரச்சாரம் மேற்கொண்டு வரும் சுயநலவாதிகளுக்கு கடும் கண்டனம். pic.twitter.com/tl0zbdVt4H
— O Panneerselvam (@OfficeOfOPS) August 13, 2024
நடுத்தர கால நடவடிக்கையாக, இறுக்கு விசை தொழில்நுட்பத்தின் அடிப்படையில் அணையின் அடித்தளத்துடன் எஃகு கம்பிகள் இழுத்துக் கட்டப்பட்டுள்ளன. நீண்ட கால நடவடிக்கையாக, அணையின் பின்புறத்தில் 10 அடி ஆழம், 32 அடி அகலத்திற்கு தரை மட்டத்திலிருந்து 145 அடி உயரத்திற்கு ஆர்.சி.சி கட்டுமானம் அணையின் தலைப் பகுதியுடன் இணையும் வகையில் மேற்கொள்ளப்பட்டுள்ளது. நவீன தொழில்நுட்பத்தை பயன்படுத்தி, தற்போதுள்ள அணை மற்றும் புதிய கட்டுமானம் ஆகியவை ஒரே அணை போல் செயல்படும் வகையில் வடிவமைக்கப்பட்டு இருக்கிறது.
முல்லை பெரியாறு அணை தொடர்பாக உச்ச நீதிமன்ற தீர்ப்பு வெளிவந்து 10 ஆண்டுகள் கடந்தும், வலுப்படுத்தும் பணிகளை மேற்கொள்ளவிடாமல் கேரள அரசு தடுத்து வருகிறது. இந்த சூழ்நிலையில், தற்போது வயநாட்டில் ஏற்பட்டுள்ள நிலச்சரிவினை ஒப்பிட்டு சில சுயநலவாதிகள் சமூக வலைத்தளங்களில் பொய் பிரச்சாரம் மேற்கொண்டு வருகின்றனர்.
மேலும், முல்லை பெரியாறு அணையில், புதிய அணை கட்டப்பட வேண்டும் என்ற நிலைப்பாடு தொடருவதாக கேரள மாநில முதலமைச்சர் தெரிவித்துள்ளார். முல்லைப் பெரியாறு அணை குறித்து கேரள நாடாளுமன்ற உறுப்பினர்கள் போர்க்கொடி தூக்கியுள்ளனர்.
இடுக்கி மாவட்ட ஆட்சியர் அலுவலகத்தில் நடைபெற்ற திறனாய்வுக் கூட்டத்தில், முல்லைப் பெரியாறு அணை பாதுகாப்பு குறித்து மத்திய அரசுக்கு அழுத்தம் கொடுக்க முடிவு செய்துள்ளதாக கேரள நீர்ப்பாசனத் துறை அமைச்சர் அவர்கள் தெரிவித்து இருக்கிறார். இது குறித்த வழக்கு உச்ச நீதிமன்றத்தில் வழக்கு வர இருப்பதாகவும் கூறப்படுகிறது.
இயற்கை பேரழிவு எங்கு நடந்தாலும், அதனை முல்லைப் பெரியாறு அணையுடன் ஒப்பிட்டு பேசுவதை சிலர் வாடிக்கையாகக் கொண்டிருக்கின்றனர். இதுபோன்ற விஷமப் பிரச்சாரம் கடும் கண்டனத்திற்குரியது. கேரளாவின் இந்த செயல் தமிழக விவசாயிகளை பெரும் கவலை அடைய வைத்துள்ளது.
புவி ஈர்ப்பு விசையின் அடிப்படையில் கட்டப்பட்ட முல்லைப் பெரியாறு அணை வலுவாக இருக்கின்ற நிலையிலும், புதிய அணை கட்டப்பட வேண்டுமென்ற கோரிக்கையை வலுப்படுத்த இதுபோன்ற யுக்திகளை அவ்வப்போது சிலர் மேற்கொள்கின்றனர்.
இதனை எதிர்த்து திமுகவோ அல்லது காங்கிரஸ் கட்சியோ வாய் திறக்காமல் இருப்பது பேரதிர்ச்சியை ஏற்படுத்தியுள்ளது. கச்சத்தீவில் தமிழக மீனவர்களுக்கான உரிமை தாரை வார்க்கப்பட்டது போல், முல்லைப் பெரியாறு அணையில் தமிழக விவசாயிகளுக்குள்ள உரிமையும் காவு கொடுக்கப்பட்டு விடுமோ என்ற அச்சம் தமிழக விவசாயிகளிடையே நிலவுகிறது" என அறிக்கையில் தெரிவித்துள்ளார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க: தேர்தல் வழக்கு; ஆவணங்களில் கையெழுத்திட்டார் ஓ.பன்னீர்செல்வம்! - OPS ELECTION CASE
