கோயம்புத்தூர்: சவுக்கு சங்கர் சமீபத்தில் யூடியுப் சேனல் ஒன்றிக்கு அளித்த பேட்டியில், காவல்துறை அதிகாரிகள் குறித்தும், பெண் காவலர்கள் குறித்தும் அவதூறான கருத்துக்களைத் கூறியதாக சைபர் கிரைம் உதவி ஆய்வாளர் சுகன்யா அளித்த புகாரின் பேரில் சைபர் கிரைம் போலீசார் சவுக்கு சங்கரை சுமார் 5 பிரிவுகளின் கீழ் வழக்குப்பதிவு செய்து கைது செய்தனர்.
கடந்த சனிக்கிழமை சவுக்கு சங்கரை கைது செய்த கோவை சைபர் கிரைம் போலீசார், அவரை கோவை மத்திய சிறையில் அடைத்தனர். இந்நிலையில், சவுக்கு சங்கர் தரப்பு வழக்கறிஞர் கோபாலகிருஷ்ணன் நேற்று செய்தியாளர்களைச் சந்தித்துப் பேசினார்.
அப்போது பேசிய அவர், "கைது செய்யப்பட்ட சவுக்கு சங்கரை சனிக்கிழமை சிறையில் அடைக்கும் போது, அவருக்கு ஆபத்து உள்ளதாகவும்; ஆகையால், அவரை முழுமையாகப் பரிசோதனை செய்ய வேண்டும் என்று மனு தாக்கல் செய்தோம். அதன்படி, அவருக்கு மருத்துவப் பரிசோதனை செய்யப்பட்ட பிறகே சிறையில் அடைக்கப்பட்டார். ஆனால், இந்த வழக்கு குறித்து அவரைச் சந்திப்பதற்காக சிறைக்குச் சென்று பார்த்த பொழுது அதிர்ச்சியாக இருந்தது.
சிறையில் மருத்துவப் பரிசோதனை செய்த பிறகு சவுக்கு சங்கரை ஒரு அறையில் அடைத்து, கண்களைக் கட்டி பத்துக்கும் மேற்பட்ட வார்டன்கள் பிளாஸ்டிக் பைப்களில் துணியைக் கட்டி அடித்துள்ளதாகவும், அதில் அவருக்கு வலது கையில் முறிவு ஏற்பட்டதாகவும் கூறினார். ஆனால், தற்போது வரை எலும்பு முறிவு ஏற்பட்ட கைக்கு 'எக்ஸ்ரே' உள்ளிட்ட எந்த ஒரு சோதனைகளும் எடுக்கப்படவில்லை. அவருடைய விருப்பத்திற்கு மாறாக 'வலி நிவாரணி' மாத்திரைகளை மட்டுமே உட்கொள்ளக் கூறுவதாகவும் தெரிவித்தார்.
ஆகவே, சவுக்கு சங்கர் வலி நிவாரணி மாத்திரைகளை அதிகமாக உட்கொண்டால் உடல்நல பாதிப்புகள் ஏற்பட வாய்ப்புகள் இருப்பதாகவும் தெரிவித்தார். இந்த நிலையில், அவரை மருத்துவ பரிசோதனைக்கு உட்படுத்த அனுமதி அளிக்க வேண்டும் எனவும், அல்லது தனியார் மருத்துவமனைக்கு அழைத்துச் செல்ல அனுமதிக்க வேண்டும் எனவும் நீதிபதியிடம் மனு அளித்துள்ளோம்.
தற்போது, சவுக்கு சங்கர் அந்த யூடியூப்பிற்கு பேட்டி அளித்தது சரியா..? தவறா..? என்பதை நீதிமன்றம்தான் முடிவு செய்யும். ஆனால், இங்கு மனித உரிமை மீறல்கள் அதிகமாக நடைபெற்று வருகிறது. மேலும், தமிழ்நாடு தற்பொழுது காவல்துறை மாநிலமாக மாறி வருகிறது. போலீசார் நினைத்தால் யாரை எது வேண்டுமானாலும் செய்யலாம் என்ற நிலைக்குச் சென்று கொண்டிருக்கிறது.
யார் ஒருவர் இந்த அரசுக்கு எதிராகவும், அரசின் அமைப்பிற்கு எதிராகவும் பேசினால், அவருடைய மனித உரிமைகள் மீறப்படுகிறது. சிறையில் இவருக்கு நடக்கும் கொடுமைகளை சாட்சியாகக் கூறுவதற்கு சக கைதிகள் கூட தயாராக உள்ளனர். ஆகையால், இதுகுறித்து உயர் நீதிமன்றத்தில் வழக்குத் தொடர உள்ளோம்.
தற்பொழுது கோவை சிறை கண்காணிப்பாளராக இருக்கக்கூடிய செந்தில்குமார் கடலூர் சிறையில் கண்காணிப்பாளராக இருந்தபோது, அவர் மீது வழக்குத் தொடர்ந்தது சவுக்கு சங்கர் என்ற நிலையில், வேண்டுமென்றே கோவையில் வழக்குப்பதிவு செய்து செந்தில்குமாரிடம் சவுக்கு சங்கரை விட வேண்டும், செந்தில்குமார் சவுக்கு சங்கரை கொடுமைப்படுத்த வேண்டும் என்ற எண்ணத்தில் கூட இதனை செய்திருக்கலாம் என்று சவுக்கு சங்கர் எண்ணுவதாகக் கூறியுள்ளார்.
கோவை சிறையில் சவுக்கு சங்கர் உயிருக்கு ஆபத்து உள்ளது. சவுக்கு சங்கரை சிறையில் மெண்டல் பிளாக் என்று சொல்லக்கூடிய இடத்தில் அடைத்து வைத்திருப்பதாகவும் தெரிவித்தார். எனவே, இதுகுறித்து உயர் நீதிமன்றத்தை நாங்கள் நாட உள்ளோம்" எனத் தெரிவித்தார்.
இதையும் படிங்க: நீலகிரியில் அமலுக்கு வந்ததது இ-பாஸ் நடைமுறை!
