சென்னை: தமிழ் சினிமாவில் முன்னணி நடிகராக இருப்பவர் அஜித் குமார். தற்போது இவரது நடிப்பில் விடாமுயற்சி, குட் பேட் அக்லி ஆகிய இரு படங்கள் உருவாகி வருகின்றன. இதில் குட் பேட் அக்லி அடுத்த வருடம் பொங்கலுக்கு வெளியாகும் என ஏற்கனவே அறிவிக்கப்பட்டது.
ஆனால், விடாமுயற்சி படம் எப்போது வெளியாகும் என எந்தவித அறிவிப்பும் இதுவரை வெளியாகவில்லை. மேலும், விடாமுயற்சி படத்தை இயக்குநர் மகிழ் திருமேனி இயக்குகிறார். இப்படத்தை லைகா நிறுவனம் தயாரிக்கிறது. இதன் படப்பிடிப்பு பல மாதங்களாக அஜர்பைஜானில் நடந்து வருகிறது. இதில் அர்ஜுன், ஆரவ், ரெஜினா உள்ளிட்டோர் நடித்துள்ளனர்.
இப்படம் நீண்ட நாட்களாக எடுக்கப்பட்டு வருவதால், அஜித் குமார் தனது அடுத்த படத்தின் படப்பிடிப்பை தொடங்கி முதற்கட்ட படப்பிடிப்பும் முடிந்துவிட்டது. தற்போது விடாமுயற்சி படத்தின் இறுதிக்கட்ட படப்பிடிப்பு அஜர்பைஜானின் மீண்டும் தொடங்கி நடைபெற்று வருகிறது.
வழக்கமாக ஒரு படத்தை முடித்துவிட்டு தான் அஜித் குமார் தனது அடுத்த படத்தை தொடங்குவார். ஆனால், இம்முறை விடாமுயற்சி தாமதமாவதால் இயக்குநர் ஆதிக் ரவிச்சந்திரன் இயக்கத்தில் குட் பேட் அக்லி படத்திலும் நடித்து வருகிறார். இந்த நிலையில், விடாமுயற்சி படத்தை இந்தாண்டு தீபாவளிக்கு வெளியிட ஏற்பாடுகள் நடைபெற்று வருகிறது.
