ஹைதராபாத் : கடந்த 2022ம் ஆண்டு ரிச்சர்ட், பிரியங்கா சோப்ரா நடிப்பில் வெளியான இணையத் தொடர் 'சிட்டாடல்' இந்த தொடரின் அடுத்த பாகத்துக்கு "Citadel: Honey Bunny" என தலைப்பிடப்பட்டுள்ளது. 'தி ஃபேமிலி மேன்', 'பர்ஸி' உள்ளிட்ட தொடர்களை இயக்கிய ராஜ் மற்றும் டிகே இந்த தொடரை இயக்கி உள்ளனர்.
இதில், வருண் தவான், சமந்தா ஆகியோர் முக்கிய கதாபாத்திரங்களில் நடித்துள்ளனர். மேலும், கே.கே.மேனன், சிம்ரன், சாகிப் சலீம், சிக்கந்தர் கெர், சோஹம் மஜும்தார், சிவன்கித் பரிஹார் உள்ளிட்ட பலரும் நடித்துள்ளனர். இந்நிலையில், இந்த தொடரின் ட்ரெய்லர் வெளியாகி ரசிகர்கள் மத்தியில் பெரும் வரவேற்பை பெற்று வருகிறது.
ட்ரெய்லரின் தொடக்கத்தில், இங்கே ஒருவரை விட மற்றொருவர் மோசமானவர்கள். அவர் உங்களை வீழ்த்துவாரா? அல்லது நீங்கள் அவரை வீழ்த்த போகிறீர்களா? என்ற டயலாக்வுடன் ட்ரெய்லர் தொடங்குகிறது. இந்த ட்ரெய்லரில் சமந்தாவுக்கு ஒரு பெண் குழந்தை இருக்கிறது. அவரைப் பாதுகாப்பதில் சமந்தா முக்கியத்துவம் காட்டுகிறார்.
#citadelhoneybunny out now 💥💥💥💥#rajdk #russos https://t.co/A4BBXK4p2G
— VarunDhawan (@Varun_dvn) October 15, 2024
இதையும் படிங்க : சிவாஜி கணேசன், பீம்சிங் உன்னத உறவு... பீம்சிங் நூறாவது பிறந்த நாளில் நடிகர் பிரபு புகழாரம்!
பின்னர் அடுத்தடுத்து காட்சிகளில் துப்பாக்கியுடன் ஆக்சனில் சமந்தா மிரட்டுகிறார். ட்ரெய்லரின் நடுவில், தன் மகளிடம், நான் ஏஜென்டாக இருந்தேன் என்ற உண்மையை உடைக்கிறார் சமந்தா. அதற்கு சமந்தா மகள் ஜேம்ஸ் பாண்டை போலவா? என்று கேட்கிறார்.
அடுத்த காட்சியில், திரைப்படத்தின் ஆடிஷனில் கலந்து கொள்கிறார். ஒரு கட்டத்தில் அவருடன் வருண் தவான் இணைகிறார். இருவரும் காதலிப்பது போல காட்டப்படுகிறது. இப்படி காதல், ரகசிய ஏஜென்ட், ஆக்சன் என விறுவிறுப்பாக நகரும் ட்ரெய்லர் கதைக்களம் குறித்து கணிக்க முடியாத வகையில் இருப்பதாக ரசிகர்கள் தெரிவிக்கின்றனர்.
கே.கே.மேனனின் இன்ட்ரோவும், சிம்ரனின் என்ட்ரியும் கவனிக்க தக்கது. மொத்ததில் ட்ரெய்லரில் லேடி ஜேம்ஸ் பாண்டாக கலக்குகிறார் சமந்தா. இந்த இணையத் தொடர் வரும் நவ 7ம் தேதி அமேசான் ப்ரைம் ஓடிடி தளத்தில் வெளியாக உள்ளது.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
