சென்னை: விஜய் டிவியில் கடந்த 7 சீசன்களாக ஒளிபரப்பாகி வரும் நிகழ்ச்சி ’பிக்பாஸ்’ (Bigg Boss). பிரபலங்கள் ஒரே வீட்டில் செல்போன், டிவி என எந்த வித தொழில்நுட்பம் மற்றும் வெளியுலக தொடர்பும் இல்லாமல் 100 நாட்கள் இருக்க வேண்டும். இந்த பிக்பாஸ் நிகழ்ச்சியை ஆரம்பம் முதல் 7 சீசன்களாக நடிகர் கமல்ஹாசன் தொகுத்து வழங்கி வந்தார்.
இந்நிலையில் தற்போதைய 8வது சீசனில் கமல்ஹாசன் விலகியுள்ள நிலையில், இந்த சீசனை நடிகர் விஜய் சேதுபதி தொகுத்து வழங்கவுள்ளார். விஜய் சேதுபதி இடம்பெற்றுள்ள பிக்பாஸ் 8 ப்ரோமோ வேற லெவலில் வரவேற்பை பெற்றது. இந்நிலையில் இந்த பிக்பாஸ் 8வது சீசனில் பங்கேற்கவுள்ள போட்டியாளர்கள் உத்தேச பட்டியலை தற்போது காணலாம்.
டிடிஎஃப் வாசன்: இளைஞர்களை கவரும் வகையில் பைக் ரேஸில் ஈடுபட்ட வந்த டிடிஎஃப் வாசன் பிக்பாஸ் 8வது சீசனில் பங்கேற்கவுள்ளார் என்ற தகவல் வெளியாகியுள்ளது. டிடிஎஃப் வாசன் கதாநாயகனாக நடித்துள்ள ’மஞ்சள் வீரன்’ திரைப்படம் அடுத்த ஆண்டு 2025 வெளியாகவுள்ளது.
நடிகர் ஜெகன்: பிரபல நடிகரும் நிகழ்ச்சி தொகுப்பாளருமான ஜெகன் இந்த முறை பிக்பாஸ் வீட்டிற்கு செல்லவுள்ளதாக தகவல் வெளியாகியுள்ளது. கண்ட நாள் முதல் திரைப்படம் மூலம் சினிமாத்துறையில் அறிமுகமான ஜெகன், அயன் திரைப்படம் மூலம் பிரபலமானார். மேலும் பையா, சிக்குபுக்கு, அனேகன் உள்ளிட்ட பல படங்களில் நடித்துள்ளார். விஜய் தொலைக்காட்சியில் பல விளையாட்டு நிகழ்ச்சிகளை தொகுத்து வழங்கியுள்ளார்.
பூனம் பஜ்வா: பிரபல நடிகை பூனம் பஜ்வா பிக்பாஸ் 8வது சீசனில் பங்கேற்கவுள்ளதாக கூறப்படுகிறது. பூனம் பஜ்வா சேவல் திரைப்படம் மூலம் தமிழ் சினிமாவில் அறிமுகமாகி பின்னர் கச்சேரி ஆரம்பம், ஆம்பள, ரோமியோ ஜூலியட், அரண்மனை 2 உள்ளிட்ட பல படங்களில் நடித்துள்ளார்.
இதையும் படிங்க: “என்னை மன்னிச்சிடுங்க சார்…” சசிகுமார் பிறந்தநாளில் ’நந்தன்’ பட இயக்குநர் வெளியிட்டுள்ள உணர்ச்சிகர பதிவு!
நடிகர் ரஞ்சித்: தமிழ் சினிமாவில் 90களில் பிரபல நடிகராக திகழ்ந்தவர் ரஞ்சித். இவர் மைனர் மாப்பிள்ளை, மறுமலர்ச்சி, நட்புக்காக, நினைவிருக்கும் வரை என பல படங்களில் நடித்துள்ளார். இவர் கடைசியாக நடித்த ’கவுண்டம்பாளையம்’ படம் கடந்த மாதம் வெளியானது. இந்நிலையில் ரஞ்சித் பிக்பாஸ் 8இல் பங்கேற்கவுள்ளதாக தகவல் வெளியாகியுள்ளது.
ஷாலின் சோயா: குக் வித் கோமாளி நிகழ்ச்சி மூலம் பிரபலமடைந்த நடிகை ஷாலின் சோயா பிக்பாஸ் 8இல் பங்கேற்கவுள்ளதாக கூறப்படுகிறது. இவர் கடந்த வருடம் வெளியான கண்ணகி படத்தில் நடித்தார்.
குரேஷி: பிரபல நகைச்சுவை நடிகர் குரேஷி குக் வித் கோமாளி நிகழ்ச்சி மூலம் பிரபலமானார். குரேஷி பிக்பாஸ் 8 வீட்டிற்கு செல்லவுள்ளதாக கூறப்படுகிறது
ஆர்ஜே ஆனந்தி: பிரபல ஆர்.ஜேவான ஆனந்தி டி பிளாக், நெற்றிக்கண், கோமாளி ஆகிய படங்களில் நடித்துள்ளார். இவர் பிக்பாஸ் 8இல் பங்கேற்கவுள்ளதாக தகவல் வெளியாகியுள்ளது.
மாகாபா: பிரபல விஜய் டிவி தொகுப்பாளரான மாகாபா நகைச்சுவையான ஸ்டைலில் நிகழ்ச்சியை தொகுத்து வழங்குவதில் பெயர் பெற்றவர். இவர் பிக்பாஸ் 8இல் பங்கேற்கவுள்ளார் எனவும் கூறப்படுகிறது.
அமலா ஷாஜி: மாடலும் இசைக் கலைஞருமான அமலா ஷாஜி, டிக்டாக் மூலம் இளைஞர்கள் மத்தியில் பிரபலமானவர். இவர் பிக்பாஸ் 8இல் பங்கேற்கவுள்ளதாக பேசப்படுகிறது.
ரியாஸ் கான்: பிரபல நடிகர் ரியாஸ் கான் மலையாள சினிமாவில் நடிகராக அறிமுகமானார். பின்னர் தமிழில் சமுத்திரம், ஆளவந்தான், பாபா, அரசு, வின்னர் உள்ளிட்ட பல படங்களில் நடித்துள்ளார். இவர் பிக்பாஸ் 8இல் பங்கேற்கவுள்ளதாக கூறப்படுகிறது.
நடிகர் அருண் பிரசாத்: விஜய் டிவியில் ஒளிபரப்பான 'பாரதி கண்ணம்மா' சீரியல் மூலம் இல்லத்தரசிகள் மத்தியில் பிரபலமானவர் அருண் பிரசாத். இவர் பிக்பாஸ் 8இல் பங்கேற்க அதிக வாய்ப்புள்ளதாகவும் தகவல் வெளியாகியுள்ளது.
நடிகை சஞ்சனா: விஜய் சேதுபதிக்கு ’மகாராஜா’ படத்தில் மகளாக நடித்து பெயர் பெற்றவர் சஞ்சனா. இவர் பிக்பாஸ் வீட்டிற்கு செல்லவுள்ளதாக தகவல் வெளியாகியுள்ளது.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
