போலி பேராசிரியர்களை கணக்கு காட்டிய பொறியியல் கல்லூரி மீது குற்றவியல் நடவடிக்கை - அண்ணா பல்கலை சிண்டிகேட் கூட்டத்தில் தீர்மானம்! - TN ENGG COLLEGE FACULTY FRAUD

TN ENGG COLLEGE FACULTY FRAUD: அண்ணா பல்கலைக்கழகத்தின் அங்கீகாரம் பெறுவதற்கு போலியாக பேராசிரியர்களை கணக்கு காண்பித்த கல்லூரிகள் மீது குற்றவியல் நடவடிக்கை எடுக்க சிண்டிகேட் கூட்டத்தில் தீர்மானம் நிறைவேற்றப்பட்டுள்ளது.

சென்னை: சென்னை அண்ணா பல்கலைக்கழகத்தின் 271வது சிண்டிகேட் கூட்டம், கடந்த ஜூலை 29ஆம் தேதி நடைபெற்றது. அதில், பல முக்கிய தீர்மானங்கள் நிறைவேற்றப்பட்டன. அந்தக் கூட்டத்தில், போலி பேராசிரியர்களை கணக்கு காண்பித்தது குறித்தும் விவாதிக்கப்பட்டு, கல்லூரிகள் மீது குற்றவியல் நடவடிக்கை உள்ளிட்ட கடுமையான நடவடிக்கை எடுக்கவும் அனுமதிக்கப்பட்டுள்ளது.

முன்னதாக, பொறியியல் கல்லூரியில் ஆசிரியர்கள் நியமனம் மோசடியாக நடைபெற்றுள்ளதாக தகவல்கள் வெளியாகின. அதைத் தொடர்ந்து நடத்தப்பட்ட விசாரணையில், 295 பொறியியல் கல்லூரிகளில் 700 ஆசிரியர்கள் போலியாக பல கல்லூரிகளில் பெயர்களை பதிவு செய்துள்ளனர்.

இந்த விவகாரத்தில் குற்றச்சாட்டுகளுக்கு உள்ளான 295 பொறியியல் கல்லூரிக்கு விளக்கம் கேட்டு நோட்டீஸ் அனுப்பப்பட்டுள்ளது. இதில் 20 சதவீதம் கல்லூரிகள் அதற்கான விளக்கத்தை அளித்துள்ளது. மேலும், 80 சதவீத கல்லூரிகள் விளக்கம் அளிக்க கூடுதல் அவகாசம் கேட்டுள்ளது. அதன் அடிப்படையில், குற்றச்சாட்டு தொடர்பாக விளக்கம் அளிக்க மேலும் 10 நாட்கள் கூடுதல் அவகாசம் அந்த கல்லூரிகளுக்கு வழங்கப்பட்டன.

தற்பொழுது அந்தக் கல்லூரிகளில் பணிபுரியும் ஆசிரியர்களின் ஆதார் எண், பான் எண் போன்றவை வாங்கப்பட்டு, பதிவு செய்யப்பட்டு சரிபார்க்கப்பட்டு வருகிறது. மேலும், அங்கீகாரம் பெறுவதில் போலியாக ஆசிரியர்களை கணக்கு காண்பித்த விவகாரத்தில், விசாரணை செய்வதற்கு தேசிய ஆசிரியர் கல்வியியல் ஆராய்ச்சி நிறுவனத்தின் இயக்குனர் உஷா நடேசன், அண்ணா பல்கலைக்கழகத்தின் முன்னாள் பதிவாளர் குமரவேல், தொழில்நுட்பக் கல்வி ஆணையர் ஆபிரகாம் ஆகியோர் கொண்ட உயர்மட்டக் குழு அமைக்கப்பட்டுள்ளது.

மேலும், கல்லூரிகளில் போலியான ஆவணங்களை அளித்தது குறித்து விளக்கம் கேட்டு நோட்டீஸ் அனுப்பி வைக்கப்பட்டுள்ளது. ஆசிரியர்களின் பெயர்கள் ஒன்றுக்கும் மேற்பட்ட கல்லூரிகளில் இருப்பதும் கண்டறியப்பட்டுள்ளது.

மேலும் சிண்டிகேட் கூட்டத்தில், தமிழ்நாட்டிற்குள் உள்ள எந்தவொரு கல்லூரியிலும் மோசடியில் ஈடுபட்ட ஆசிரியர்கள் கற்பிப்பதில் தடை செய்வதற்கான சாத்தியக்கூறுகளை ஆராயவும், போலியான தகவலை வழங்கிய கல்லூரிகளுக்கு எதிராக (குற்றவியல் நடவடிக்கை உட்பட) கடுமையான நடவடிக்கை எடுக்கவும் தீர்மானம் நிறைவேற்றப்பட்டுள்ளதாக தெரிவிக்கப்பட்டுள்ளது.

அண்ணா பல்கலைக்கழகத்தின் சிண்டிகேட் கூட்டத்தில் நிறைவேற்றப்பட்ட தீர்மானத்தின் படி, குழுவினர் ஆய்வு செய்த அறிக்கை அளித்தால் நடவடிக்கை எடுக்கப்படும் என உயர்கல்வித்துறை அமைச்சர் பொன்முடி தெரிவித்துள்ளதும் குறிப்பிடத்தக்கது.

ஈடிவி பாரத் தமிழ்நாடு (Credits - ETV Bharat Tamil Nadu)

ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்

இதையும் படிங்க : அண்ணா பல்கலைக்கழக தேர்வுக் கட்டணம் உயர்வு நிறுத்திவைப்பு - அமைச்சர் பொன்முடி அறிவிப்பு! - Anna University Exam Fees hike