ਦੁਬਈ: ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਅਤੇ ਪੰਜਾਬ ਕਿੰਗਜ਼ (PBKS) ਅੱਜ ਆਈਪੀਐਲ 2021 ਦੇ 45 ਵੇਂ ਮੈਚ ਵਿੱਚ ਆਹਮੋ -ਸਾਹਮਣੇ ਹੋਣ ਵਾਲੇ ਹਨ। ਇਹ ਮੈਚ ਦੁਬਈ ਵਿੱਚ ਭਾਰਤੀ ਸਮੇਂ ਅਨੁਸਾਰ ਸ਼ਾਮ 7.30 ਵਜੇ ਸ਼ੁਰੂ ਹੋਵੇਗਾ।
ਤੁਹਾਨੂੰ ਦੱਸ ਦੇਈਏ, ਇਸ ਮੈਚ ਵਿੱਚ ਇੱਕ ਪਾਸੇ ਕੇਐਲ ਰਾਹੁਲ ਦੀ ਅਗਵਾਈ ਵਾਲੀ ਪੰਜਾਬ ਕਿੰਗਜ਼ ਟੀਮ ਹੋਵੇਗੀ, ਜੋ ਇਸ ਸਮੇਂ ਚਾਰ ਮੈਚ ਜਿੱਤਣ ਦੇ ਬਾਅਦ ਅੱਠ ਅੰਕਾਂ ਦੇ ਨਾਲ ਅੰਕ ਸੂਚੀ ਵਿੱਚ ਛੇਵੇਂ ਸਥਾਨ ਉੱਤੇ ਹੈ। ਦੂਜੇ ਪਾਸੇ, ਈਓਨ ਮੌਰਗਨ ਦੀ ਕਪਤਾਨੀ ਹੇਠ ਖੇਡ ਰਹੀ ਕੋਲਕਾਤਾ ਨਾਈਟ ਰਾਈਡਰਜ਼ ਨੇ 11 ਵਿੱਚੋਂ ਪੰਜ ਮੈਚ ਜਿੱਤੇ ਹਨ ਅਤੇ 10 ਅੰਕਾਂ ਨਾਲ ਚੌਥੇ ਸਥਾਨ 'ਤੇ ਹੈ।
ਰਾਹੁਲ ਦੀ ਪੰਜਾਬ ਟੀਮ ਮੱਧ ਕ੍ਰਮ ਦੇ ਖਰਾਬ ਪ੍ਰਦਰਸ਼ਨ ਤੋਂ ਪ੍ਰਭਾਵਿਤ ਹੋਈ ਹੈ ਅਤੇ ਉਸ ਨੂੰ ਸੁਧਾਰ ਦੀ ਲੋੜ ਹੈ। ਖੁਦ ਕੈਪਟਨ ਕੇਐਲ ਰਾਹੁਲ ਨੇ ਵੀ ਇਸ ਨੂੰ ਸਵੀਕਾਰ ਕਰ ਲਿਆ ਹੈ। ਟੀਮ ਦੇ ਸਲਾਮੀ ਬੱਲੇਬਾਜ਼ ਰਾਹੁਲ ਅਤੇ ਮਯੰਕ ਇਸ ਸੀਜ਼ਨ ਵਿੱਚ ਹੁਣ ਤੱਕ ਸਭ ਤੋਂ ਸਫਲ ਰਹੇ ਹਨ, ਬਾਕੀ ਕੋਈ ਵੀ ਬੱਲੇਬਾਜ਼ ਕੁਝ ਖਾਸ ਨਹੀਂ ਕਰ ਸਕਿਆ।
ਖਾਸ ਕਰਕੇ ਕ੍ਰਿਸ ਗੇਲ, ਜਿਨ੍ਹਾਂ ਨੇ ਵੀਰਵਾਰ ਨੂੰ ਆਈਪੀਐਲ ਤੋਂ ਆਪਣਾ ਨਾਂ ਵਾਪਸ ਲੈ ਲਿਆ ਸੀ। ਉਹ ਬਾਇਓ-ਬਬਲ ਤੋਂ ਬਾਹਰ ਨਿਕਲਣਾ ਚਾਹੁੰਦਾ ਹੈ ਅਤੇ ਟੀ -20 ਵਿਸ਼ਵ ਕੱਪ ਤੋਂ ਕੁਝ ਦਿਨ ਪਹਿਲਾਂ ਆਰਾਮ ਕਰਨਾ ਚਾਹੁੰਦਾ ਹੈ। ਗੇਂਦਬਾਜ਼ਾਂ ਵਿੱਚ, ਪੰਜਾਬ ਲਈ ਰਵੀ ਬਿਸ਼ਨੋਈ (9 ਵਿਕਟਾਂ) ਨੂੰ ਛੱਡ ਕੇ, ਕੋਈ ਹੋਰ ਗੇਂਦਬਾਜ਼ ਬੱਲੇਬਾਜ਼ਾਂ ਨੂੰ ਪਰੇਸ਼ਾਨ ਨਹੀਂ ਕਰ ਸਕਿਆ।
ਇਹ ਵੀ ਪੜ੍ਹੋ:IPL 2021: ਐਮਐਸ ਧੋਨੀ ਨੇ ਰਚਿਆ ਇਤਿਹਾਸ, ਆਈਪੀਐਲ 'ਚ 100 ਕੈਚ ਫੜਨ ਵਾਲੇ ਬਣੇ ਪਹਿਲੇ ਵਿਕਟ ਕੀਪਰ
ਕੋਲਕਾਤਾ ਨਾਈਟ ਰਾਈਡਰਜ਼ ਦੇ ਨਵੇਂ ਸਲਾਮੀ ਬੱਲੇਬਾਜ਼ ਵੈਂਕਟੇਸ਼ ਨੇ ਲਗਾਤਾਰ ਕਾਰਗੁਜ਼ਾਰੀ ਦਿਖਾਈ ਹੈ ਅਤੇ ਉਸ ਨੇ ਹੁਣ ਤੱਕ ਧੂੰਆਂਧਾਰ ਵਾਲੇ ਅੰਦਾਜ਼ ਵਿੱਚ 126 ਦੌੜਾਂ ਬਣਾਈਆਂ ਹਨ। ਅਜਿਹੀ ਸਥਿਤੀ ਵਿੱਚ, ਇਹ ਵੇਖਣਾ ਦਿਲਚਸਪ ਹੋਵੇਗਾ ਕਿ ਕਪਤਾਨ ਮੌਰਗਨ ਆਪਣੇ ਨੌਜਵਾਨ ਬੱਲੇਬਾਜ਼ ਨਿਤੀਸ਼ ਰਾਣਾ ਨੂੰ ਬੱਲੇਬਾਜ਼ੀ ਕ੍ਰਮ ਵਿੱਚ ਭੇਜਣ ਦੇ ਆਪਣੇ ਫੈਸਲੇ ਨੂੰ ਕਾਇਮ ਰੱਖਦਾ ਹੈ ਜਾਂ ਨਹੀਂ। ਮੌਰਗਨ ਦੀ ਜਗ੍ਹਾ ਉਸ ਨੂੰ ਭੇਜਣ ਦਾ ਫੈਸਲਾ ਹੁਣ ਤੱਕ ਸਹੀ ਸਾਬਤ ਹੋਇਆ ਹੈ, ਪਰ ਕੀ ਸ਼ਮੀ ਅਤੇ ਬਿਸ਼ਨੋਈ ਦੀ ਗੇਂਦਬਾਜ਼ੀ ਦੇ ਸਾਹਮਣੇ ਇਸ ਬੱਲੇਬਾਜ਼ੀ ਕ੍ਰਮ ਵਿੱਚ ਬਦਲਾਅ ਆਵੇਗਾ ਜਾਂ ਨਹੀਂ, ਫਿਲਹਾਲ ਇਹ ਵੇਖਣ ਵਾਲੀ ਗੱਲ ਹੋਵੇਗੀ।:
