ਇਨਕਮ ਟੈਕਸ ਦੇ ਆਈ.ਟੀ.ਓ ਬਿਕਰਮਜੀਤ ਸਿੰਘ ਨੇ ਦੱਸਿਆ ਕਿ ਨਗਰ ਕਾਊਂਸਲ ਵੱਲੋਂ ਪਿਛਲੇ 3 ਸਾਲਾਂ ਤੋਂ ਨਾ ਹੀ ਟੀਡੀਐਸ ਅਤੇ ਨਾ ਹੀ ਇਨਕਮ ਟੈਕਸ ਦੀਆ ਰਿਟਰਨਾਂ ਫਾਈਲ ਕੀਤੀਆ ਗਈਆ ਹਨ। ਇਸ ਕਾਰਨ ਨਾਭਾ ਦੇ ਨਗਰ ਕਾਊਂਸਲ ਦਾ 4 ਲੱਖ 25 ਹਜ਼ਾਰ ਰੁਪਏ ਟੈਕਸ ਦਾ ਬਕਾਇਆ ਐੱਚਡੀਐੱਫ਼ਸੀ ਬੈਂਕ ਵਿਚੋਂ ਵਿਭਾਗ ਦੇ ਖਾਤੇ 'ਚ ਟਰਾਂਸਫ਼ਰ ਕਰਵਾ ਲਿਆ ਹੈ। ਮੌਕੇ 'ਤੇ ਕਾਰਜ ਸਾਧਕ ਅਫ਼ਸਰ ਅਪਣੀ ਕੁਰਸੀ ਤੋਂ ਗਾਇਬ ਪਾਇਆ ਗਿਆ।
ਇਨਕਮ ਟੈਕਸ ਅਧਿਕਾਰੀ ਟੀਡੀਐੱਸ ਬਿਕਰਮਜੀਤ ਸਿੰਘ ਨੇ ਦੱਸਿਆ ਕਿ ਨਗਰ ਕਾਊਂਸਲ ਨਾਭਾ ਵੱਲ ਸਵਾ 4 ਲੱਖ ਟੈਕਸ ਦਾ ਬਕਾਇਆ ਖੜਾ ਹੈ ਜਿਸ ਸਬੰਧੀ ਆਈਟੀਓ ਵਿਭਾਗ ਨੇ ਕਾਊਂਸਲ ਦੇ ਨਿੱਜੀ ਬੈਂਕ ਖਾਤੇ 'ਚੋਂ ਬਣਾਇਆ ਡਰਾਫਟ ਲੈ ਲਿਆ ਹੈ। ਇਸ ਤੋਂ ਇਲਾਵਾ ਕਾਊਂਸਲ ਨੇ 2018-19 ਦੀਆਂ ਤਿੰਨ ਟੀਡੀਐੱਸ ਕੁਆਟਰ ਰਿਟਰਨਾਂ ਵੀ ਨਹੀਂ ਭਰੀਆਂ। ਉਨ੍ਹਾਂ ਕਿਹਾ ਕਿ ਤਿੰਨੋਂ ਰਿਟਰਨਾਂ ਦੀ ਦੇਰੀ ਸਬੰਧੀ ਕਾਊਂਸਲ ਤੋਂ 200 ਰੁਪਏ ਪ੍ਰਤੀ ਦਿਨ ਜੁਰਮਾਨਾ ਵਸੂਲਿਆ ਜਾਵੇਗਾ।
ਜ਼ਿਕਰਯੋਗ ਹੈ ਕਿ ਆਈਟੀਓ ਦੇ ਛਾਪੇ ਦੌਰਾਨ ਨਗਰ ਕਾਊਂਸਲ ਦੇ ਕਾਰਜ ਸਾਧਕ ਅਫ਼ਸਰ ਗ਼ੈਰ-ਹਾਜ਼ਰ ਪਾਏ ਗਏ। ਇਨਕਮ ਟੈਕਸ ਅਧਿਕਾਰੀ ਨੇ ਦੱਸਿਆ ਕਿ ਛਾਪੇ ਦੌਰਾਨ ਨਗਰ ਕਾਊਂਸਲ ਦੀ ਤਨਖ਼ਾਹ ਦਾ ਪੂਰਾ ਰਿਕਾਰਡ ਨਹੀਂ ਮਿਲਿਆ ਹੈ। ਹੋਰ ਤਾਂ ਹੋਰ ਠੇਕੇਦਾਰਾਂ ਦਾ ਰਿਕਾਰਡ ਵੀ ਪੂਰਾ ਨਹੀਂ ਪਾਇਆ ਗਿਆ ਜਿਸ ਕਾਰਨ ਹਾਜ਼ਰ ਰਿਕਾਰਡ ਵਿਭਾਗ ਨੇ ਕਬਜ਼ੇ 'ਚ ਲੈ ਕੇ ਹਾਜ਼ਰ ਅਧਿਕਾਰੀਆਂ ਨੇ ਬਿਆਨ ਨੋਟ ਕਰ ਲਏ ਹਨ।
ਵਿਭਾਗ ਵੱਲੋਂ ਸੋਮਵਾਰ ਨੂੰ ਕਾਊਂਸਲ ਦੇ ਈਓ ਨੂੰ ਨਿੱਜੀ ਤੋਰ 'ਤੇ ਹਾਜ਼ਰ ਹੋਣ ਦੇ ਨਾਲ-ਨਾਲ ਰਿਕਾਰਡ ਵੀ ਸੰਮਨ ਕੀਤਾ ਗਿਆ ਹੈ। ਦੂਜੇ ਪਾਸੇ ਨਾਭਾ ਨਗਰ ਕਾਊਂਸਲ ਦੀ ਕਲਰਕ ਇਹ ਕਹਿ ਕੇ ਅਪਣਾ ਪੱਲਾ ਝਾੜਦੀ ਰਹੀ ਕਿ ਉਸ ਨੇ 2 ਮਹੀਨੇ ਪਹਿਲਾਂ ਹੀ ਨਾਭਾ ਨਗਰ ਕਾਊਂਸਲ ਜੁਆਇਨ ਕੀਤਾ ਹੈ।
