சென்னை: சிவா இயக்கத்தில் சூர்யா, பாபி தியோல், திஷா பதானி உள்ளிட்ட பலர் நடித்துள்ள திரைப்படம் 'கங்குவா'. ஸ்டுடியோ கிரீன் ஞானவேல் ராஜா தயாரிப்பில், தேவி ஸ்ரீபிரசாத் இசையமைத்துள்ள 'கங்குவா' திரைப்படம் தமிழ், தெலுங்கு, மலையாளம், கன்னடம், ஹிந்தி ஆகிய மொழிகளில் கடந்த நவம்பர் 14ஆம் தேதி வெளியானது.
சூர்யா திரை வாழ்வில் அதிக பொருட்செலவில் தயாரான இத்திரைப்படம் உலகம் முழுவதும் கிட்டதட்ட 11,500 திரைகளில் வெளியானது. ரூ.2000 கோடி வசூல் அள்ளும் என தயாரிப்பாளர் ஞானவேல்ராஜா பேசிய நிலையில், படம் வெளியான நாள் முதலே கலவையான விமர்சனங்களைப் பெற்று வருகின்றது.
இந்த நிலையில் தயாரிப்பாளர் ஞானவேல்ராஜாவின் மனைவி நேகா ஞானவேல்ராஜா, நடிகை திஷா பதானி குறித்து சர்ச்சைக்குரிய கருத்து தெரிவித்ததாக சமூக வலைத்தளங்களில் ஒரு தகவல் வைரலாகி வருகிறது. சமூக வலைத்தளத்தில் ரசிகர்களின் கேள்விகளுக்கு பதிலளித்து வந்தார். அப்போது திஷா பதானி குறித்த ஒரு கேள்வி, 'கங்குவா படத்தில் திஷா பதானி கவர்ச்சிக்காக மட்டுமே பயன்படுத்தப்பட்டார். அதனால் அவரது கதாபாத்திரத்துக்கு முக்கியத்துவம் கொடுக்கவில்லை' என்று பதிலளித்ததாக கூறப்படுகிறது. ஆனால், உடனடியாக அந்த தகவலை தமது சமூக வலைதள பக்கத்தில் இருந்து நேகா ஞானவேல்ராஜா அழித்துவிட்டார் என்றும் தகவல் வெளியானது.
இதையும் படிங்க: 'கங்குவா' எதிர்மறை விமர்சனங்கள் எதிரொலி: 12 நிமிட காட்சிகள் நீக்கம் எனத் தகவல்!
திஷா பதானி சர்ச்சை: இதுகுறித்து நேகா ஞானவேல்ராஜாவை தொடர்பு கொண்டு நாம் கேட்டபோது,"சமூக வலைதள கேள்வி, பதில் நிகழ்ச்சியில் பங்கேற்ற சிலர், கங்குவாவில் திஷா பதானி கதாபாத்திரம் குறித்து கேட்டார்கள். அவரது கதாபாத்திர வடிவமைப்பு சரியில்லை என்கிறார்கள்.
படத்தில் அவர் இருபது நிமிடங்கள் இருக்கிறார். இருபது நிமிடங்கள் வந்தாலும் கதாபாத்திரத்தை அழுத்தமாகப் பண்ணலாம். ஆனால் கங்குவா படம் ஏஞ்சலா பற்றியது அல்ல என்று சொன்னேன். ஏஞ்சலா மற்றும் பிரான்சிஸ் கதாபாத்திரம் இரண்டுமே கடந்த காலம் மற்றும் நிகழ்காலத்தை இணைக்கும் கதாபாத்திரங்கள்.
அதனை சொன்னதற்கு அவர்கள் எதிர்மறையாக எடுத்துக்கொண்டு ட்விஸ்ட் பண்ணிப் பேசிக்கொண்டே இருந்தனர். இதுகுறித்து விளக்கம் அளிக்க இது சரியான இடம் இல்லை என்று நான் நினைத்தேன். நியாயமான விளக்கம் கொடுத்தாலும் அதனைத் தவறாகப் புரிந்து கொண்டு ட்விஸ்ட் பண்ணுவார்கள் என்பதைப் புரிந்து கொண்டுதான் அந்த பதிவை அழித்துவிட்டேன்.
பயந்து போய் அதனை டெலிட் செய்யவில்லை. இந்த விஷயத்தில் எதிர்மறை விஷயங்கள் கிடைக்க வேண்டும் என்பதே அவர்களது எண்ணமாக உள்ளது. ரசிகர்களின் கேள்விக்கு மதிப்பு கொடுத்து பதில் அளித்தேன். அழகாக இருப்பவர்கள் மட்டும் தான் கதாநாயகியா என்று கேட்டார்கள். இதனை எத்தனை படங்களில் கேட்கிறார்கள்.
அவங்க அழகாக இருக்கிறார் இதில் எந்த மறுப்பும் கிடையாது. ஒன்றும் இல்லாத விஷயத்தில் நம்மை லாக் பண்ணி கேள்வி கேட்டதில் எனக்கு விளக்கம் அளிக்க எந்தவித பாயிண்ட்டும் இல்லை. அவர்கள் ரசிகர்கள் கிடையாது. எதிர்மறை விஷயங்களுக்கு காத்துக்கொண்டு இருக்கும் குரூப் என்பதை தெரிந்து கொண்டு விளக்கம் அளிக்க தேவையில்லை என்று அதனை அழித்துவிட்டேன். வேறு எந்தவித பயமும் இல்லை" என தெரிவித்தார்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
