ਲੁਧਿਆਣਾ: ਪ੍ਰਦੂਸ਼ਣ ਦਾ ਵੱਡਾ ਸਰੋਤ ਬਣਿਆ ਲੁਧਿਆਣਾ ਦਾ ਬੁੱਢਾ ਨਾਲਾ ਹੁਣ ਤੱਕ ਕਈ ਲੋਕਾਂ ਦੀ ਜਾਨ ਲੈ ਚੁੱਕਾ ਹੈ। ਕਈ ਭਿਆਨਕ ਬਿਮਾਰੀਆਂ ਤੋਂ ਲੋਕ ਪੀੜਤ ਹਨ।
ਬੁੱਢੇ ਨਾਲੇ ਦੇ ਕੰਢੇ ਚੰਦਰ ਨਗਰ ਦੇ ਰਹਿਣ ਵਾਲੇ ਗੁਰਮੁੱਖ ਸਿੰਘ ਦੀ ਵੀ ਕੁਝ ਅਜਿਹੀ ਹੀ ਦਾਸਤਾਨ ਹੈ। ਅਕਤੂਬਰ 2019 ਪਿੰਡ ਵਿੱਚ ਗੁਰਮੁਖ ਸਿੰਘ ਨੇ ਕੈਂਸਰ ਦੇ ਨਾਲ ਲੜਦਿਆਂ ਆਪਣੀ ਜਾਨ ਦੇ ਦਿੱਤੀ। ਪਰਿਵਾਰ ਦਾ ਸਭ ਕੁਝ ਇਲਾਜ 'ਚ ਵਿਕ ਚੁੱਕਾ ਹੈ। ਕਿਸੇ ਵੀ ਤਰ੍ਹਾਂ ਦੀ ਪਰਿਵਾਰ ਨੂੰ ਕੋਈ ਮਦਦ ਹੁਣ ਤੱਕ ਨਹੀਂ ਮਿਲੀ। ਗੁਰਮੁੱਖ ਸਿੰਘ ਦਾ ਸੁਪਨਾ ਸੀ ਬੇਟੀ ਨੂੰ ਅਧਿਆਪਕ ਬਣਾਉਣਾ ਪਰ ਹੁਣ ਪਰਿਵਾਰ ਦਾ ਗੁਜ਼ਾਰਾ ਵੀ ਔਖਾ ਚੱਲਦਾ ਹੈ।
ਲੱਖਾਂ ਰੁਪਏ ਲਗਾਉਣ ਦੇ ਬਾਵਜੂਦ ਪਰਿਵਾਰ ਆਪਣੇ ਘਰ ਦੇ ਮੈਂਬਰ ਦੀ ਜਾਨ ਨਹੀਂ ਬਚਾ ਸਕਿਆ। ਗੁਰਮੁੱਖ ਸਿੰਘ ਦੇ ਤਿੰਨ ਬੱਚੇ ਹਨ। ਪਰਿਵਾਰ ਆਰਥਿਕ ਤੰਗੀ ਨਾਲ ਜੂਝ ਰਿਹਾ ਹੈ।
ਗੁਰਮੁੱਖ ਸਿੰਘ ਦੀ ਪਤਨੀ ਦਾ ਕਹਿਣਾ ਹੈ ਕਿ ਹੁਣ ਤੱਕ 14 ਲੱਖ ਰੁਪਏ ਇਲਾਜ 'ਚ ਲੱਗ ਚੁੱਕਾ ਹੈ। ਗੁਰਮੁੱਖ ਸਿੰਘ ਗੱਡੀ ਚਲਾਉਂਦਾ ਸੀ ਅਤੇ ਉਹ ਦੋਵੇਂ ਗੱਡੀਆਂ ਵੀ ਇਲਾਜ 'ਚ ਵਿੱਕ ਗਈਆਂ ਸਿਰਫ ਮਕਾਨ ਦੇ ਕਿਰਾਏ ਵਜੋਂ ਜੋ 6000 ਰੁਪਿਆ ਪ੍ਰਤੀ ਮਹੀਨਾ ਮਿਲਦਾ ਹੈ। ਉਸ ਨਾਲ ਹੀ ਘਰ ਦਾ ਗੁਜ਼ਾਰਾ ਚਲਾਉਣਾ ਪੈ ਰਿਹਾ ਹੈ। ਗੁਰਮੁੱਖ ਸਿੰਘ ਦੀ ਇੱਕ ਧੀ ਵਿਆਹੀ ਜਾ ਚੁੱਕੀ ਹੈ। ਜਦੋਂ ਕਿ ਦੂਜੀ ਗ੍ਰੈਜੂਏਸ਼ਨ ਕਰ ਰਹੀ ਹੈ ਅਤੇ ਮੁੰਡਾ ਦਸਵੀਂ ਜਮਾਤ 'ਚ ਪੜ੍ਹਦਾ ਹੈ।
ਗੁਰਮੁੱਖ ਸਿੰਘ ਦੀ ਧੀ ਨੇ ਦੱਸਿਆ ਕਿ ਉਸ ਦੇ ਪਾਪਾ ਦਾ ਸੁਪਨਾ ਸੀ ਕਿ ਉਸ ਨੂੰ ਪੜ੍ਹਾ ਕੇ ਉਹ ਅਧਿਆਪਕ ਬਣਾਉਣਗੇ ਪਰ ਹੁਣ ਘਰ ਦਾ ਸਿਸਟਮ ਪੂਰਾ ਵਿਗੜ ਚੁੱਕਾ ਹੈ ਅਤੇ ਖ਼ਰਚਾ ਚਲਾਉਣਾ ਵੀ ਔਖਾ ਹੋ ਗਿਆ। ਉਧਰ ਗੁਰਮੁੱਖ ਸਿੰਘ ਦੇ ਜਵਾਈ ਨੇ ਦੱਸਿਆ ਹੈ ਕਿ ਉਹ ਇਕੱਲੇ ਹੀ ਘਰ 'ਚ ਕਮਾਉਣ ਵਾਲੇ ਸਨ ਪਰ ਹੁਣ ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਪਰਿਵਾਰ ਦਾ ਗੁਜ਼ਾਰਾ ਚਲਾਉਣਾ ਵੀ ਔਖਾ ਹੋ ਗਿਆ।
ਇਹ ਵੀ ਪੜੋ: ਵਿਸ਼ਵ ਕੈਂਸਰ ਦਿਵਸ: ਜਾਣੋ ਕੁੱਝ ਰੂਹ ਕੰਬਾਊ ਅੰਕੜੇ
ਉਧਰ ਸਮਾਜ ਸੇਵੀ ਅਤੇ ਆਰਟੀਆਈ ਐਕਟੀਵਿਸਟ ਕੀਮਤੀ ਰਾਵਲ ਨੇ ਦੱਸਿਆ ਕਿ ਬੁੱਢੇ ਨਾਲੇ ਕਰਕੇ ਸਿਰਫ ਗੁਰਮੁੱਖ ਸਿੰਘ ਹੀ ਨਹੀਂ ਸਗੋਂ ਕਈ ਲੋਕ ਇਲਾਕੇ ਦੇ ਵਿੱਚ ਆਪਣੀ ਜਾਨ ਗਵਾ ਚੁੱਕੇ ਹਨ ਅਤੇ ਕੁੱਝ ਮੌਤ ਦੀ ਕਗਾਰ 'ਤੇ ਹਨ ਪਰ ਸਰਕਾਰਾਂ ਦਾ ਇਸ ਵੱਲ ਕੋਈ ਧਿਆਨ ਨਹੀਂ।
