சென்னை: தமிழ்நாடு முழுவதும் இன்று (அக்.31) தீபாவளி பண்டிகை வெகு விமரிசையாகக் கொண்டாடப்பட்டு வருகிறது. மக்கள் அனைவரும் புத்தாடை உடுத்தியும், பட்டாசு வெடித்தும் தங்களது மகிழ்ச்சியை வெளிப்படுத்தி வருகின்றனர். மேலும், அரசியல் தலைவர்கள், திரைப்பிரபலங்கள் என பலரும் தங்களது வாழ்த்துக்களை சமூக ஊடகங்களில் தெரிவித்து வருகின்றனர்.
இந்த நிலையில் நடிகர் ரஜினிகாந்த் தனது இல்லத்தின் முன்பு குவிந்த ரசிகர்களைச் சந்தித்து அவர்களுக்கு தீபாவளி வாழ்த்துக்கள் தெரிவித்தார். அங்கு திரண்டு வந்த ரசிகர்களுக்கு தனது கைகளை அசைத்து தனது வாழ்த்துக்களைப் பரிமாறிக் கொண்டார்.
இதையும் படிங்க: அமரன் படக்குழுவை பாராட்டிய முதலமைச்சர் - மகிழ்ச்சியை பகிர்ந்துகொண்ட சிவகார்த்திகேயன்
அனைத்து பண்டிகைகளுக்கும் ரஜினியின் ரசிகர்கள் வீட்டின் முன் வந்து அவரைக் கண்டு செல்வது வழக்கம். அந்த வகையில், தீபாவளியான இன்று சென்னை போயஸ் கார்டன் பகுதியில் உள்ள அவரின் இல்லத்திற்கு வருகை தந்து அதிகாலை முதல் அவரை காணக் காத்துக் கிடந்தனர். அதைத் தொடர்ந்து காலை 9.30 மணி அளவில் நடிகர் ரஜினிகாந்த் வீட்டிலிருந்து வெளியே வந்து ரசிகர்களைப் பார்த்து வீட்டில் இருந்தபடி கையசைத்து, தீபாவளி வாழ்த்துக்களைப் பகிர்ந்து கொண்டார். ரசிகர்கள் ரஜினியைப் பார்த்தவுடன் தலைவா தலைவா என கோஷம் எழுப்பி ஆராவாரம் செய்தனர்.
பின்னர் செய்தியாளர்களிடம் பேசிய நடிகர் ரஜினிகாந்த் கூறியதாவது, "அனைவருக்கும் தீபாவளி வாழ்த்துகள். அனைவரும் சந்தோஷமாக, மகிழ்ச்சியாக, ஆரோக்கியமாக இருக்க வேண்டும் என்றார். அதைத் தொடர்ந்து, விஜய் மாநாடு குறித்த கேள்விக்கு, விஜய் மாநாடு நிச்சயமாக மிகப்பெரிய வெற்றி அடைந்துள்ளது. அவருக்கு எனது வாழ்த்துகள்" எனத் தெரிவித்தார்.
தற்போது, நடிகர் ரஜினிகாந்த்தின் வேட்டையன் திரைப்படம் வெளியாகி பெரிய அளவில் வரவேற்பைப் பெறாத நிலையில், தற்போது லோகேஷ் கனகராஜ் இயக்கத்தில் நடித்து வரும் கூலி படத்திற்கு, ரசிகர்கள் மத்தியில் மிகுந்த எதிர்பார்ப்பு எழுந்துள்ளது.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
