ਸੰਗਰੂਰ: ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਿੱਚ ਪੰਜਾਬ ਦੀਆਂ 30 ਕਿਸਾਨ ਜਥੇਬੰਦੀਆਂ ਦਾ ਰੇਲ ਰੋਕੋ ਅੰਦੋਲਨ ਜਾਰੀ ਹੈ। ਕਿਸਾਨਾਂ ਨੇ ਮਾਲ ਗੱਡੀਆਂ ਨੂੰ ਲੰਘਣ ਲਈ ਛੂਟ ਦਿੱਤੀ ਹੋਈ ਹੈ। ਕਿਸਾਨਾਂ ਦੇ ਅੰਦੋਲਨ ਕਾਰਨ ਕੇਂਦਰ ਸਰਕਾਰ ਨੇ ਮਾਲ ਗੱਡੀਆਂ ਦੀ ਆਵਾਜ਼ਾਈ 'ਤੇ ਵੀ ਰੋਕ ਲਗਾ ਦਿੱਤੀ ਹੈ। ਇਸੇ ਦੌਰਾਨ ਸੰਗਰੂਰ ਜ਼ਿਲ੍ਹੇ ਦੇ ਸੁਨਾਮ ਵਿੱਚ ਇੱਕ ਸਵਾਰੀ ਰੇਲ ਗੱਡੀ ਲੰਘਦੀ ਵੇਖੀ ਗਈ। ਇਸ ਗੱਡੀ ਦੇ ਲੰਘਣ ਨਾਲ ਕਈ ਤਰ੍ਹਾਂ ਦੇ ਸ਼ੰਕੇ ਲੋਕਾਂ ਦੇ ਦਿਮਾਗ ਵਿੱਚ ਖੜ੍ਹੇ ਹੋਏ ਸਨ।
ਦਰਅਸਲ ਇਹ ਰੇਲ ਗੱਡੀ ਜੋ ਸੁਨਾਮ ਵਿੱਚੋਂ ਲੰਘੀ ਤੇ ਧੂਰੀ ਜੰਕਸ਼ਨ ਜਾ ਕੇ ਖੜ੍ਹੀ ਹੋ ਗਈ। ਇਹ ਰੇਲ ਗੱਡੀ ਰੇਲਵੇ ਦੀ ਇੱਕ ਸਾਂਭ-ਸੰਭਾਲ ਵਾਲੀ ਵਿਸ਼ੇਸ਼ ਗੱਡੀ ਸੀ।
ਇਸ ਬਾਰੇ ਧੂਰੀ ਜੰਕਸ਼ਨ ਵਿਖੇ ਰੇਲਵੇ ਅਧਿਕਾਰੀ ਨੇ ਦੱਸਿਆ ਕਿ ਕਿਸਾਨ ਅੰਦੋਲਨ ਕਾਰਨ ਸਾਰੀ ਤਰ੍ਹਾਂ ਦੀ ਰੇਲ ਆਵਾਜ਼ਾਈ ਮੁਕੰਮਲ ਬੰਦ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਰੇਲ ਪੱਟੜੀਆਂ, ਬਿਜਲੀ ਸਪਲਾਈ ਆਦਿ ਦੀ ਮੁਰੰਮਤ ਅਤੇ ਸੰਭਾਲ ਲਈ ਇਹ ਵਿਸ਼ੇਸ਼ ਗੱਡੀ ਚਲਾਈ ਗਈ ਹੈ।
ਇਸੇ ਤਰ੍ਹਾਂ ਬੀਤੀ ਸ਼ਾਮ ਮਾਲ ਗੱਡੀ ਲੰਘਣ ਬਾਰੇ ਉਨ੍ਹਾਂ ਨੇ ਦੱਸਿਆ ਕਿ ਇਹ ਗੱਡੀ ਵੀ ਰੇਲ ਪੱਟੜੀਆਂ 'ਤੇ ਪੈਣ ਵਾਲੇ ਰੋੜੇ ਦੀ ਸੀ ਜੋ ਕਿ ਬਰਵਾਲੇ ਤੋਂ ਆਈ ਸੀ ਅਤੇ ਸਾਹਨੇਵਾਲ ਲਈ ਇੱਥੋਂ ਲੰਘੀ ਸੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਕਿਸੇ ਵੀ ਤਰ੍ਹਾਂ ਦੀ ਰੇਲ ਆਵਾਜ਼ਾਈ ਚੱਲਣ ਤੋਂ ਇਨਕਾਰ ਕੀਤਾ ਹੈ।
