ਨਵੀਂ ਦਿੱਲੀ: ਸਾਲ 1983 ਵਿਸ਼ਵ ਕੱਪ ਦੇ ਜੇਤੂ ਟੀਮ ਦੇ ਸਾਬਕਾ ਭਾਰਤੀ ਕਪਤਾਨ ਕਪਿਲ ਦੇਵ ਬੁੱਧਵਾਰ ਨੂੰ 62 ਸਾਲਾਂ ਦੇ ਹੋ ਗਏ। ਉਨ੍ਹਾਂ ਦੇ ਜਨਮਦਿਨ ’ਤੇ ਸਚਿਨ ਤੇਂਦੁਲਕਰ ਅਤੇ ਵਿਰਾਟ ਕੋਹਲੀ ਸਣੇ ਕਈ ਦਿੱਗਜ਼ਾਂ ਨੇ ਵਧਾਈ ਦਿੱਤੀ ਹੈ।
ਸਚਿਨ ਨੇ ਲਿੱਖਿਆ, "ਜਨਮਦਿਨ ਮੁਬਾਰਕ ਹੋਵੇ ਕਪਿਲ ਭਾਜੀ, ਆਉਣ ਵਾਲਾ ਸਾਲ ਤੁਹਾਡੇ ਜੀਵਨ ਵਿੱਚ ਚੰਗੀ ਸਿਹਤ ਤੇ ਖੁਸ਼ੀਆਂ ਨਾਲ ਭਰਪੂਰ ਹੋਵੇ।"
ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਨੇ ਲਿਖਿਆ,"ਹੈਪੀ ਬਰਥਡੇਅ ਕਪਿਲ ਦੇਵ ਜੀ, ਆਉਣ ਵਾਲਾ ਸਮਾਂ ਤੁਹਾਡੇ ਅਤੇ ਤੁਹਾਡੇ ਪਰਿਵਾਰ ਲਈ ਖੁਸ਼ੀਆਂ ਭਰਿਆ ਹੋਵੇ, ਇਹ ਸਾਲ ਅਦਭੁੱਤ ਤੇ ਸਿਹਤਮੰਦ ਹੋਵੇ।"
ਸਾਬਕਾ ਭਾਰਤੀ ਆਲ-ਰਾਊਂਡਰ ਯੁਵਰਾਜ ਸਿੰਘ ਨੇ ਕਿਹਾ, " ਦਿੱਗਜ ਚੈਂਪੀਅਨ ਅਤੇ ਮਹਾਨ ਆਲ-ਰਾਊਂਡਰ ਕਪਿਲ ਦੇਵ ਭਾਜੀ ਨੂੰ ਜਨਮਦਿਨ ਦੀਆਂ ਬਹੁਤ-ਬਹੁਤ ਸ਼ੁੱਭਕਾਮਨਾਵਾਂ। ਤੁਹਾਡੇ ’ਤੇ ਚੰਗੀ ਸਿਹਤ ਅਤੇ ਸਫ਼ਲਤਾ ਦੀ ਕ੍ਰਿਪਾ ਬਣੀ ਰਹੇ। "
ਵੀਵੀਐੱਸ ਲਕਸ਼ਮਣ ਨੇ ਕਿਹਾ," ਇੱਕ ਅਜਿਹੇ ਆਦਮੀ ਨੂੰ ਜਨਮਦਿਨ ਦੀਆਂ ਹਾਰਦਿਕ ਸ਼ੁੱਭਕਾਮਨਾਵਾਂ, ਜਿਨ੍ਹਾਂ ਨੇ ਕਈ ਲੋਕਾਂ ਨੂੰ ਪ੍ਰੇਰਿਤ ਕੀਤਾ। ਤੁਹਾਨੂੰ ਇੱਕ ਧੰਨ, ਸਿਹਤਮੰਦ ਅਤੇ ਚੰਗੇ ਨਤੀਜੇ ਦੇਣ ਵਾਲੇ ਸਾਲ ਦੀਆਂ ਸ਼ੁੱਭਕਾਮਨਾਵਾਂ।"
ਭਾਰਤੀ ਕ੍ਰਿਕੇਟ ਕੰਟਰੋਲ ਬੋਰਡ (ਬੀਸੀਸੀਆਈ) ਅਤੇ ਅੰਤਰ-ਰਾਸ਼ਟਰੀ ਕ੍ਰਿਕਟ ਪਰਿਸ਼ਦ (ਆਈਸੀਸੀ) ਨੇ ਵੀ ਆਪਣੇ ਅਧਿਕਾਰਤ ਟਵਿੱਟਰ ਹੈਂਡਲ ’ਤੇ ਕਪਿਲ ਦੇਵ ਨੂੰ ਜਨਮਦਿਨ ਦੀਆਂ ਸ਼ੁੱਭਕਾਮਨਾਵਾਂ ਦਿੱਤੀਆਂ ਹਨ।
ਕਪਿਲ ਦੇਵ ਨੇ ਸਾਲ 1983 ’ਚ ਆਪਣੀ ਕਪਤਾਨੀ ਦੌਰਾਨ ਭਾਰਤ ਨੂੰ ਪਹਿਲੀ ਵਾਰ ਵਿਸ਼ਵ ਕੱਪ ਜਿਤਾਇਆ ਸੀ। ਉਹ ਛੇ ਸਾਲਾਂ ਤੱਕ ਟੈਸਟ ਕ੍ਰਿਕਟ ’ਚ ਸਭ ਤੋਂ ਵੱਧ ਵਿਕਟਾਂ ਹਾਸਲ ਕਰਨ ਵਾਲੇ ਗੇਂਦਬਾਜ ਸਨ।
ਕਪਿਲ ਦੇਵ ਨੇ 1978 ਤੋਂ 1994 ਤੱਕ ਭਾਰਤ ਲਈ 131 ਟੈਸਟ (ਪੰਜ ਦਿਨਾਂ) ਅਤੇ 225 ਵਨਡੇਅ (ਇੱਕ ਦਿਨਾਂ) ਮੈਚ ਖੇਡੇ ਹਨ।
