ਬਠਿੰਡਾ: ਹੁਨਰ ਤਾਂ ਹਰ ਕਿਸੇ ਵਿੱਚ ਹੁੰਦਾ ਹੈ ਪਰ ਬਸ ਉਸ ਨੂੰ ਥੋੜਾ ਤਰਾਸ਼ਣ ਦੀ ਲੋੜ ਹੁੰਦੀ ਹੈ। ਇੱਕ ਪਾਸੇ ਮਾਪਿਆਂ ਦਾ ਸੁਪਨਾ ਤੇ ਦੂਜੇ ਪਾਸੇ ਆਪਣੇ ਸਪਨੇ ਦੇ ਜਨੂਨ ਨੇ ਬਠਿੰਡਾ ਦੇ ਰਹਿਣ ਵਾਲੇ ਸ਼ਿਵਮ ਨੂੰ ਇੱਕ ਬਿਹਤਰੀਨ ਕਲਾਕਾਰ ਬਣਾਇਆ। ਸ਼ਿਵਮ ਪੈਨਸਿਲ ਨਾਲ ਹੂ-ਬ-ਹੂ ਤਸਵੀਰਾਂ ਬਣਾਉਣ ਦੀ ਕਾਬਲੀਅਤ ਰੱਖਦਾ ਹੈ।
ਈਟੀਵੀ ਭਾਰਤ ਵੱਲੋਂ ਇਸ ਉਭਰਦੇ ਸਿਤਾਰੇ ਸ਼ਿਵਮ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਸ ਨੇ ਕਿਹਾ ਕਿ ਜਦੋਂ ਉਹ ਤਿੰਨ ਸਾਲ ਦਾ ਸੀ ਤਾਂ ਉਸ ਵੇਲੇ ਤੋਂ ਹੀ ਉਸ ਨੂੰ ਚਿੱਤਰਕਾਰੀ ਕਰਨ ਦਾ ਜਨੂੰਨ ਸੀ। ਬਚਪਨ ਤੋਂ ਹੀ ਸ਼ੌਕ ਸੀ ਕਿ ਉਹ ਤਸਵੀਰਾਂ ਬਣਾਵੇ ਪਰ ਸ਼ਿਵਮ ਦੇ ਮਾਪੇ ਉਸ ਨੂੰ ਕ੍ਰਿਕੇਟਰ ਬਣਾਉਣਾ ਚਾਹੁੰਦੇ ਸਨ। ਇਸ ਕਰਕੇ ਜਦੋਂ ਉਹ ਸ਼ਿਵਮ ਨੂੰ ਤਸਵੀਰਾਂ ਬਣਾਉਂਦੇ ਵੇਖਦੇ ਸਨ ਤਾਂ ਉਸ ਨੂੰ ਬਾਰ ਬਾਰ ਰੋਕਣ 'ਤੇ ਸ਼ਿਵਮ ਚੋਰੀ ਛਿਪੇ ਆਪਣੀਆਂ ਤਸਵੀਰਾਂ ਬਣਾਉਂਦਾ ਸੀ।
20 ਸਾਲਾਂ ਸ਼ਿਵਮ ਨੇ ਹੁਣ ਤੱਕ ਹਜ਼ਾਰਾਂ ਪੇਂਟਿੰਗਸ ਬਣਾਈਆਂ ਹਨ। ਸ਼ਿਵਮ ਬੀ.ਕਾਮ ਦੀ ਪੜ੍ਹਾਈ ਕਰ ਰਿਹਾ ਹੈ। ਇਸ ਦੇ ਨਾਲ-ਨਾਲ ਉਹ ਕ੍ਰਿਕਟ ਵਿੱਚ ਵੀ ਚੰਗੀ ਮਾਹਰਤ ਰੱਖਦਾ ਹੈ। ਸ਼ਿਵਮ ਨੇ ਹਾਲ ਹੀ ਵਿੱਚ ਪੰਜਾਬ ਦੇ ਖਜ਼ਾਨਾ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦੀ ਹੂ-ਬ-ਹੂ ਤਸਵੀਰ ਬਣਾਈ ਹੈ। ਇਸ ਤਸਵੀਰ ਨੂੰ ਉਹ ਮਨਪ੍ਰੀਤ ਬਾਦਲ ਨੂੰ ਤੋਹਫ਼ੇ ਵਜੋਂ ਦੇਣਾ ਚਾਹੁੰਦਾ ਹੈ।
ਭਵਿੱਖ ਵਿੱਚ ਸ਼ਿਵਮ ਆਪਣੇ ਆਪ ਨੂੰ ਇਟਲੀ ਦੇ ਮਸ਼ਹੂਰ ਪੇਂਟਰ ਮਾਰਸ਼ਲ ਵਾਂਗ ਉਭਰਦਾ ਸਿਤਾਰੇ ਵਰਗਾ ਵੇਖਣਾ ਚਾਹੁੰਦਾ ਹੈ। ਇਸ ਦੇ ਲਈ ਉਹ ਦਿਨ ਰਾਤ ਆਪਣੇ ਆਪ ਨੂੰ ਤਰਾਸ਼ਣ ਲਈ ਮਿਹਨਤ ਕਰ ਰਿਹਾ ਹੈ।
