அனைத்து தனியார் சொத்துகளையும் அரசு கையகப்படுத்த முடியாது - உச்ச நீதிமன்றம் அதிரடி தீர்ப்பு!

அனைத்து தனியார் சொத்துகளையும் சமூகத்தினுடைய பொருள் வளங்களின் ஒரு பகுதியாக கருதி, பொதுநலனுக்காக அவற்றை அரசு கையகப்படுத்த முடியாது என்று உச்ச நீதிமன்றம் இன்று அதிரடியாக தீர்ப்பளித்துள்ளது.

புதுடெல்லி: அனைத்து தனியார் சொத்துகளையும் சமூகத்தினுடைய பொருள் வளங்களின் ஒரு பகுதியாக கருதி, அரசு அதனை கையகப்படுத்த முடியாது என்று உச்ச நீதிமன்றம் செவ்வாய்க்கிழமை அதிரடியாக தீர்ப்பளித்துள்ளது. தலைமை நீதிபதி டி.ஒய். சந்திரசூட் தலைமையிலான ஒன்பது நீதிபதிகள் கொண்ட அமர்வு இந்த தீர்ப்பை வழங்கியுள்ளது.

7:2 ஆதரவு: ஒன்பது நீதிபதிகள் கொண்ட அமர்வு அளித்த இத்தீர்ப்பில், அனைத்து தனியார் சொத்துகளும் சமூகத்தின் பொருள் வளங்களின் ஒரு பகுதியாக இருக்க முடியாது. அரசியலமைப்பு சட்டத்தின் 39 (b) பிரிவின்படி, ஓர் அரசு இதனை சமமாக மறுபகிர்வு செய்ய கடமைப்பட்டுள்ளது என்று தலைமை நீதிபதி சந்திரசூட் உள்ளிட்ட ஏழு நீதிபதிகள் கருத்து தெரிவித்தனர். மேலும், முந்தைய சோசலிச அடிப்படையிலான பொது நலனுக்காக அனைத்து தனியார் சொத்துக்களையும் அரசு கைப்பற்ற முடியாது என்று நீதிபதிகள் கூறினர். அதேசமயம், பெருன்பான்மை நீதிபதிகளின் இக்கருத்துக்கு நீதிபதிகள் நாகரத்னா மற்றும் துலியா எதிர்த்து தெரிவித்தனர்.

தனியாருக்குச் சொந்தமான அனைத்து வளங்களையும் அரசு கையகப்படுத்தலாம் என்ற நீதிபதி கிருஷ்ண ஐயரின் முந்தைய தீர்ப்பை உச்ச நீதிமன்ற தலைமை நீதிபதி தலைமையிலான பெரும்பான்மை நீதிபதிகள் நிராகரித்தனர். பழைய தீர்ப்பு ஒரு குறிப்பிட்ட சித்தாந்தத்தால் தூண்டப்பட்டது என்று தலைமை நீதிபதி சந்திரசூட் தெரிவித்தார்.

இதையும் படிங்க: “பிரதமர் மோடி எனது வீட்டு கணபதி பூஜைக்கு வந்ததில் தவறில்லை!”- தலைமை நீதிபதி விளக்கம்!

1960களின் பிற்பகுதியிலும் 1970களிலும் சோசலிச சீர்திருத்தங்கள் மற்றும் கொள்கைகளை நோக்கி ஒரு மாற்றம் ஏற்பட்டது. ஆனால் தாராளமயமாக்கல் காலகட்டத்தில் சந்தை அடிப்படையிலான சீர்திருத்தங்களைத் தொடர்வதற்கான மாற்றம் ஏற்பட்டது. இந்தியப் பொருளாதாரம் இன்று பொது முதலீட்டில் இருந்து பொது மற்றும் தனியார் முதலீட்டு நிலைக்கு மாறியுள்ளது" என்று தலைமை நீதிபதி தமது தீர்ப்பில் கூறினார்.

"கிருஷ்ண ஐயர் அணுகுமுறையில் இருந்த கோட்பாட்டுப் பிழையானது ஒரு கடுமையான பொருளாதாரக் கோட்பாட்டை முன்வைத்தது, இது தனியார் வளங்களின் மீது அரசின் அதிக கட்டுப்பாட்டை அறிவுறுத்தியது" என்றும் தலைமை நீதிபதி தமது தீர்ப்பில் தெரிவித்தார்.

மகாராஷ்டிரா வீட்டு வசதி மற்றும் மேம்பாட்டு ஆணைய (MHADA) சட்டம் 1976 இன் பிரிவு 8 ஏ வின் கீழ், சில தனியார் சொத்துகளை கையகப்படுத்த மாநில அரசை அனுமதிப்பது தொடர்பாக தொடரப்பட்ட வழக்கில் முக்கியமான இந்தத் தீர்ப்பை உச்ச நீதிமன்றம் இன்று வழங்கியுள்ளது.