ஆன்டிக்வா: ஆன்டிக்வாவில் நடைபெற்ற டி20 உலகக் கோப்பை சூப்பர் 8 சுற்று போட்டியில் மேற்கிந்திய தீவுகள், தென் ஆப்பிரிக்கா அணிகள் மோதின. டாஸ் வென்ற தென் ஆப்பிரிக்கா அணி பவுலிங் தேர்வு செய்தது. இரு அணிகளுக்கும் வாழ்வா சாவா போட்டி என்பதால் ரசிகர்கள் பெரும் எதிர்பார்ப்புடன் இருந்தனர்.
வெஸ்ட் இண்டீஸ் அணிக்கு ஆரம்பமே அதிர்ச்சியாக அமைந்தது. ஜான்சென் வீசிய முதல் ஓவரில் ஹோப் டக் அவுட்டானார். அடுத்த ஓவரில் அதிரடி வீரர் பூரன், சிக்ஸ் அடிக்க ஆசைப்பட்டு மார்க்ரம் பந்தில் 1 ரன்னுக்கு அவுட்டானார். இதனைதொடர்ந்து ஜோடி சேர்ந்த மேயர்ஸ், சேஸ் ஜோடி பொறுமையாக ஆடியது.
சேஸ் ஒரு ரன் எடுத்திருந்த போது, நார்க்கியா கேட்ச்சை தவறவிட்டார். பின்னர் கண்டம் தப்பிய சேஸ் அதிரடியாக ஆடினார். மேயர்ஸ் 35 ரன்கள் எடுத்திருந்த நிலையில், ஷம்சி பந்தில் அவுட்டானார். பின்னர் களமிறங்கிய பவல் (1), ரூதர்ஃபோர்டு (0) அடுத்தடுத்து அவுட்டாக, வெஸ்ட் இண்டீஸ் 94 ரன்களுக்கு 5 விக்கெட்டுகள் இழந்து ஆட்டம் கண்டது. பின்னர் களமிறங்கிய வீரர்கள் ரஸல் (15), ஹொசின்(6) சொற்ப ரன்களுக்கு அவுட்டாக, சேஸ் 52 ரன்களுக்கு வெளியேறினார். இறுதியில் வெஸ்ட் இண்டீஸ் அணி 20 ஓவர்கள் முடிவில் 135 ரன்கள் எடுத்தது.
எளிதான இலக்கை விரட்டிய தென் ஆப்பிரிக்கா அணிக்கு டி காக் அதிரடியான தொடக்கம் கொடுத்தார். முதல் ஓவரில் டி காக் 3 பவுண்டரிகள் அடித்த நிலையில், ஹெண்டிரிக்ஸ் டக் அவுட்டானார். அவரை தொடர்ந்து டி காக் 12 ரன்களுக்கு அவுட்டானார். இந்நிலையில் மழை குறுக்கிட்டது.
