சென்னை: காதலர்களானாலும் சரி, கணவன் மனைவி ஆனாலும் சரி என்றும் அன்பை மட்டும் பொழிந்துகொண்டு கொஞ்சலும், காதலுமாக மட்டும் இருக்க மாட்டார்கள். அவ்வப்போது சண்டை கோழிபோல் சாடிக்கொள்வார்கள். அப்படி இருந்தாலும், "தள்ளிப்போகாதே எனையும் தள்ளிப்போகச் சொல்லாதே" என்ற அளவுக்குக் காதல் கொள்ள வேண்டுமா?
வேலைகளுக்கு நடுவே எப்படி காதல் செய்வது இதற்கு ஒரு சண்டை... எனக்கு மட்டும் முக்கியத்துவம் இல்லை அதற்கு ஒரு சண்டை.. எல்லா வேலைகளையும் நான்தான் செய்ய வேண்டுமா இப்படியும் சண்டை.. ஆனால் இவை அனைத்தும் இல்லாமல் துணையுடனான வாழ்க்கை எப்படி நிறைவு பெறும் என்கிறார்கள் நிபுணர்கள். என்னதான் நடந்தாலும் நம்மை விட்டுப்போகாத துணை நம்முடனே இருப்பதற்கு என்ன செய்ய வேண்டும் என்பதைப் பார்க்கலாம்.
1. உங்கள் துணையுடன் இரவின் அமைதியையும் அழகையும் இரசிக்க ஒரு நாளை ஒதுக்கி வையுங்கள்
- இரவில் ஒரு பைக் ரைடு
- கேண்டில் லைட் டின்னர்
- மொட்டை மாடி நிலாச் சோறு
- கடற்கரை பயணம்
- பால்கனியில் அமர்ந்து கதைபேசுவது
இப்படி இன்னும் பல சொல்லிக்கொண்டே போகலாம். உங்கள் உறவை வலுப்படுத்த அந்த இரவை எவ்வளவு அழகாக இயலுமோ அதற்காக முயலுங்கள் என்கிறார்கள் நிபுணர்கள்.
2. புதிய பயணங்களைத் திட்டமிடுங்கள்
- உறவினர் அல்லது நண்பர்கள் வீட்டிற்குச் செல்வது
- உங்கள் பட்ஜெட்டில் சுற்றுலாத் தலம் செல்வது
- பார்க் அல்லது ஷாப்பிங் போவது
- புதிய உணவகத்தைத் தேர்வு செய்து உட்கொள்வது
இப்படி உங்கள் வீட்டை விட்டு வெளியே வந்து புதிய புதிய விஷயங்களை இருவருமாகச் சேர்ந்து ரசிப்பது என்பது மிகவும் சிறந்தது. இதற்கு நீங்கள் அதீத பணம் செலவழிக்க வேண்டும் என்ற அவசியம் இல்லை. உங்களால் முடிந்த வகையில் புதிய மகிழ்ச்சியைப் பெறுங்கள்.
3. இருவருமாக உடற்பயிற்சி மேற்கொள்ளுங்கள்
- தோட்டத்தையும், வீட்டையும் சுத்தம் செய்யுங்கள்
- சமையலறையில் உங்களுக்குப் பிடித்த பாடலுக்கு நடனமாடுங்கள்
- ஒன்றாக யோகா மற்றும் உடற்பயிற்சி மேற்கொள்ளுங்கள்
- ஒருவருக்கொருவர் ஆரோக்கியம் சார்ந்த விஷயங்கள் குறித்து உரையாடுங்கள்
இது உங்கள் இருவருக்கும் இடையேயான புரிதலை மேம்படுத்தவும், ஒருவர் மற்றொருவருக்கு ஆலோசனை வழங்கி ஆரோக்கியத்தில் கவனம் செலுத்தவும் உதவியாக இருக்கும். அது மட்டும் இன்றி உங்களது பாலியல் உறவிலும் சுறுசுறுப்பை ஏற்படுத்தும் என நிபுணர்கள் கூறுகின்றனர்.
4. ஒன்றாக இணைந்து புதிய விஷயங்களை மேற்கொள்ளுதல்
- புத்தகம் படித்துக் கதை சொல்லுதல்
- ஒருவருடைய திறமையை வெளிக்கொணர மற்றொருவர் முயற்சித்தல்
- இருவரின் அறையை அடிக்கடி மாற்றி அமைத்து அழகு பார்த்தல்
- எதையாவது தேடி எங்காவது சென்று புதிய விஷயங்களைக் கற்றுக்கொள்ளுதல்
- ஒருவருக்கொருவர் பிடித்தமான உணவைச் சமைத்துப் பகிர்தல்
5. உடல் மற்றும் மனம் இரண்டிற்கும் சேர்த்து இருவருமாக ஓய்வு எடுத்தல்
- ஆரோக்கியமான கேம்களை விளையாடுங்கள்
- ஆடியோ கதைகள் மற்றும் பாடல்களைக் கேளுங்கள்
- மசாஜ் சென்டருக்கு இருவருமாகச் சென்று வாருங்கள்
- போர்வைக்குள் பதுங்கி இரகசியம் பேசுங்கள்
- இருவருமாக அமைதியில் ஒரு தேநீர் பருகுங்கள்
ஓய்வு என்பது ஒருவருக்கு மட்டும் அல்ல இருவருக்குமானது. ஒருவர் மற்றொருவரிடம் ஓய்வு எடுக்க அழைப்பு விடுங்கள். அமைதியாக உங்கள் விருப்பங்கள் மற்றும் சம்பவங்கள், செய்திகள் குறித்து எதையேனும் பேசி நேரத்தை நிரப்புங்கள்.
6. இவை அனைத்தும் கடந்து வயதாகும்போது நீங்கள் என்ன செய்ய வேண்டும் தெரியுமா?
இருவருக்கும் இடையேயான உன்னதமான உறவில் அதீத கவனம் செலுத்துங்கள். சில நேரம் நமது துணையை மிகச் சாதாரணமாக நினைத்துக்கொள்கிறோம். நமது அன்றாட வாழ்வின் சிக்கல் மிக்க சூழ்நிலைகளுக்கு இடையே துணையை மறந்து போகிறோம். ஆனால் இது மிகவும் தவறான செயல் என நிபுணர்கள் கூறுகின்றனர்.
நீங்கள் இருவருமாகக் கட்டி எழுப்பிய உங்கள் வரலாற்றின் பக்கங்களை உணர்ந்து ஒருவருக்கொருவர் பாராட்டிக்கொள்ளுங்கள். உங்கள் புகைப்பட ஆல்பங்களை புரட்டிப்பொட்டு அதன் பின்னால் இருக்கும் இனிமையான சம்பவங்களை நினைவு கூறுங்கள்.
உங்கள் திருமணம் அல்லது காதலை வெளிப்படுத்திய நாளை உறவினர்கள் நண்பர்களுடன் கொண்டாடுங்கள். உங்கள் ஒட்டுமொத்த வாழ்நாளில் நீங்கள் வாழும் ஒவ்வொரு நொடியையும் மகிழ்ச்சியின் மடல்களாக மாற்ற இப்போதே இருவருக்கும் இடையேயான அன்பைப் புதுப்பித்துக்கொள்ளுங்கள்.
இதையும் படிங்க: அந்த விஷயத்தில் இந்தியர்கள் எப்படி? உலக அளவில் வெளியான ஆய்வின் முடிவுகள்..! - Indians Are The Least Promiscuous
