ਚੰਡੀਗੜ੍ਹ: ਪੰਜਾਬ ਇੱਕ ਸਰਹੱਦੀ ਸੂਬਾ ਹੈ ਅਤੇ ਸਰਹੱਦ ਪਾਰੋਂ ਅਕਸਰ ਪੰਜਾਬ ਵਿਚ ਅਣਸੁਖਾਵੀਆਂ ਘਟਨਾਵਾਂ ਵਾਪਰਦੀਆਂ ਰਹਿੰਦੀਆਂ ਹਨ। ਸਰਹੱਦ ਪਾਰੋਂ ਡਰੋਨਾਂ ਦੀ ਆਮਦ, ਨਸ਼ੇ ਅਤੇ ਹਥਿਆਰਾਂ ਦੀ ਸਰਹੱਦ ਪਾਰੋਂ ਆਉਂਦੀ ਖੇਪ ਚਿੰਤਾ ਦਾ ਵਿਸ਼ਾ ਬਣਦੀ ਜਾ ਰਹੀ ਹੈ। ਇੰਨਾ ਹੀ ਨਹੀਂ ਅੱਤਵਾਦੀ ਗਤੀਵਿਧੀਆਂ ਵੀ ਸਰਹੱਦੀ ਖੇਤਰਾਂ ਰਾਹੀਂ ਪੰਜਾਬ ਵਿਚ ਵਧਾਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ ਜੋ ਕਿ ਲਗਾਤਾਰ ਵੱਧਦੀਆਂ ਜਾ ਰਹੀਆਂ ਹਨ। ਜਿਹਨਾਂ ਗਤੀਵਿਧੀਆਂ ਨੂੰ ਕਾਬੂ ਕਰਨ ਲਈ ਪੰਜਾਬ ਵਿਚ ਐਨਐਸਜੀ ਹੱਬ ਬਣਾਉਣ ਦੀ ਗੱਲ ਚੱਲੀ ਹੈ ਤਾਂ ਸਰਹੱਦਾਂ ਨੂੰ ਹੋਰ ਸੁਰੱਖਿਅਤ ਰੱਖਿਆ ਜਾ ਸਕੇ। ਪਠਾਨਕੋਟ ਜ਼ਿਲ੍ਹੇ ਦੇ ਪਿੰਡ ਸਕੋਲ ਵਿਚ ਐਨਐਸਜੀ ਕੇਂਦਰ ਬਣਾਉਣ ਦੀ ਤਜਵੀਜ਼ ਰੱਖੀ ਗਈ ਹੈ, ਜਿਸ ਲਈ ਪੰਜਾਬ ਸਰਕਾਰ ਨੇ ਕੇਂਦਰ ਨੂੰ ਪੱਤਰ ਲਿਖ ਕੇ 103 ਏਕੜ ਜ਼ਮੀਨ ਦੇਣ ਦਾ ਐਲਾਨ ਵੀ ਕੀਤਾ ਹੈ।
ਐਨਐਸਜੀ ਕੀ ਹੈ ?: ਐਨਐਸਜੀ ਯਾਨਿ ਕਿ ਨੈਸ਼ਨਲ ਸਕਿਉਰਿਟੀ ਗਾਰਡ ਆਮ ਤੌਰ 'ਤੇ ਬਲੈਕ ਕੈਟਸ ਵਜੋਂ ਜਾਣਿਆ ਜਾਂਦਾ ਹੈ। ਇਹ ਕੇਂਦਰੀ ਗ੍ਰਹਿ ਮੰਤਰਾਲੇ ਦੇ ਅਧੀਨ ਭਾਰਤ ਦੀ ਇੱਕ ਅੱਤਵਾਦ ਵਿਰੋਧੀ ਇਕਾਈ ਹੈ। ਇਸਦੀ ਸਥਾਪਨਾ 16 ਅਕਤੂਬਰ 1984 ਨੂੰ ਆਪ੍ਰੇਸ਼ਨ ਬਲੂ ਸਟਾਰ ਤੋਂ ਬਾਅਦ ਅੱਤਵਾਦੀ ਗਤੀਵਿਧੀਆਂ ਦਾ ਮੁਕਾਬਲਾ ਕਰਨ ਅਤੇ ਸੂਬਿਆਂ ਨੂੰ ਅੰਦਰੂਨੀ ਗੜਬੜੀਆਂ ਤੋਂ ਬਚਾਉਣ ਲਈ ਕੀਤੀ ਗਈ ਸੀ। ਰਾਸ਼ਟਰੀ ਸੁਰੱਖਿਆ ਗਾਰਡ ਐਕਟ, 1986 ਦੇ ਤਹਿਤ ਭਾਰਤ ਦੀ ਸੰਸਦ ਵਿੱਚ ਰਸਮੀ ਰੂਪ ਦਿੱਤਾ ਗਿਆ। ਇਹ ਭਾਰਤ ਦੇ ਸੱਤ ਕੇਂਦਰੀ ਹਥਿਆਰਬੰਦ ਪੁਲਿਸ ਬਲਾਂ ਵਿੱਚੋਂ ਇੱਕ ਹੈ। ਐਨਐਸਜੀ ਦਾ ਹੈਡ ਕੁਆਟਰ ਦਿੱਲੀ ਵਿਚ ਹੈ ਅਤੇ ਟ੍ਰੇਨਿੰਗ ਸੈਂਟਰ ਮਾਨੇਸਰ ਵਿਚ ਸਥਾਪਿਤ ਹੈ। ਐਨਐਸਜੀ ਦੇ ਸਾਰੇ ਆਪ੍ਰੇਸ਼ਨ ਕੇਂਦਰ ਸਰਕਾਰ ਅਤੇ ਗ੍ਰਹਿ ਮੰਤਰਾਲੇ ਦੇ ਅਧੀਨ ਹੁੰਦੇ ਹਨ। ਦੇਸ਼ ਵਿੱਚ ਅੱਤਵਾਦ ਦੇ ਸਾਰੇ ਪਹਿਲੂਆਂ ਨਾਲ ਨਜਿੱਠਣ ਲਈ ਇੱਕ 'ਫੈਡਰਲ ਕੰਟੀਜੈਂਸੀ ਡਿਪਲਾਇਮੈਂਟ ਫੋਰਸ' ਜਿਸਦਾ ਗਠਨ ਹਾਈਜੈਕ ਵਿਰੋਧੀ ਕਾਰਵਾਈਆਂ, ਬਚਾਅ ਕਾਰਜਾਂ ਅਤੇ ਕੇਂਦਰੀ ਅਰਧ ਸੈਨਿਕ ਬਲਾਂ ਨੂੰ ਸਖ਼ਤ ਸਹਾਇਤਾ ਪ੍ਰਦਾਨ ਕਰਨ ਲਈ ਕੀਤਾ ਗਿਆ।
ਪਠਾਨਕੋਟ 'ਚ ਬਣੇਗਾ ਐਨਐਸਜੀ ਹੱਬ ! :ਪਾਕਿਸਤਾਨ ਵਾਲੇ ਪਾਸੇ ਤੋਂ ਜੋ ਘੁਸਪੈਠ ਦੀਆਂ ਗਤੀਵਿਧੀਆਂ ਵੱਧ ਰਹੀਆਂ ਹਨ। ਉਹਨਾਂ ਨੂੰ ਵੇਖਦਿਆਂ ਪੰਜਾਬ ਵਿਚ ਐਨਐਸਜੀ ਸੈਂਟਰ ਬਣਾਉਣ ਦੀ ਮੰਗ ਉੱਠ ਰਹੀ ਹੈ। ਪਠਾਨਕੋਟ ਦੇ ਪਿੰਡ ਸਕੋਲ ਵਿਚ ਇਕ ਏਕੜ ਜ਼ਮੀਨ ਦੀ ਕੀਮਤ 15 ਲੱਖ ਰੁਪਏ ਦੱਸੀ ਜਾ ਰਹੀ ਹੈ ਜੋ ਕਿ ਪੰਜਾਬ ਸਰਕਾਰ ਲੋਕ ਹਿੱਤ ਲਈ ਕੇਂਦਰ ਸਰਕਾਰ ਨੂੰ ਜ਼ਮੀਨ ਸੌਂਪਣ ਦਾ ਇਰਾਦਾ ਬਣਾ ਰਹੀ ਹੈ। ਹਾਲਾਂਕਿ ਇਹ ਚਰਚਾਵਾਂ ਵੀ ਹਨ ਕਿ ਕੇਂਦਰ ਸਰਕਾਰ ਮੁਫ਼ਤ ਵਿਚ ਜ਼ਮੀਨ ਲੈਣਾ ਚਾਹੁੰਦੀ ਹੈ। ਪਠਾਨਕੋਟ 'ਚ ਐਨਐਸਜੀ ਹੱਬ ਬਣਾਉਣ ਨਾਲ ਅਤਿਵਾਦੀ ਘੁਸਪੈਠ ਦੀਆਂ ਘਟਨਾਵਾਂ ’ਤੇ ਕਾਫੀ ਹੱਦ ਤੱਕ ਕਾਬੂ ਪਾਇਆ ਜਾ ਸਕਦਾ ਹੈ। ਹੁਣ ਤੱਕ ਪੰਜਾਬ ਵਿਚ ਜਦੋਂ ਵੀ ਅੱਤਵਾਦੀ ਗਤੀਵਿਧੀਆਂ ਨਾਲ ਨਜਿੱਠਣਾ ਪਿਆ ਉਦੋਂ ਦੇਸ਼ ਦੇ ਹੋਰਨਾਂ ਸੂਬਿਆਂ ਵਿਚ ਐਨਐਸਜੀ ਮੰਗਵਾਉਣੀ ਪੈਂਦੀ ਹੈ। 2016 ਪਠਾਨਕੋਟ 'ਚ ਹੋਏ ਅੱਤਵਾਦਦੀ ਹਮਲੇ ਦੌਰਾਨ ਵੀ ਐਨਐਸਜੀ ਨੇ ਅੱਤਵਾਦੀਆਂ ਦਾ ਮੁਕਾਬਲਾ ਕੀਤਾ ਸੀ। ਚਰਚਾਵਾਂ ਹਨ ਕਿ ਪੰਜਾਬ ਵਿਚ ਜਲਦੀ ਹੀ ਇਸ ਪ੍ਰੋਜੈਕਟ 'ਤੇ ਕੰਮ ਸ਼ੁਰੂ ਹੋ ਜਾਵੇਗਾ। ਪਠਾਨਕੋਟ ਵਿਚ ਐਨਐਸਜੀ ਬਣਾਉਣ ਦੀ ਲੋੜ ਇਸ ਲਈ ਵੀ ਮਹਿਸੂਸ ਹੋ ਰਹੀ ਹੈ ਕਿਉਂਕਿ ਪਠਾਨਕੋਟ ਪੰਜਾਬ ਦਾ ਸੰਵੇਦਨਸ਼ੀਲ ਖੇਤਰ ਹੈ। ਪਠਾਨਕੋਟ ਦਾ ਏਅਰ ਫੋਰਸ ਸਟੇਸ਼ਨ ਏਸ਼ੀਆ ਵਿਚ ਸਭ ਤੋਂ ਵੱਡਾ ਹੈ। ਇਹ ਹਿਮਾਚਲ ਅਤੇ ਜੰਮੂ ਕਸ਼ਮੀਰ ਦੀਆਂ ਸਰਹੱਦਾਂ ਨਾਲ ਵੀ ਜੁੜਦਾ ਹੈ।
ਪੰਜਾਬ ਨੂੰ ਸੁਰੱਖਿਆ ਦੇਵੇਗੀ ਐਨਐਸਜੀ : ਰਿਟਾਇਰਡ ਐਨਐਸਜੀ ਅਧਿਕਾਰੀ ਪ੍ਰਸ਼ਾਂਤ ਪਾਠਕ ਦਾ ਕਹਿਣਾ ਹੈ ਕਿ ਇਕ ਗੱਲ ਸਮਝ ਲੈਣੀ ਜ਼ਰੂਰੀ ਹੈ ਕਿ ਐਨਐਸਜੀ ਕਿਸੇ ਵੀ ਬਾਰਡਰ ਜਾਂ ਸਰਹੱਦ ਦੀ ਸਿੱਧੇ ਤਰੀਕੇ ਨਾਲ ਰੱਖਿਆ ਨਹੀਂ ਕਰਦਾ। ਇਹ ਅੱਤਵਾਦੀਆਂ ਨਾਲ ਲੜਨ ਅਤੇ ਉਹਨਾਂ ਨਾਲ ਮੁਕਾਬਲਾ ਕਰਨ ਲਈ ਕੰਮ ਕਰਦਾ ਹੈ। ਸਰਹੱਦਾਂ ਦੀ ਰੱਖਿਆ ਬਾਰਡਰ ਸਿਕਓਰਿਟੀ ਫੋਰਸ ਵੱਲੋਂ ਕੀਤੀ ਜਾਂਦੀ ਹੈ। ਇਹ ਐਕਸ਼ਨਏਬਲ ਫੋਰਸਿਜ਼ ਹਨ ਜਿਹਨਾਂ ਦਾ ਕੰਮ ਸਿੱਧਾ ਜੰਗ ਦੇ ਮੈਦਾਨ ਵਿਚ ਸ਼ੁਰੂ ਹੁੰਦਾ ਹੈ। ਪੰਜਾਬ ਦੇ ਵਿਚ ਜੇਕਰ ਕੋਈ ਅੱਤਵਾਦੀ ਘਟਨਾ ਵਾਪਰਦੀ ਹੈ ਤਾਂ ਉਥੇ ਇਹ ਫਾਇਦਾ ਹੋ ਸਕਦਾ ਹੈ ਕਿ ਐਨਐਸਜੀ ਨੂੰ ਬਾਹਰੋਂ ਨਹੀਂ ਬਲਾਉਣਾ ਪਵੇਗਾ।
- CM di Yogshala: ਜਲੰਧਰ 'ਚ 'CM ਦੀ ਯੋਗਸ਼ਾਲਾ' ਦੀ ਸ਼ੁਰੂਆਤ, ਵਿਚਕਾਰ ਹੀ ਛੱਡ ਚਲੇ ਗਏ ਮੁੱਖ ਮੰਤਰੀ ਭਗਵੰਤ ਮਾਨ
- Weather Update: ਮੌਸਮ ਖੁਸ਼ਗਵਾਰ, ਇਹਨਾਂ ਸੂਬਿਆਂ ਵਿੱਚ ਭਾਰੀ ਮੀਂਹ ਦਾ ਅਲਰਟ
- PM Modi US Visit: ਅਮਰੀਕਾ ਦੌਰੇ ਲਈ ਰਵਾਨਾ ਹੋਏ PM ਮੋਦੀ, ਜਾਣੋ ਕੀ ਹੋਵੇਗਾ ਪ੍ਰੋਗਰਾਮ, ਕਿਹੜੇ-ਕਿਹੜੇ ਨੇਤਾਵਾਂ ਨਾਲ ਕਰਨਗੇ ਮੁਲਾਕਾਤ
ਪੰਜਾਬ ਨੂੰ ਕਿੰਨਾ ਹੋਵੇਗਾ ਫਾਇਦਾ: ਪੰਜਾਬ ਸਰਹੱਦੀ ਸੂਬਾ ਹੈ ਅਤੇ ਐਨਐਸਜੀ ਕੇਂਦਰ ਦੀ ਸਥਾਪਨਾ ਵੀ ਇਸੇ ਲਈ ਕੀਤੀ ਜਾ ਰਹੀ ਹੈ। ਪੰਜਾਬ ਨੂੰ ਅੱਤਵਾਦ ਨਾਲੋਂ ਜ਼ਿਆਦਾ ਸਰਹੱਦ ਪਾਰੋਂ ਨਸ਼ਾ, ਹਥਿਆਰ ਅਤੇ ਡਰੋਨਾਂ ਦੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪੰਜਾਬ ਵਿਚ ਕਦੀ ਕਦਾਈਂ ਕੋਈ ਅੱਤਵਾਦੀ ਘਟਨਾ ਵੇਖਣ ਨੂੰ ਮਿਲਦੀ ਹੈ ਇਸ ਲਈ ਉਸ ਸੰਦਰਭ ਵਿਚ ਐਨਐਸਜੀ ਦਾ ਫਾਇਦਾ ਪੰਜਾਬ ਨੂੰ ਹੋਵੇਗਾ। ਜਦਕਿ ਡਰੋਨ, ਹਥਿਆਰ ਅਤੇ ਨਸ਼ਾ ਫਿਰ ਵੀ ਪੰਜਾਬ ਲਈ ਵੱਡੀ ਸਮੱਸਿਆ ਬਣਿਆ ਰਹੇਗਾ। ਇਸ ਸੰਦਰਭ ਵਿਚ ਐਨਐਸਜੀ ਕਾਰਗਰ ਨਹੀਂ ਹੋਵੇਗੀ। ਆਪ੍ਰੇਸ਼ਨ ਬਲੂ ਸਟਾਰ ਸਮੇਂ ਅਤੇ ਉਸਤੋਂ ਬਾਅਦ ਪੰਜਾਬ ਵਿਚ ਅੱਤਵਾਦ ਦੇ ਕਾਲ ਬੱਦਲ ਮੰਡਰਾ ਰਹੇ ਸਨ ਅਤੇ ਪੰਜਾਬ ਵਿਚ ਅੱਤਵਾਦੀ ਘਟਨਾਵਾਂ ਘਰ ਕਰ ਰਹੀਆਂ ਸਨ। ਉਸ ਸਮੇਂ ਹੀ ਐਨਐਸਜੀ ਦਾ ਗਠਨ ਵੀ ਕੀਤਾ ਗਿਆ ਸੀ ਅਤੇ ਅੱਤਵਾਦ ਖ਼ਾਤਮੇ ਲਈ ਐਨਐਸਜੀ ਦੀ ਮਦਦ ਵੀ ਲਈ ਗਈ ਸੀ। ਮੌਜੂਦਾ ਹਾਲਾਤਾਂ ਵਿਚ ਗੈਂਗਸਟਰ ਕਲਚਰ ਖ਼ਤਮ ਕਰਨ ਲਈ ਇਸਦੀ ਵਰਤੋਂ ਕੀਤੀ ਜਾ ਸਕਦੀ ਹੈ।
ਐਮਰਜੈਂਸੀ ਹਲਾਤਾਂ ਨੂੰ ਸੰਭਾਲ ਸਕਦੀ ਹੈ ਐਨਐਸਜੀ : ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਰੱਖਿਆ ਅਤੇ ਰਾਸ਼ਟਰੀ ਸੁਰੱਖਿਆ ਵਿਭਾਗ ਦੇ ਮੁੱਖੀ ਪ੍ਰੋਫੈਸਰ ਜਸਕਰਨ ਸਿੰਘ ਦਾ ਕਹਿਣਾ ਹੈ ਕਿ ਐਨਐਸਜੀ ਦਾ ਐਮਰਜੈਂਸੀ ਹਲਾਤਾਂ ਨੂੰ ਸੰਭਾਲ ਸਕਦੀ ਹੈ। ਪਠਾਨਕੋਟ ਜ਼ਿਲ੍ਹੇ ਦੀ ਚੋਣ ਕਰਨਾ ਵੀ ਸਰਕਾਰ ਦਾ ਫ਼ੈਸਲਾ ਸਹੀ ਹੈ ਇਸ ਨਾਲ ਕਈ ਸਰਹੱਦਾਂ ਜੁੜੀਆਂ ਹਨ ਜਿਸਤੋਂ ਅਣਸੁਖਾਵੀਆਂ ਘਟਨਾਵਾਂ ਨੂੰ ਰੋਕਿਆ ਜਾ ਸਕਦਾ ਹੈ। ਪੰਜਾਬ ਸਰਹੱਦੀ ਸੂਬਾ ਹੋਣ ਕਰਕੇ ਹੁਣ ਐਨਐਸਜੀ ਦੀ ਮਦਦ ਕਿਤੇ ਵੀ ਲਈ ਜਾ ਸਕਦੀ। ਰੈਪਿਡ ਐਕਸ਼ਨ ਫੋਰਸ ਹੋਣ ਕਰਕੇ ਹੁਣ ਬਾਹਰੋਂ ਐਨਐਸਜੀ ਨਹੀਂ ਮੰਗਵਾਉਣੀ ਪਵੇਗੀ।
