ਲੁਧਿਆਣਾ: ਸ਼ਹਿਰ ਦੇ ਇੱਕ ਵਪਾਰੀ ਨੇ ਐਮਾਜ਼ੌਨ ਕੰਪਨੀ 'ਤੇ ਉਸ ਨਾਲ ਕਰੋੜਾਂ ਰੁਪਏ ਦੀ ਧੋਖਾਧੜੀ ਕਰਨ ਦਾ ਇਲਜ਼ਾਮ ਲਾਇਆ ਹੈ। ਵਪਾਰੀ ਨਰਿੰਦਰ ਚੁੱਘ ਨੇ ਦੱਸਿਆ ਕਿ ਦਿੱਲੀ ਦੇ ਪ੍ਰਗਤੀ ਮੈਦਾਨ ਵਿੱਚ ਉਸਨੇ ਲੁਧਿਆਣਾ ਦੀ ਫੈਕਟਰੀ 'ਚ ਤਿਆਰ ਕੀਤੇ ਜਾਣ ਵਾਲੇ ਗਾਰਮੈਂਟਸ ਦੀ ਐਗਜ਼ੀਬਿਸ਼ਨ ਲਾਈ ਸੀ। ਇਸ ਦੌਰਾਨ ਐਮਾਜ਼ੌਨ ਦੇ ਅਧਿਕਾਰੀ ਖੁਦ ਉਨ੍ਹਾਂ ਦੀ ਸਟਾਲ 'ਤੇ ਆਏ ਅਤੇ ਬਿਜ਼ਨੈੱਸ ਕਰਨ ਦਾ ਕਰਾਰ ਕਰਕੇ ਉਨ੍ਹਾਂ ਨਾਲ 1 ਕਰੋੜ 91 ਲੱਖ ਰੁਪਏ ਦੀ ਠੱਗੀ ਮਾਰੀ।
ਨਰਿੰਦਰ ਨੇ ਦੱਸਿਆ ਕਿ ਐਮਾਜ਼ੌਨ ਦੇ ਅਧਿਕਾਰੀਆਂ ਨੇ ਉਸ ਨੂੰ ਲਾਲਚ ਦਿੱਤਾ ਕਿ ਉਸ ਦੇ ਕੱਪੜੇ ਚੰਗੀ ਕੁਆਲਿਟੀ ਦੇ ਹਨ ਅਤੇ ਅਮਰੀਕਾ ਵਿੱਚ ਉਨ੍ਹਾਂ ਦੀ ਕਾਫੀ ਡਿਮਾਂਡ ਹੈ। ਇਸ ਕਰਕੇ ਅਮਰੀਕਾ ਦੇ ਵਿੱਚ ਚੱਲਣ ਵਾਲੇ ਐਮਾਜ਼ੌਨ 'ਤੇ ਉਹ ਉਨ੍ਹਾਂ ਦੇ ਕੱਪੜਿਆਂ ਦੀ ਸੇਲ ਕਰਨਗੇ ਅਤੇ ਉਸ ਨੂੰ ਚੰਗਾ ਮੁਨਾਫ਼ਾ ਦੇਣਗੇ।
ਜਦ ਨਰਿੰਦਰ ਤੋਂ ਕਰੋੜਾਂ ਰੁਪਿਆ ਦਾ ਸਾਮਾਨ ਲੈ ਲਿਆ ਪਰ ਫਿਰ ਨਾ ਤਾਂ ਸਾਮਾਨ ਵੇਚਿਆ ਅਤੇ ਜੋ ਸਾਮਾਨ ਭੇਜਣ 'ਤੇ ਖਰਚਾ ਆਇਆ ਉਹ ਵੀ ਉਸ ਦੇ ਸਿਰ ਪੈ ਗਿਆ। ਉਨ੍ਹਾਂ ਕਿਹਾ ਕਿ ਕੰਪਨੀ ਵੱਲੋਂ ਹਰ ਮਹੀਨੇ ਉਸ ਦੇ ਅਕਾਊਂਟ ਵਿੱਚੋਂ ਡਾਲਰ ਕੱਟੇ ਜਾ ਰਹੇ ਹਨ ਅਤੇ ਇਸ ਮਹੀਨੇ 6000 ਡਾਲਰ ਖਰਚਾ ਪਾ ਕੇ ਉਸ ਦੇ ਅਕਾਊਂਟ ਵਿੱਚੋਂ ਪੈਸੇ ਕੱਟ ਲਏ ਗਏ ਜਿਸ ਕਾਰਨ ਉਸ ਨੂੰ ਵੱਡਾ ਚੂਨਾ ਲੱਗਿਆ ਹੈ। ਉਨ੍ਹਾਂ ਕਿਹਾ ਕਿ ਸਾਮਾਨ ਅਤੇ ਉਸ ਦੀ ਸਾਰੀ ਲਾਗਤ ਲਾ ਕੇ ਉਸ ਨਾਲ 1.91 ਕਰੋੜ ਰੁਪਏ ਦੀ ਠੱਗੀ ਵੱਜ ਚੁੱਕੀ ਹੈ ਜਿਸ ਦੀ ਸ਼ਿਕਾਇਤ ਉਸ ਨੇ ਲੁਧਿਆਣਾ ਪੁਲਿਸ ਕਮਿਸ਼ਨਰ ਕੋਲ ਦਰਜ ਕਰਵਾਈ ਹੈ।
