தஞ்சாவூர்: திருமலைசமுத்திரம் பகுதியில் உள்ள சாஸ்த்ரா நிகர்நிலைப் பல்கலைக்கழகத்தில் தொழில்நுட்ப வளர்ச்சி ஊக்கப்படுத்தல் மற்றும் பயிற்சி மையம் (Technology Development Accelerator & Training centre) திறப்பு விழா நேற்று (மார்ச் 5) நடைபெற்றது. இவ்விழாவில், மத்திய கனரக தொழில்கள் துறை அமைச்சர் மகேந்திர நாத் பாண்டே கலந்து கொண்டு பயிற்சி மையத்தை தொடங்கி வைத்தார்.
பின்னர், சாஸ்த்ரா பல்கலைக் கழகத்தின் சார்பில் கண்டுபிடிக்கப்பட்ட ரோபோக்கள், டிரோன் மற்றும் நவீன தேங்காய் உரிக்கும் இயந்திரம் ஆகியவற்றை பார்வையிட்டு, அவற்றின் செயல்பாடுகளை கேட்டறிந்து கொண்டார். இதனைத்தொடர்ந்து நடந்த விழாவில் பங்கேற்று மத்திய அமைச்சர் மகேந்திர நாத் பாண்டே உரையாற்றினார்.
அப்போது பேசிய மத்திய அமைச்சர் மகேந்திர நாத் பாண்டே, "இந்தியாவின் மக்கள்தொகையான 140 கோடியில், இளைஞர்களின் எண்ணிக்கை 63 சதவீதமாக உள்ளது. இளைஞர்கள்தான் இந்த நாட்டில் நீண்ட நாள்களாக வாழக்கூடியவர்கள். எனவே, மாணவர்கள் உள்ளிட்ட இளைஞர்களை நம்பியே இந்தியாவின் எதிர்காலம் உள்ளது. மேலும் "வளர்ந்த பாரதம் 2047" விரிவானத் திட்டம் இளைஞர்களை நம்பிதான் இருக்கிறது.
உலகளாவிய உற்பத்தித் திறனுக்கு இந்திய மூலதனப் பொருள்கள் துறை முக்கியமானதாக உள்ளது. கல்வி நிறுவனங்களும், தொழிலகங்களும் இணைந்து செயல்படுவதற்காக மத்திய கனரக தொழில்கள் துறை நிதி ஒதுக்கீடு செய்துள்ளது. விவசாயத்திற்கு உரம் மற்றும் பூச்சிக்கொல்லி தெளிப்பதற்கு ட்ரோன்கள் பயன்படுத்துவது போல், தற்போது உடல் உறுப்பு கொண்டு செல்வதற்கும் ட்ரோன்கள் கண்டுபிடிக்கப்பட்டுள்ளன" என்று கூறினார்.
அதனைத்தொடர்ந்து, பயிற்சி வகுப்பில் கலந்து கொண்ட மாணவர்களுக்கான சான்றிதழ்களை மத்திய அமைச்சர் மகேந்திரநாத் பாண்டே வழங்கினார். மேலும், இந்த நிகழ்ச்சியில் கனரக தொழில்கள் அமைச்சக இணை செயலாளர் விஜய் மிட்டல், சாஸ்த்ரா பல்கலைக்கழக துணைவேந்தர் வைத்திய சுப்பிரமணியம், கல்லூரி பேராசிரியர்கள், மாணவர்கள் என ஏராளமானோர் கலந்து கொண்டனர்.
இதையும் படிங்க: கல்பாக்கத்தில் ஈனுலை.. பிரதமர் மோடி விழாவை முதல்வர் புறக்கணித்தது ஏன்.. அறிவியலா? அரசியலா?
