சென்னை: தீபாவளி விடுமுறை முடிந்து சொந்த ஊர்களில் இருந்து மக்கள் அதிகமானோர் சென்னைக்கு திரும்பும் சூழலில், மதுரை, தூத்துக்குடி, திருச்சி, கோவை, சேலம் ஆகிய இடங்களில் இருந்து சென்னைக்கு வரும் விமான கட்டணங்கள் அதிகரித்துள்ளது. ஆனால், சென்னையில் இருந்து இந்த பகுதிகளுக்கு செல்லும் விமானங்களில் இன்று கட்டணங்கள் குறைவாக உள்ளது.
தீபாவளி மற்றும் அதனையொட்டி தொடர்ச்சியாக 4 நாட்கள் விடுமுறைகள் வந்ததால், சென்னை மற்றும் புறநகர் பகுதிகளில் வசிக்கும் சுமார் பத்து லட்சத்திற்கும் அதிகமான மக்கள் தங்கள் சொந்த ஊர்களுக்கு புறப்பட்டு சென்றனர். இந்த நிலையில் இன்று (திங்கள் கிழமை) விடுமுறை முடிந்து கல்வி நிறுவனங்கள், அலுவலகங்கள், தொழிற் கூடங்கள் வேலை நாட்களாக தொடங்குவதால், சொந்த ஊருக்கு சென்றிருந்த மக்கள் ஒட்டு மொத்தமாக நேற்று மாலையில் இருந்து சென்னைக்கு திரும்பி கொண்டு இருக்கின்றனர்.
அரசு பேருந்துகள், தனியார் ஆம்னி பேருந்துகள், ரயில்கள், கார்களில் சென்னைக்குத் திரும்பி வந்து கொண்டு இருக்கின்றனர். அதோடு பெரும்பாலானோர் விமானங்களில் நேற்று இரவில் இருந்து தற்போதுவரை சென்னைக்கு வந்துகொண்டு இருக்கின்றனர்.
இதையும் படிங்க: தீபாவளி விடுமுறை முடிந்து சென்னைக்கு திரும்பிய மக்கள்.. ஸ்தம்பித்துப் போன சாலைகள்!
இதனால் சென்னை விமான நிலையத்திலும் வருகை பகுதியில் பயணிகள் கூட்டம் அதிகரித்து உள்ளது. ஆனால், சென்னையில் இருந்து வெளியூர்களுக்கு செல்லும் விமானங்களில் பயணிகள் கூட்டம் அதிகளவில் இல்லை .இதனால் சென்னையில் இருந்து வெளியூர்களுக்கு செல்லும் விமானங்களில் கட்டணங்கள் குறைவாகவும் அதே நேரத்தில் வெளியூர்களில் இருந்து சென்னைக்கு வரும் விமானங்களில் அதிகமான கட்டணங்களையும் பயணிகளிடம் வசூலிக்கப்பட்டு வருகிறது.
கட்டண விவரம்
மதுரையிலிருந்து சென்னை வருவதற்கு இன்று விமானத்தில் ரூ.10,119 வரை கட்டணம் வசூலிக்கப்படுகிறது. ஆனால், சென்னையில் இருந்து மதுரை செல்வதற்கு விமான கட்டணம் ரூ.4,260 மட்டுமே கட்டணமாக வசூலிக்கப்படுகிறது. அதைப்போல் தூத்துக்குடியில் இருந்து சென்னை வருவதற்கு இன்று விமான கட்டணம் ரூ.11,925. ஆனால், சென்னையில் இருந்து தூத்துக்குடி செல்வதற்கு விமான கட்டணம் ரூ. 6,771 மட்டுமே கட்டணமாக வசூலிக்கப்படுகிறது.
திருச்சி - சென்னை, விமான கட்டணம் ரூ.11,109 ஆகவும், சென்னை- திருச்சி இன்று விமான கட்டணம் ரூ.5,796 மட்டுமே கட்டணமாக வசூலிக்கப்படுகிறது. கோவை- சென்னை, விமான கட்டணம் ரூ.10,179 ஆகவும், சென்னை- கோவை விமான கட்டணம் ரூ. 4,466 மட்டுமே வசூலிக்கப்படுகிறது. சேலம்- சென்னை, விமான கட்டணம் ரூ.9,516 ஆகவும் சென்னை- சேலம் விமான கட்டணம் ரூ.4,647 மட்டுமே வசூலிக்கப்படுகிறது.
மேலும், சென்னையில் இருந்து வெளியூர்களுக்கு புறப்பட்டு செல்லும் விமானங்களில் பயணிகள் கூட்டம் மிகக்குறைவாக உள்ளது. அதே நேரத்தில் வெளியூர்களில் இருந்து சென்னை வரும் பயணிகள் விமானத்தில் பயணிகள் கூட்டம் அதிக அளவில் உள்ளது. எனவே, விமான கட்டணம் அதிகரிக்க நிர்பந்தம் ஏற்பட்டுள்ளது. மேலும், ஓரிரு நாட்களில் மீண்டும் கட்டணம் இயல்பு நிலைக்கு திரும்பும் எனவும் விமான நிறுவன அதிகாரிகள் தரப்பில் தெரிவிக்கின்றனர்.
திடீரென விமான நிறுவனங்கள் அதிக அளவில் கட்டணம் வசூலிப்பதால் பயணிகளிடையே அதிர்ச்சியை ஏற்படுத்தி உள்ளது.
ஈடிவி பாரத் தமிழ்நாடு வாட்ஸ் சேனல் மூலம் செய்திகளை உடனுக்குடன் அறிய இங்கே க்ளிக் செய்யவும்
