ਨਵੀਂ ਦਿੱਲੀ : ਟੈਸਟ ਅਤੇ ਵਨਡੇ ਮੈਚਾਂ ਵਿੱਚ ਸਭ ਤੋਂ ਜ਼ਿਆਦਾ ਦੌੜਾਂ ਅਤੇ ਸਭ ਤੋਂ ਵੱਧ ਸੈਂਕੜੇ ਲਗਾਉਣ ਵਾਲੇ ਭਾਰਤ ਦੇ ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਨੂੰ 21 ਵੀਂ ਸਦੀ ਦਾ ਸਰਵਉਤਮ ਟੈਸਟ ਬੱਲੇਬਾਜ਼ ਚੁਣਿਆ ਗਿਆ ਹੈ। ਸਚਿਨ ਨੂੰ ਇਸ ਮਾਮਲੇ ਵਿੱਚ ਸ਼੍ਰੀਲੰਕਾ ਦੇ ਸਾਬਕਾ ਵਿਕਟਕੀਪਰ ਬੱਲੇਬਾਜ਼ ਕੁਮਾਰ ਸੰਗਾਕਾਰਾ ਤੋਂ ਸਖਤ ਮੁਕਾਬਲਾ ਮਿਲਿਆ ਪਰ ਅੰਤ ਵਿੱਚ ਤੇਂਦੁਲਕਰ ਨੇ ਬਾਜ਼ੀ ਮਾਰ ਲਈ।
ਆਈ.ਸੀ.ਸੀ ਵਰਲਡ ਟੈਸਟ ਚੈਂਪੀਅਨਸ਼ਿਪ ਮੈਚ ਦੇ ਇਤਿਹਾਸਕ ਮੌਕੇ 'ਤੇ ਇੱਕ ਟੀ.ਵੀ ਚੈਨਲ ਨੇ 21 ਵੀਂ ਸਦੀ ਦੇ ਮਹਾਨ ਖਿਡਾਰੀ ਨੂੰ ਚੁਣਨ ਲਈ ਵੋਟ ਪਾਉਣ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਹੈ। ਟੀ.ਵੀ ਚੈਨਲ ਦੀ ਕੁਮੈਂਟਰੀ ਟੀਮ ਅਤੇ ਪ੍ਰਸ਼ੰਸਕਾਂ ਨੇ ਸਚਿਨ ਨੂੰ ਸਰਵਸ੍ਰੇਸ਼ਠ ਬੱਲੇਬਾਜ਼ ਵਜੋਂ ਚੁਣਿਆ।
ਭਾਰਤੀ ਬੱਲੇਬਾਜ਼ ਮਹਾਨ ਸੁਨੀਲ ਗਾਵਸਕਰ ਨੇ ਇਕ ਵੀਡੀਓ ਵਿਚ ਕਿਹਾ, "ਇਹ ਇਕ ਮੁਸ਼ਕਲ ਮੁਕਾਬਲਾ ਸੀ। ਕੁਮਾਰ ਸੰਗਾਕਾਰਾ ਅਤੇ ਸਚਿਨ ਤੇਂਦੁਲਕਰ ਦੋਵੇਂ ਹੀ ਖੇਡ ਦੇ ਪ੍ਰਤੀਕ ਹਨ। ਪਰ 21 ਵੀਂ ਸਦੀ ਦੇ ਮਹਾਨ ਟੈਸਟ ਬੱਲੇਬਾਜ਼ ਦੇ ਜੇਤੂ ਮੇਰੇ ਸਾਥੀ ਮੁੰਬਈ ਦੇ ਸਚਿਨ ਰਮੇਸ਼ ਤੇਂਦੁਲਕਰ ਹੈ।"
ਤੇਂਦੁਲਕਰ ਨੇ ਆਪਣੀ ਟੈਸਟ ਦੀ ਸ਼ੁਰੂਆਤ 16 ਸਾਲ ਦੀ ਉਮਰ ਵਿੱਚ ਕੀਤੀ ਸੀ। ਉਸਨੇ ਟੈਸਟ ਕ੍ਰਿਕਟ ਦੇ ਇਤਿਹਾਸ ਵਿੱਚ 51 ਸੈਂਕੜੇ ਲਗਾ ਕੇ 15,921 ਦੌੜਾਂ ਬਣਾਈਆਂ ਹਨ। ਸੰਗਾਕਾਰਾ ਦੇ ਟੈਸਟ ਮੈਚਾਂ ਵਿੱਚ 12,400 ਦੌੜਾਂ ਹਨ ਜਦਕਿ ਉਸ ਨੇ 38 ਟੈਸਟ ਸੈਂਕੜੇ ਆਪਣੇ ਨਾਮ ਕੀਤੇ ਹਨ।
ਇਹ ਵੀ ਪੜ੍ਹੋ:WTC Final ਦੂਜੇ ਦਿਨ ਟੀ ਰਿਪੋਰਟ: ਪੁਜਾਰਾ ਦੇ ਪਤਨ ਤੋਂ ਬਾਅਦ ਕੋਹਲੀ-ਰਹਾਣੇ ਨੇ ਸੰਭਾਲੀ ਪਾਰੀ
ਕੁਮੈਂਟਰੀ ਪੈਨਲ ਵਿੱਚ ਵੀਵੀਐਸ ਲਕਸ਼ਮਣ, ਇਰਫ਼ਾਨ ਪਠਾਨ, ਆਕਾਸ਼ ਚੋਪੜਾ ਅਤੇ ਹੋਰ ਲੋਕ ਸ਼ਾਮਲ ਸਨ। ਕੁਮੈਂਟਰੀ ਪੈਨਲ ਵਿੱਚ ਸ਼ਾਮਲ ਸਾਬਕਾ ਭਾਰਤੀ ਕ੍ਰਿਕਟਰਾਂ ਨੇ ਸਚਿਨ ਦੇ ਯੋਗਦਾਨ ਦੀ ਪ੍ਰਸ਼ੰਸਾ ਕਰਦਿਆਂ ਉਨ੍ਹਾਂ ਨੂੰ ਹੀ ਚੁਣਿਆ।
