சென்னை: நடிகர் சூர்யா மலையாள இயக்குநர் பசில் ஜோசஃப் இயக்கத்தில் நடிக்கப் போவதாக தகவல் வெளியாகியுள்ளது. பிரபல நடிகர் சூர்யா தற்போது கார்த்திக் சுப்புராஜ் இயக்கத்தில் ’ரெட்ரோ’ (Retro) படத்தில் நடித்துள்ளார். சந்தோஷ் நாராயணன் இசையமைத்துள்ள ரெட்ரோ திரைப்படத்தில் பூஜா ஹெக்டே, குரு சோமசுந்தரம் உள்ளிட்ட பலர் நடித்துள்ளனர். இப்படத்தின் போஸ்ட் புரொடக்ஷன்ஸ் பணிகள் நடைபெற்று வரும் நிலையில், வரும் மே 1ஆம் தேதி திரையரங்குகளில் வெளியாகிறது.
முன்னதாக கடந்த நவம்பர் மாதம் வெளியான ’கங்குவா’ திரைப்படம் கடுமையான விமர்சனங்களை சந்தித்தது. இந்நிலையில் ரெட்ரோ திரைப்படம் வெற்றி படமாக அமைய வேண்டுமென சூர்யா ரசிகர்கள் எதிர்பார்ப்பில் உள்ளனர். இதனிடையே நடிகர் சூர்யா, ஆர்.ஜே.பாலாஜி இயக்கத்தில் த்ரிஷா உள்ளிட்ட பலருடன் தனது 45வது படத்தில் நடித்து வருகிறார்.
சூர்யா 45 திரைப்படம் இந்த வருடம் அக்டோபர் மாதம் வெளியாகும் என கூறப்படுகிறது. இந்த படங்களை முடித்துக் கொண்டு சூர்யா, ரசிகர்கள் ஆவலுடன் எதிர்பார்த்து காத்துக் கொண்டிருக்கும் வெற்றிமாறன் இயக்கத்தில் ’வாடிவாசல்’ படத்தில் நடிக்கவுள்ளார். இப்படத்தின் ஆரம்பக் கட்ட பணிகள் முழுவீச்சில் நடைபெற்று வருகிறது.
வாடிவாசல் படத்தில் ஜல்லிக்கட்டு காளைகள் சம்பந்தப்பட்ட கிராஃபிக்ஸ் காட்சிகள் முக்கியத்துவம் வாய்ந்ததாக இருக்கும் என கருதப்படுகிறது. அதற்கான பணிகளும் மும்முரமாக நடைபெற்று வருகிறது. இதனைத்தொடர்ந்து நடிகர் சூர்யா தனது 47வது படத்தில் பிரபல மலையாள இயக்குநரும், நடிகருமான பசில் ஜோசஃப் இயக்கத்தில் நடிக்கப் போவதாக தகவல் வெளியாகியுள்ளது.
மலையாளத்தில் கோதா, மின்னல் முரளி போன்ற பிளாக்பஸ்டர் ஹிட் படங்களை இயக்கியுள்ள பசில் ஜோசஃப், வருஷங்களுக்கு ஷேசம், ஜெய ஜெய ஜெய ஹே, குருவாயூர் அமபலநடியில், சூக்ஷமதர்ஷினி ஆகிய படங்களில் நடித்து பாராட்டை பெற்றுள்ளார்.
இதையும் படிங்க: நெட்ஃபிளிக்ஸ் ஓடிடியில் வெளியாகும் ’புஷ்பா 2’... எப்போது தெரியுமா? - PUSHPA 2 OTT RELEASE
பசில் ஜோசஃப் இயக்கும் கதைகளில் ஸ்டைல் சூர்யாவுக்கும் பிடித்துப் போனதாகவும், அதன் காரணமாக பசில் ஜோசஃப் இயக்கத்தில் நடிக்க விருப்பம் தெரிவித்துள்ளதாகவும் கூறப்படுகிறது. ஏற்கனவே சூர்யா, இயக்குநர் அமல் நீரட் இயக்கத்தில் தனது 45வது படத்தில் நடிப்பதாக தகவல் வெளியானது குறிப்பிடத்தக்கது. சூர்யா படம் குறித்த இந்த அப்டேட் ரசிகர்களிடையே மகிழ்ச்சியை ஏற்படுத்தியுள்ளது.
