ਮੁੰਬਈ: ਭਾਰਤੀ ਸਿਨੇਮਾ ਦੇ ਉੱਘੇ ਅਦਾਕਾਰ ਅਤੇ ਲੇਖਕ ਗਿਰੀਸ਼ ਕਰਨਾਡ ਦਾ ਸੋਮਵਾਰ ਨੂੰ ਲੰਮੀ ਬਿਮਾਰੀ ਤੋਂ ਬਾਅਦ ਬੈਂਗਲੂਰ 'ਚ ਦਿਹਾਂਤ ਹੋ ਗਿਆ। ਉਹ 81 ਸਾਲਾਂ ਦੇ ਸਨ। ਮੌਤ ਦਾ ਕਾਰਨ ਮਲਟੀਪਲ ਔਰਗਨ ਫ਼ੇਲਿਅਰ ਦੱਸਿਆ ਜਾ ਰਿਹਾ ਹੈ।
ਗਿਰੀਸ਼ ਕਰਨਾਡ ਨੂੰ ਭਾਰਤ ਦੇ ਉੱਘੇ ਲੇਖਕ, ਅਦਾਕਾਰ, ਫ਼ਿਲਮ ਨਿਰਦੇਸ਼ਕ ਅਤੇ ਨਾਟਕਕਾਰ ਦੇ ਤੌਰ 'ਤੇ ਜਾਣਿਆ ਜਾਂਦਾ ਹੈ। ਗਿਰੀਸ਼ ਯੂਨੀਵਰਸਿਟੀ ਆਫ਼ ਸ਼ਿਕਾਗੋ 'ਚ ਬਤੌਰ ਪ੍ਰੋਫੈਸਰ ਵੀ ਕੰਮ ਕਰ ਚੁੱਕੇ ਹਨ। ਉੱਥੇ ਨੌਕਰੀ 'ਚ ਉਨ੍ਹਾਂ ਦਾ ਦਿਲ ਨਹੀਂ ਲੱਗਿਆ ਇਸ ਲਈ ਉਹ ਭਾਰਤ ਪਰਤ ਆਏ। ਭਾਰਤ ਪਰਤਣ ਤੋਂ ਬਾਅਦ ਉਹ ਪੂਰੀ ਤਰ੍ਹਾਂ ਸਾਹਿਤ ਅਤੇ ਫ਼ਿਲਮਾਂ ਨਾਲ ਜੁੜ ਗਏ।
ਕਰਨਾਡ ਦਾ ਜਨਮ 19 ਮਈ 1938 ਨੂੰ ਮਹਾਰਾਸ਼ਟਰ ਦੇ ਮਥਰੇਨ 'ਚ ਹੋਇਆ ਸੀ। ਕਰਨਾਟਕ ਆਰਟਸ ਕਾਲੇਜ ਤੋਂ ਗ੍ਰੈਜੂਐਸ਼ਨ ਕਰਨ ਤੋਂ ਬਾਅਦ ਅੱਗੇ ਦੀ ਪੜ੍ਹਾਈ ਲਈ ਉਹ ਇੰਗਲੈਂਡ ਚੱਲੇ ਗਏ। ਉਨ੍ਹਾਂ ਨੇ ਚੇਨੰਈ ਦੀ ਆਕਸਫੋਰਡ ਯੂਨੀਵਰਸਿਟੀ ਪ੍ਰੈਸ 'ਚ 7 ਸਾਲ ਤੱਕ ਕੰਮ ਕੀਤਾ। ਇਸ ਤੋਂ ਬਾਅਦ ਉਨ੍ਹਾਂ ਰੰਗਮੰਚ ਦੀ ਦੁਨੀਆਂ 'ਚ 7 ਸਾਲ ਕੰਮ ਕੀਤਾ।
ਗਿਰੀਸ਼ ਨੂੰ 1992 'ਚ ਪਦਮ ਭੁਸ਼ਨ, 1974 'ਚ ਪਦਮ ਸ਼੍ਰੀ, 1972 'ਚ ਸੰਗੀਤ ਨਾਟਕ ਅਕਾਦਮੀ ਪੁਰਸਕਾਰ ,1992 'ਚ ਕੰਨੜ ਅਕਾਦਮੀ ਪੁਰਸਕਾਰ ,1994 'ਚ ਸਾਹਿਤ ਅਕਾਦਮੀ ਪੁਰਸਕਾਰ ਅਤੇ 1998 'ਚ ਉਨ੍ਹਾਂ ਨੂੰ ਕਾਲੀਦਾਸ ਸਨਮਾਨ ਮਿਲਿਆ ਸੀ।
