ਜਲੰਧਰ: ਆਮ ਤੌਰ 'ਤੇ ਘਰ ਦੀਆਂ ਮਹਿਲਾਵਾਂ ਦੀਆਂ ਅੱਖਾਂ ਵਿੱਚ ਪਿਆਜ਼ ਕੱਟਣ ਲੱਗੇ ਅੱਥਰੂ ਆਉਂਦੇ ਸੀ, ਪਰ ਹੁਣ ਇਹ ਅਥਰੂ ਬਿਨਾਂ ਪਿਆਜ਼ ਕੱਟੇ ਆ ਰਹੇ ਹਨ। ਹੁਣ ਜਦੋਂ ਕੋਈ ਵੀ ਇਨਸਾਨ ਦੁਕਾਨ 'ਤੇ ਪਿਆਜ਼ ਲੈਣ ਜਾਂਦਾ ਹੈ, ਤਾਂ ਉੱਥੇ ਵੀ ਉਨ੍ਹਾਂ ਦੇ ਮਨ ਹੀ ਮਨ ਵਿੱਚ ਅੱਥਰੂ ਨਿਕਲ ਆਉਂਦੇ ਹਨ। ਪਿਆਜ਼ਾਂ ਦੀ ਕੀਮਤ ਇਸ ਵੇਲੇ 80 ਰੁਪਏ ਤੋਂ ਲੈ ਕੇ 100 ਰੁਪਏ ਵਿੱਚ ਚੱਲ ਰਹੀ ਹੈ ਜਿਸ ਕਾਰਕ ਰਸੋਈ ਵਿੱਚ ਸਬਜ਼ੀ ਨੂੰ ਤੜਕਾ ਲਗਾਉਣਾ ਮਹਿੰਗਾ ਪੈ ਰਿਹਾ ਹੈ।
ਹੁਣ ਜੇਕਰ ਤੜਕੇ ਲਈ ਪਿਆਜ਼ ਕੱਟਿਆ ਜਾਂਦਾ ਹੈ, ਤਾਂ ਲੋਕ ਸਲਾਦ ਵਿੱਚ ਪਿਆਜ਼ ਖਾਣ ਤੋਂ ਕਤਰਾਉਂਦੇ ਵਿਖਾਈ ਦੇ ਰਹੇ ਹਨ। ਘਰੇਲੂ ਮਹਿਲਾਵਾਂ ਦਾ ਕਹਿਣਾ ਹੈ ਕਿ ਪਿਆਜ਼ ਦੇ ਇਸ ਤਰ੍ਹਾਂ ਮਹਿੰਗਾ ਹੋਣ ਕਰਕੇ ਹੁਣ ਪਿਆਜ਼ਾਂ ਦਾ ਖ਼ਰਚਾ ਚੁੱਕਣਾ ਹੀ ਮੁਸ਼ਕਿਲ ਹੋ ਗਿਆ ਹੈ। ਇਸ ਲਈ ਸਰਕਾਰ ਨੂੰ ਪਿਆਜ਼ ਦੀਆਂ ਕੀਮਤਾਂ ਨੂੰ ਕੇ ਜਲਦ ਤੇ ਜ਼ਰੂਰੀ ਕਦਮ ਚੁੱਕਣੇ ਚਾਹੀਦੇ ਹਨ।
ਦੂਜੇ ਪਾਸੇ, ਸਬਜੀ ਮੰਡੀ ਵਿੱਚ ਪਿਆਜ਼ ਦਾ ਵਪਾਰ ਕਰਨ ਵਾਲੇ ਦੁਕਾਨਦਾਰਾਂ ਦਾ ਕਹਿਣਾ ਹੈ ਕਿ ਪਿਆਜ਼ ਦਾ ਸਟਾਕ ਘੱਟ ਜਾਣ ਕਾਰਨ ਅਤੇ ਪਿੱਛੋਂ ਇਸ ਦੀ ਸਪਲਾਈ ਪੂਰੀ ਨਾ ਹੋਣ ਕਰਕੇ, ਪਿਆਜ਼ ਦੀ ਕੀਮਤ ਇੰਨੀ ਵੱਧ ਗਈ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਆਉਣ ਵਾਲੇ ਕੁਝ ਦਿਨਾਂ ਤੱਕ ਜਦ ਤੱਕ ਮੰਡੀ ਵਿੱਚ ਨਵੇਂ ਪਿਆਜ਼ ਨਹੀਂ ਆ ਜਾਂਦੇ, ਕੀਮਤ ਇਸ ਤਰ੍ਹਾਂ ਹੀ ਬਣੀ ਰਹੇਗੀ।
ਇਹ ਵੀ ਪੜ੍ਹੋ: ਅਯੁੱਧਿਆ ਫ਼ੈਸਲਾ: ਯੂਪੀ ਦੇ ਪ੍ਰਮੁੱਖ ਸਕੱਤਰ ਅਤੇ ਡੀਜੀਪੀ ਨੂੰ ਮਿਲਣਗੇ ਸੀਜੀਆਈ ਰੰਜਨ ਗੋਗੋਈ
ਫ਼ਿਲਹਾਲ ਆਮ ਜਨਤਾ ਨੂੰ ਉਮੀਦ ਹੈ ਕਿ ਜਲਦ ਹੀ ਪਿਆਜ਼ਾਂ ਦੀ ਸਪਲਾਈ ਪੂਰੀ ਹੋ ਜਾਵੇਗੀ ਤਾਂ ਕਿ ਉਨ੍ਹਾਂ ਨੂੰ ਇਸ ਮਹਿੰਗਾਈ ਤੋਂ ਨਿਜਾਤ ਮਿਲ ਸਕੇ।
