சிம்லா: மக்களவை தேர்தலில் இமாச்சல பிரதேசம் மாநிலம் மண்டி தொகுதியில் போட்டியிட்டு நடிகை கங்கனா ரனாவத் வெற்றி பெற்றார். இந்நிலையில் கங்கனா ரனாவத் வெற்றியை எதிர்த்து கின்னார் மாவட்டத்தை சேர்ந்த லயக் ராம் நெகி இம்மாச்சல பிரதேச உயர் நீதிமன்றத்தில் வழக்கு தொடர்ந்துள்ளார்.
அந்த மனுவில், தவறுதலாக தேர்தல் நடத்தும் அதிகாரி தனது வேட்புமனுவை நிராகரித்ததாக லயக் ராம் நெகி தெரிவித்துள்ளார். மேலும், வனத்துறையின் முன்னாள் பணியாளரான லயக் ராம் நெகி, தனக்கு முன்கூட்டிய ஓய்வு கிடைத்ததாகவும், தேர்தல் நடத்தும் அதிகாரியிடம் வேட்பு மனுக்களுடன், தன் மீது துறை சார்ந்த நிலுவைத் தொகை ஏதும் இல்லை என்கிற சான்றிதழை சமர்பித்ததாக கூறினார்.
இருப்பினும், மின்சாரம், குடிநீர், தொலைபேசி ஆகிய துறைகளில் இருந்து நிலுவை தொகை இல்லை என்கிற சான்றிதழை வாங்கி சமர்ப்பிக்குமாறு ஒருநாள் அவகாசம் வழங்கப்பட்டதாகவும், பின்னர் அவற்றை சமர்ப்பித்தபோது, தேர்தல் நடத்தும் அலுவலர் ஏற்காமல் வேட்புமனுவை நிராகரித்ததாக அவர் தெரிவித்துள்ளார்.
தனது ஆவணங்களை ஏற்று வேட்புமனுத் தாக்கல் செய்ய அனுமதித்து இருந்தால் தான் தேர்தலில் வெற்றி பெற்றிருக்க முடியும் என்றும் தேர்தலை ஒதுக்கி வைக்குமாறும் அவர் வேண்டுகோள் விடுத்தார். இந்த மனுவை விசாரித்த நீதிபதி ஜோத்ஸ்னா ரேவால், ஆகஸ்ட் 21ஆம் தேதிக்கு வழக்கு தொடர்பாக நடிகை கங்கனா ரனாவத் பதிலளிக்க நோட்டீஸ் வழங்க உத்தரவிட்டார்.
மக்களவை தேர்தலில் மண்டி தொகுதியில் போட்டியிட்ட கங்கனா ரனாவத் 5 லட்சத்து 37 ஆயிரத்து 2 வாக்குகள் பெற்று வெற்றி பெற்றார். அவரை எதிர்த்து காங்கிரஸ் தரப்பில் போட்டியிட்ட முன்னாள் முதலமைச்சர் வீரபத்திர சிங்கின் மகன் விக்ரமாதித்ய சிங் 4 லட்சத்து 62 ஆயிரத்து 267 வாக்குகள் வித்தியாசத்தில் தோல்வியை தழுவினார். கங்கனா ரனாவத்துக்கும், விக்ரமாதித்ய சிங்குக்கும் இடையே 74 ஆயிரத்து 755 வாக்குகள் வித்தியாசம்.
இதையும் படிங்க: மேற்கு வங்கத்திலும் திராவிட மாடல்! நீட் தேர்வுக்கு எதிராக சட்டப்பேரவையில் தீர்மானம் நிறைவேற்றம்! - West Bengal NEET Ban Resolution
