சென்னை: சுதந்திரத்திற்காக தனது 25-ஆவது வயதில் இன்னுயிரை ஈந்த சுதந்திரப் போராட்ட வீரர் வாஞ்சிநாதன் குறித்த புத்த வெளியீட்டு விழா, சென்னை முத்தமிழ் மன்றத்தில் நடைபெற்றது. இந்த நிகழ்ச்சியில், தமிழக ஆளுநர் ஆர்.என்.ரவி, மேகாலயா உயர்நீதிமன்ற தலைமை நீதிபதி வைத்தியநாதன் உள்ளிட்டோர் கலந்து கொண்டனர்.
நிகழ்ச்சியில் பேசிய ஆளுநர் ரவி, "நாட்டின் சுதந்திரத்திற்காக தனது 25ஆவது வயதில் தனது இன்னுயிரை ஈர்த்த சுதந்திர போராட்ட வீரர் வாஞ்சிநாதன். இந்த இடத்தில் அவருக்கு என் மரியாதையும் வணக்கத்தையும் தெரிவித்துக்கொள்கிறேன். இந்த நாட்டின் சுதந்திரத்திற்காக பல்வேறு சமூகங்களில் இருந்து வந்தவர்களும் ஒருங்கிணைந்து போராடியுள்ளனர். ஆனால் துயரம் என்னவெனில் அவர்கள் இந்நாட்டிற்காக என்னென்ன தியாகங்களை செய்துள்ளார்கள் என்பதில் பலவும் மறக்கப்பட்டுள்ளது. 1820களில் நம் சமூகத்தில் இருந்த கல்வி முறையில் மாணவர்களுக்கு கட்டணமில்லை.
ஆசிரியர்களுக்கு அவர்கள் வாழ்வதற்கு தேவையான உதவிகள் மட்டுமே சமூகத்தால் செய்து தரப்பட்டன. கல்வி முறை சிறப்பாக இருந்தது. மொழி, இசை, ஓவியம் என பாடங்கள் கற்பிக்கப்பட்டன. பிராமண, சத்திரிய, வைஷ்ணவ, சூத்திர என 4 பிரிவுகள் மட்டுமே இருந்தன.
இதைத் தவிர முஸ்லிம்கள் இருந்தார்கள். ஆனால் சாதி அப்போது இல்லை. சிறப்பாக இருந்த நம் கல்விமுறையை ஆங்கிலேயர்கள் ஆய்வு செய்து திட்டமிட்டு அழித்தார்கள். 20 ஆம் நூற்றாண்டிலிருந்து சுதந்திர போராட்ட வீரர்களின் வாழ்வு திரித்து கூறப்பட்டிருக்கிறது.
எனக்கு ஒரு வாய்ப்பு கிடைத்தால் என் மாநிலத்தின் அனைத்து பல்கலைக்கழக பாடத்திட்டத்திலும் மறைக்கப்பட்ட விடுதலைப் போராட்ட வீரர்களின் வாழ்வை பாடமாக்குவேன். புண்ணியம் என்று கருதப்பட்ட கல்வி கற்பிக்கும் தொழில் வணிகமாக அன்று இல்லை.
பிராமணர்கள் தான் பெரும்பாலும் ஆசிரியர்களாக இருந்தார்கள். பொருளாதாரத்தில் மிகவும் பின் தங்கிய நிலையில் இருந்த இவர்கள் தான் கல்வி கற்றுக் கொடுத்தார்கள். ஆங்கிலேயர்களால் இந்த கல்விமுறை திட்டமிட்டு அழிக்கப்பட்டது" எனத் தெரிவித்தார்.
இதையும் படிங்க: தூய்மை பணியாளர் மகள் டூ நகராட்சி ஆணையர்.. குடும்பத்தின் அடையாளத்தை மாற்ற போராடிய திருவாரூர் பெண்!
