"இந்திய கிரிக்கெட்டில் உங்களுக்கு என்ன வேலை?"முன்னாள் வீரரை விளாசிய கம்பீர்! யார் தெரியுமா?

விராட் கோலியின் பார்ம் குறித்து கேள்வி எழுப்பிய ஆஸ்திரேலிய முன்னாள் வீரர் ரிக்கி பாண்டிங்கிற்கு இந்திய அணியின் பயிற்சியாளர் கவுதம் கம்பீர் பதில் கொடுத்துள்ளார்.

ஐதராபாத்: நியூசிலாந்து அணிக்கு எதிரான டெஸ்ட் தொடரில் இந்திய அணியின் சீனியர் வீரர் விராட் கோலியின் ஆட்டம் அதிருப்தி அளிக்கும் வகையில் இருந்தது. மொத்தம் உள்ள 6 இன்னிங்ஸ்களில் அவர் ஒரு அரை சதம் மட்டுமே அடித்து இருந்தார். இதனால் ரசிகர்கள் தொடங்கி சீனியர் வீரர்கள், முன்னாள் வீரர்கள் என பலரும் கடும் விமர்சனங்களை தெரிவித்து இருந்தனர்.

இந்நிலையில், ஆஸ்திரேலிய அணியின் முன்னாள் கேப்டன் ரிக்கி பாண்டிங்கும், விராட் கோலியின் பார்ம் குறித்து கருத்து தெரிவித்து இருந்தார். இதனிடையே பத்திரிக்கையாளர் சந்திப்பில் அது குறித்த கேள்விக்கு பதில் அளித்த கவுதம் கம்பீர், "பாண்டிங்கிற்கு இந்திய கிரிக்கெட்டில் என்ன வேலை என கேள்வி எழுப்பினார்.

விராட் கோலி மற்றும் ரோகித் சர்மாவை பற்றி எந்த கவலையும் இல்லை. இந்திய கிரிக்கெட்டில் பாண்டிங்கிற்கு என்ன வேலை உள்ளது, அவர் ஆஸ்திரேலிய கிரிக்கெட்டை பார்த்துக் கொள்ளட்டும். ரோகித் சர்மா மற்றும் விராட் கோலி நல்ல நிலையில் உள்ளனர். அவர்கள், ஏற்கனவே தங்களை நிரூபித்து விட்டனர். அவர்களிடம் ரன் குவிக்க வேண்டும் என்ற வேட்கை உள்ளது. கடந்த தொடரில் அதுதான் நடந்தது" என்று தெரிவித்தார்.

இந்திய அணி ஆஸ்திரேலியாவில் சுற்றுப்பயணம் மேற்கொண்டு ஐந்து போட்டிகள் கொண்ட டெஸ்ட் கிரிக்கெட் தொடரில் விளையாட உள்ளது. இதற்காக இந்திய அணி வீரர்கள் 10 நாட்களுக்கு முன்பே ஆஸ்திரேலியாவுக்கு சென்றுள்ளனர். அங்குள்ள சீதோஷண நிலை மற்றும் மைதான புரிதல் உள்ளிட்ட காரணங்களுக்கு முன்கூட்டியே இந்திய வீரர்கள் அங்கு பயணித்துள்ளனர்.

எப்போதும் கிரிக்கெட் தொடருக்கு முன்பாக ஆஸ்திரேலிய வீரர்கள் இந்திய வீரர்களை சீண்டுவதை வழக்கமாக கொண்டுள்ளனர். இதற்கு முந்தைய ஆஸ்திரேலிய சுற்றுப்பயணங்களின் போதும் இந்திய அணி முன்னாள் ஆஸ்திரேலிய வீரர்கள் மற்றும் ஆஸ்திரேலிய ஊடகங்களின் மறைமுக தாக்குதலை சந்தித்து உள்ளது.

அந்த வகையில் இந்தியா - ஆஸ்திரேலியா டெஸ்ட் தொடருக்கு முன் விராட் கோலியின் பார்ம் குறித்து ரிக்கி பாண்டிங் பேசி இருந்தார். அப்போது கடந்த ஐந்து ஆண்டுகளில் டெஸ்ட் போட்டிகளில் விராட் கோலி இரண்டு சதங்கள் மட்டுமே அடித்து இருப்பதாகவும், வேறு எந்த அணியின் டாப் ஆர்டர் வீரர் நீண்ட காலமாக சதம் அடிக்காமல் இருந்தால் அணியில் நீடித்து இருக்க முடியாது எனவும் ரிக்கி பாண்டிங் பேசி இருந்தார்.

நியூசிலாந்து அணிக்கு எதிரான 3 போட்டிகள் கொண்ட டெஸ்ட் தொடரில் 6 இன்னிங்ஸ்களில் விராட் கோலி ஒரு அரை சதம் உள்பட 93 ரன்களும், ரோகித் சர்மா 91 ரன்களும் எடுத்து இருந்தனர் என்பது குறிப்பிடத்தக்கது. மேலும் ஆஸ்திரேலியாவுக்கு எதிரான முதலாவது டெஸ்ட் போட்டியில் ரோகித் சர்மா விளையாடாத பட்சத்தில் அணியை ஜஸ்பிரீத் பும்ரா வழிநடத்திச் செல்வார் என கவுதம் கம்பீர் கூறினார்.

இதையும் படிங்க: பெண்ணாக மாறிய கிரிக்கெட் வீரரின் மகன்! ஹார்மோன் சிகிச்சை என்றால் என்ன?