சென்னை: பிரபல நகைச்சுவை நடிகர் லொள்ளு சபா சேஷூ மாரடைப்பு காரணமாக மருத்துவமனையில் அனுமதிக்கப்படிருந்த நிலையில், இன்று சிகிச்சை பலனின்றி உயிரிழந்தார். லட்சுமிநாராயணன் சேஷூ, தனியார் தொலைக்காட்சியில் ஒளிபரப்பான லொள்ளு சபா நகைச்சுவை நிகழ்ச்சி மூலம் பிரபலமடைந்தார்.
முன்னதாக தனுஷ் நடித்த துள்ளுவதோ இளமை படத்தில் சிறிய வேடத்தில் நடித்து தமிழ் சினிமாவில் அறிமுகமானார். அதனைத் தொடர்ந்து வீராப்பு, வேலாயுதம், இந்தியா பாகிஸ்தான், பாரிஸ் ஜெயராஜ் உள்ளிட்ட பல படங்களில் நகைச்சுவை கதாபாத்திரத்தில் நடித்து மக்கள் மனதைக் கவர்ந்தார்.
கடைசியாக இவர் நடித்த வடக்குப்பட்டி ராமசாமி திரைப்படம் வெளியாகி, ரசிகர்கள் மத்தியில் வரவேற்பை பெற்றது. இந்நிலையில், கடந்த சில நாட்களுக்கு முன் மருத்துவமனையில் அனுமதிக்கபட்டிருந்த சேஷூ, சிகிச்சை பலனின்றி இன்று உயிரிழந்தார்.
இது குறித்து லொள்ளு சபா இயக்குநர் ராம்பாலாவிடம் ஈடிவி பாரத் செய்தி, தொலைபேசியில் தொடர்பு கொண்டு பேசிய போது, “நானும் அவரும் 22 வருட நண்பர்கள். நல்ல திறமையான நடிகர், சேஷூவுக்கு அங்கீகாரம் கிடைக்கும் நேரத்தில் மறைந்துவிட்டார். நான் இயக்குநராகும் போது, உங்களை எனது படத்தில் நடிக்க வைப்பேன் எனவும், தமிழ் சினிமாவில் பிரபலமாகி ஒரு ரவுண்ட் வருவீர்கள் என அவரிடம் கூறுவேன்.
நடிப்பில் மிகவும் அர்ப்பணிப்பு கொண்டவர். நான் ஒரு சீனைக் கூறி நடிக்கச் சொன்னால், அவர் அதில் பல பரிமாணங்களை வெளிப்படுத்த முயற்சிப்பார். மேலும், பணத்தில் நிறைய தியாகம் செய்துள்ளார். பல ஏழைகளுக்கு யாருக்கும் வெளியில் தெரியாமல் உதவியுள்ளார்.
பல தானம், தர்மங்கள் செய்தவர் திடீரென இறந்துவிட்டார் என்பதை என்னால் நம்ப முடியவில்லை. சேஷுவை முதன்முதலாக சந்தித்தது குறித்து கேட்ட போது, சேஷூவிடம் லூஸ் மோகனுடைய ஸ்டைல் இருக்கும், அவருடைய ரியாக்ஷன் என்னைக் கவர்ந்தது. குறிப்பாக மண்வாசனை படத்தின் ஸ்பூஃப் வீடியோவில் (spoof video) அந்த பாட்டி கேரக்டர் மிகவும் பிரபலமடைந்தது.
அவர் எனது படத்தில் நடிக்காதது வருத்தமாக உள்ளது. தற்போது காமெடி கதாபாத்திரத்திற்கு தமிழ் சினிமாவில் பற்றாக்குறையாக உள்ளது. அவருக்கென, நான் எனது படத்தில் வைத்திருந்த கதாபாத்திரத்தில் யாரை வைத்து நிரப்புவது என தெரியவில்லை. சேஷூ உடல் நாளை நல்லடக்கம் செய்யப்படுகிறது.
இதையும் படிங்க: “வெள்ளிக்கிழமை நாயகன்” பட்டத்தை பெறுகிறாரா ஜி.வி.பிரகாஷ்? - Friday Hero Gv Prakash
