சென்னை: ஏஜிஎஸ் எண்டர்டெயிண்ட்மெண்ட் தயாரிப்பில், வெங்கட் பிரபு இயக்கத்தில் விஜய் நடித்துள்ள ’கோட்’ (Greatest Of all time) திரைப்படம் வரும் செப்டம்பர் 5ஆம் தேதி வெளியாகிறது. பெரும் பொருட்செலவில் தயாராகியுள்ள கோட் படத்திற்கு விண்ணை முட்டும் அளவு எதிர்பார்ப்பு அதிகரித்துள்ளது. கோட், முன்பதிவில் ஏற்கனவே பல்வேறு வசூல் சாதனைகள் படைத்துள்ளது. கோட் திரைப்படத்திற்கு இசை வெளியீட்டு விழா நடைபெறாதது படத்திற்கு பெரும் பின்னடைவாக கருதப்பட்டது.
மேலும், கோட் படத்தின் பாடல்களும் கலவையான விமர்சனங்களைப் பெற்றது. இதனைத் தொடர்ந்து வெளியான டிரெய்லர் ரசிகர்கள் மத்தியில் பெரும் வரவேற்பைப் பெற்றது. இதனையடுத்து, வெங்கட் பிரபு மற்றும் கோட் படத்தின் தயாரிப்பாளர் ஆகியோர் தீவிர புரமோஷனில் இறங்கியுள்ளனர். வெங்கட் பிரபு ஒரு பக்கம் படத்திற்கு எதிர்பார்ப்பை அதிகரிக்கச் செய்கிறார் என்றால் அர்ச்சனா கல்பாத்தி, பிரேம்ஜி ஆகியோரது புரமோஷன்கள் ரசிகர்களை குஷிப்படுத்தியுள்ளது.
படத்தில் அஜித்தின் கேமியோ அல்லது வசனங்கள் என்று ஏதாவது ஒன்று இடம்பெறும் என தெரிகிறது. படம் ஓடும் மூன்று மணி நேரம் ரசிகர்கள் போனை தொட மாட்டார்கள் எனவும், அந்த அளவு திரைக்கதை விறுவிறுப்பாக இருக்கும் எனவும் வெங்கட் பிரபு தெரிவித்துள்ளார். அதேபோல், கோட் கிளைமாக்ஸ் காட்சியில் தியேட்டர் அதிறும் எனவும் கூறியுள்ளார்.
அதேபோல், பிரேம்ஜி தனியார் யூடியூப் சேனலுக்கு அளித்த பேட்டியில், கோட் படம் தொடங்கி 60 நொடியிலிருந்து அவ்வப்போது சர்ப்ரைஸ் வந்து கொண்டே இருக்கும். மேலும் படத்தில் விஜயின் கார் எண் ‘CM 2026’ எனவும் கூறியுள்ளார். இது ஒரு புறம் இருக்க, அர்ச்சனா கல்பாத்தி, நாங்கள் கோட் படத்திற்கு எதிர்பார்ப்பைக் குறைக்க வேண்டும் என்றே படத்தை பற்றி பெரிதாக பேசவில்லை எனவும், கோட் படத்தின் பட்ஜெட் விஜய் சம்பளத்தைச் சேர்த்து 400 கோடி வரை செலவானதாகவும் கூறியுள்ளார். கோட் படத்திற்கு பிறகு விஜய் ஒரு படத்தில் மட்டுமே நடிக்கவிருப்பதால் ரசிகர்கள் படத்தைக் காண மிகுந்த ஆவலுடன் உள்ளனர்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
இதையும் படிங்க: அட்லீயின் ஆக்ஷன் படத்தில் இணையும் இரு பெரும் நட்சத்திரங்கள்! - salman kamal haasan with atlee
