வாயுத்தொல்லையா? அப்போ மறந்து கூட இதை சாப்பிடாதீங்க! - FOOD CAUSES GAS TROUBLE

FOOD CAUSES GAS TROUBLE: நாம் சாப்பிடும் பழங்களிலுள்ள பிரக்டோஸ் (fructose), பால் பொருட்களில் உள்ள லாக்டோஸ் (lactose) கூட வாய்வுத் தொல்லையை ஏற்படுத்தும் என்று உங்களுக்கு தெரியுமா? அப்படி என்ன உணவைச் சாப்பிட்டால் வாயுத் தொல்லை நீங்கும் என்பதை பற்றி இந்த செய்தித் தொகுப்பில் காணலாம்.

சென்னை: செரிமானத்தில் கோளாறு உண்டாகும் போது அல்லது அமிலங்கள் அதிகளவு உடம்பில் சுரக்கும்போது காற்று அதிகமாக உடலில் உருவாகி வாயுத் தொல்லையாக உருவெடுக்கிறது. மருத்துவக் காரணங்களால் வாயுத் தொல்லை ஏற்படுகிறதென்றாலும், நாம் உட்கொள்ளும் உணவே வாயுத்தொல்லைக்கு முக்கிய காரணியாக அமைகிறது.

பழங்களில் உள்ள பிரக்டோஸை அதிகமாக உட்கொண்டால் வாயுத்தொல்லை அதிகமாகும் என அமெரிக்காவின் NIH மருத்துவ பத்திரிகை தகவல் வெளியிட்டுள்ளது. அடிக்கடி சூயிங் கம் மெல்லுவது, குளிர்பானம் குடிப்பது, அதிலும் குறிப்பாக, ஸ்ட்ரா பயன்படுத்தி பானங்கள் அருந்துவது போன்றவற்றை தவிர்க்க வேண்டும். அவசர அவசரமாக உணவு அருந்தாமல், அமர்ந்து உணவு உட்கொள்வது.

மொத்தமாக ஒரே நேரத்தில் உணவு உட்கொள்வதை தவிர்த்து, அவ்வப்போது கொஞ்சம் கொஞ்சமாக சாப்பிடுவது வாயுத் தொல்லைகளை நீக்க உதவுகிறது. குறிப்பாக, கார்போஹைட்ரேட் உணவுப் பொருட்களை அதிகமாக சாப்பிடுவதால் எளிதில் செரிமானம் நடைபெறாமல் சிலருக்கு வாயுத் தொல்லை பிரச்னை அதிகமாக காணப்படுகிறது. இந்த கார்போஹைட்ரேட் உணவுப் பொருட்கள் பெரிய குடலை அடையும் போது, ​​பாக்டீரியாக்கள் அவற்றை உடைத்து, வாயுவை உருவாக்குகின்றன.

வாயுத் தொல்லை தரும் உணவுகள்: ஆப்பிள், பேரிக்காய், காலிஃபிளவர், ப்ரக்கோலி, பட்டானி, பீன்ஸ், பருப்பு வகைகள், பால், ஐஸ்கீரிம்,தயிர்,கோதுமை. அதிகபடியாக பிரக்டோஸ் (fructose) உள்ளடக்கிய பழச்சாறுகள், குளிர்பாணங்கள் போன்றவற்றை தவிர்ப்பது நல்லது. சிலர் அதிக நார்ச்சத்து (Fiber rich foods) உட்கொள்ளும் போது அதிக வாயு அறிகுறிகளை அனுபவிக்கிறார்கள். அதிக கொழுப்புள்ள உணவுகளை உண்ணும் போது மற்றவர்களுக்கு அதிக வாயு அறிகுறிகள் ஏற்படுகிறது.

வாயுவை குறைக்கும் உணவுகள்: உங்கள் உணவு பழக்கத்திலிருந்து பிரக்டோஸ் மற்றும் லாக்டோஸ் அளவை குறைப்பது அதிக பயனை தருகிறது. அதே போல, கார்போஹைட்ரேட் உணவுகளை குறைவாக உட்கொள்ளும் போது வாயுத் தொல்லைக்கு நிரந்தரத் தீர்வாக அமைகிறது.

ராஜ்மா, கொள்ளுப் பயறு, பாசிப்பயறு, பார்லி, ஓட்ஸ் மற்றும் பீட்ரூட் ஆகியவற்றை நிபுணர்கள் பரிந்துரைக்கின்றனர். மேலும், கேரட், சிக்கன், மீன், பூசணிக்காய், வேர் காய்கறிகள், சர்க்கரை வள்ளிக்கிழங்கு, சோம்பு, முள்ளங்கி மற்றும் கீரை வகைகள் முதலியவையும் செரிமான அமைப்பை சீர் செய்ய பயன்படுகிறது.

பொறுப்புத் துறப்பு: இங்கு உங்களுக்கு வழங்கப்படும் அனைத்து தகவல்களும், பரிந்துரைகளும் உங்கள் புரிதலுக்காக மட்டுமே. அறிவியல் ஆராய்ச்சி, ஆய்வுகள், மருத்துவம் மற்றும் சுகாதார நிபுணத்துவ ஆலோசனைகளின் அடிப்படையில் இந்தத் தகவலை நாங்கள் வழங்குகிறோம். இவற்றைப் பின்பற்றும் முன் உங்கள் தனிப்பட்ட மருத்துவரின் ஆலோசனையைப் பெறுவது நல்லது என்பதை குறிப்பிடுகிறோம்.