ਰੂਪਨਗਰ: ਸ਼ਹਿਰ ਨੂੰ ਪਾਣੀ ਸਪਲਾਈ ਕਰਨ ਵਾਲੀ ਪਾਈਪ ਲਾਈਨ ਬਦਲਣ ਦਾ ਕੰਮ ਮੁਕੰਮਲ ਹੋ ਚੁੱਕਿਆ ਹੈ, ਪਰ ਨਵੀਂ ਪਾਈਪ ਲਾਈਨ 'ਚ ਲੀਕ ਹੋਣ ਕਾਰਨ ਅਜੇ ਵੀ ਪੂਰਨ ਰੂਪ ਦੇ ਵਿੱਚ ਸ਼ਹਿਰ ਵਾਸੀਆਂ ਨੂੰ ਪਾਣੀ ਦੀ ਸਪਲਾਈ ਨਹੀਂ ਮਿਲ ਰਹੀ।
ਨਗਰ ਕੌਂਸਲ ਵੱਲੋਂ 7 ਅਤੇ 8 ਅਗਸਤ ਨੂੰ 2 ਦਿਨ ਵਾਸਤੇ ਸ਼ਹਿਰ ਵਿੱਚ ਪਾਣੀ ਦੀ ਸਪਲਾਈ ਨੂੰ ਬੰਦ ਕੀਤਾ ਗਿਆ ਸੀ ਕਿਉਂਕਿ ਸੀਵਰੇਜ ਬੋਰਡ ਵੱਲੋਂ ਸਰਹਿੰਦ ਨਹਿਰ ਦੇ ਉੱਪਰ ਨਵੀਂ ਪਾਣੀ ਦੀ ਪਾਈਪ ਵਿਛਾਉਣ ਦਾ ਕੰਮ ਚਲ ਰਿਹਾ ਸੀ। ਇਹ ਕੰਮ ਐਤਵਾਰ ਰਾਤ ਤੱਕ ਮੁਕੰਮਲ ਹੋ ਗਿਆ ਸੀ ਬਾਵਜੂਦ ਇਸ ਦੇ ਅਜੇ ਤੱਕ ਪਾਣੀ ਦੀ ਸਪਲਾਈ ਪੂਰਨ ਤੌਰ 'ਤੇ ਸ਼ੁਰੂ ਨਹੀਂ ਹੋਈ ਹੈ।
ਜਦੋਂ ਸੋਮਵਾਰ ਨੂੰ ਸ਼ਹਿਰ ਵਿੱਚ ਪਾਣੀ ਦੀ ਸਪਲਾਈ ਚਾਲੂ ਕੀਤੀ ਗਈ ਤਾਂ ਨਵੀਂ ਪਾਣੀ ਦੀ ਪਾਈਪ 'ਚ ਕਈ ਜਗ੍ਹਾ ਤੋਂ ਲੀਕ ਹੋਣ ਕਾਰਨ ਪਾਣੀ ਦੀ ਪੂਰਨ ਤੌਰ 'ਤੇ ਸਪਲਾਈ ਨਹੀਂ ਹੋਈ।
ਕੌਂਸਲ ਦੇ ਕਾਰਜਸਾਧਕ ਅਫ਼ਸਰ ਭਜਨ ਚੰਦ ਨੇ ਈਟੀਵੀ ਭਾਰਤ ਨਾਲ ਗੱਲਬਾਤ ਕਰਦੇ ਦੱਸਿਆ ਕਿ ਸੀਵਰੇਜ ਬੋਰਡ ਵੱਲੋਂ ਨਵੀਂ ਪਾਣੀ ਦੀ ਪਾਈਪ ਲਾਈਨ ਪਾਉਣ ਦਾ ਕੰਮ ਦਿਨ ਰਾਤ ਕਰਕੇ ਮੁਕੰਮਲ ਕੀਤਾ ਗਿਆ ਸੀ ਜੋ ਐਤਵਾਰ ਰਾਤ ਮੁਕੰਮਲ ਹੋ ਗਿਆ ਹੈ।
ਇਸ ਤੋਂ ਬਾਅਦ ਸੋਮਵਾਰ ਸਵੇਰੇ ਸ਼ਹਿਰ ਨੂੰ ਜਦੋਂ ਪਾਣੀ ਖੋਲ੍ਹਿਆ ਗਿਆ ਤਾਂ ਨਵੀਂ ਪਾਈਪ ਲਾਈਨ ਲੀਕ ਹੋਣ ਕਾਰਨ ਸ਼ਹਿਰ ਵਿੱਚ ਪੂਰਨ ਰੂਪ ਦੇ ਵਿੱਚ ਪਾਣੀ ਦੀ ਸਪਲਾਈ ਨਹੀਂ ਹੋ ਸਕੀ।
ਉਨ੍ਹਾਂ ਦੱਸਿਆ ਕਿ ਇਸ ਸਬੰਧੀ ਸੀਵਰੇਜ ਬੋਰਡ ਮਹਿਕਮੇ ਨੂੰ ਪਾਈਪ ਦੇ ਲੀਕ ਹੋਣ ਬਾਰੇ ਜਾਣਕਾਰੀ ਦੇ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਜਲਦ ਹੀ ਲੀਕ ਪਾਣੀ ਦੀ ਪਾਈਪ ਨੂੰ ਦਰੁਸਤ ਕਰਕੇ ਸ਼ਹਿਰ 'ਚ ਨਿਰਵਿਘਨ ਪਾਣੀ ਦੀ ਸਪਲਾਈ ਚਾਲੂ ਕਰ ਦਿੱਤੀ ਜਾਵੇਗੀ।
