ਚੰਡੀਗੜ੍ਹ: ਬਾਲੀਵੁੱਡ ਦੇ ਮੰਨੇ ਪ੍ਰਮੰਨੇ ਫਿਲਮਕਾਰ ਸੰਜੇ ਸ਼ਰਮਾ ਨਿਰਦੇਸ਼ਕ ਦੇ ਤੌਰ 'ਤੇ ਆਪਣਾ ਅਗਲਾ ਉਦਮ ਵੈੱਬ ਸੀਰੀਜ਼ ‘ਆਨਲਾਈਨ 24x7’ ਲੈ ਕੇ ਦਰਸ਼ਕਾਂ ਸਨਮੁੱਖ ਹੋਣ ਜਾ ਰਹੇ ਹਨ, ਜੋ ਹੈਰਾਨੀਜਨਕ ਅਤੇ ਮਨ ਨੂੰ ਬੈਚੇਨ ਕਰਨ ਵਾਲੀਆਂ ਪਰਸਥਿਤੀਆਂ ਉਪਰ ਆਧਾਰਿਤ ਹੈ। ਇਸ ਵਰ੍ਹੇ ਦੀਆਂ ਬਹੁਚਰਚਿਤ ਫਿਲਮਾਂ ਵਿਚ ਸ਼ਾਮਿਲ ਇਸ ਵੈੱਬ ਸੀਰੀਜ਼ ਦੀ ਸਟਾਰ ਕਾਸਟ ’ਚ ਅਹਿਮ ਸ਼ਰਮਾ, ਸਮਿਕਸ਼ਾ ਭਟਨਾਗਰ, ਅਭਿਮਨਿਯੂ ਸਿੰਘ, ਜਰੀਨਾ ਵਹਾਬ, ਵਿਨੀਤ ਸ਼ਰਮਾ, ਅਹਿਸਾਨ ਖ਼ਾਨ , ਅੰਕਿਤਾ ਚੌਹਾਨ, ਅਲੀ ਕੁਲੀ ਮਿਰਜ਼ਾ, ਵਿਸ਼ਵਾਜੀਤ ਸੋਨੀ, ਦੀਪਕ ਸ਼ਿਰਕੇ, ਪੱਪੂ ਵਿਗਨੇਸ਼ ਆਦਿ ਸ਼ਾਮਿਲ ਹਨ, ਜੋ ਮਹੱਤਵਪੂਰਨ ਭੂਮਿਕਾਵਾਂ ਵਿਚ ਨਜ਼ਰ ਆਉਣਗੇ।
ਉਕਤ ਵੈੱਬ ਸੀਰੀਜ਼ ਦਾ ਨਿਰਮਾਣ ਸੰਜੇ ਸਨਪਾਲ, ਅਨਿਕਤ ਸ਼ਾਹ, ਵਿਪੁਲ ਸੋਗਾਨੀ ਅਤੇ ਨੇਹਾਈ ਦੇਸਾਈ ਵੱਲੋਂ ਕੀਤਾ ਗਿਆ ਹੈ, ਜਿੰਨ੍ਹਾਂ ਅਨੁਸਾਰ ਇਸ ਪ੍ਰੋਜੈਕਟ ਨੂੰ ਲੈ ਕੇ ਦਰਸ਼ਕਾਂ ਵਿਚ ਪਾਇਆ ਜਾ ਰਿਹਾ ਉਤਸ਼ਾਹ ਇਹ ਦਰਸਾ ਰਿਹਾ ਹੈ ਕਿ ਉਨ੍ਹਾਂ ਸਾਰਿਆਂ ਦੀ ਇਸ 'ਤੇ ਤਨਦੇਹੀ ਨਾਲ ਕੀਤੀ ਮਿਹਨਤ ਪੂਰਨ ਰੰਗ ਲਿਆਵੇਗੀ।
ਬਾਲੀਵੁੱਡ ’ਚ ਬਤੌਰ ਨਿਰਮਾਤਾ, ਪਟਕਥਾ ਲੇਖਕ, ਸੰਪਾਦਕ ਵਜੋਂ ਅਲੱਗ ਪਹਿਚਾਣ ਰੱਖਦੇ ਸੰਜੇ ਸ਼ਰਮਾ ‘ਜਾਣੇ ਭੀ ਦੋ ਯਾਰੋ’ 2007, ‘ਇਸ਼ਕ ਜਨੂੰਨ’ 2016 ਨਾਲ ਜਿੱਥੇ ਨਿਰਦੇਸ਼ਕ ਵਜੋਂ ਜੁੜ੍ਹੇ ਰਹੇ ਹਨ, ਉਥੇ ਸੰਪਾਦਕ ਦੇ ਤੌਰ 'ਤੇ ਵੀ ਉਨ੍ਹਾਂ ਮਿਲਟਰੀ ਰਾਜ, ਬਲੈਕ ਕਰੰਸੀ, ਨੈਸ਼ਨਲ ਟਰੇਜ਼ਰ, ਦਾ ਬਲੱਡ ਰਨ, ਪੈਰਾਨਾਰਮਲ ਬੇਸਡ ਆਨ ਟੂੰ ਫੈਕਟਸ ਹਾਰਰ ਥ੍ਰਿਲਰ ਤੋਂ ਇਲਾਵਾ ਹਾਲ ਹੀ ਵਿਚ ਆਈ ‘ਕਮਾਂਡੋ 2’ ਨੂੰ ਸੋਹਣਾ ਮੁਹਾਂਦਰਾ ਦੇਣ ਵਿਚ ਅਹਿਮ ਭੂਮਿਕਾ ਹੈ, ਜਿਸ ਵਿਚ ਵਿਦਯੁਤ ਜਾਮਵਾਲ ਵੱਲੋਂ ਲੀਡ ਭੂਮਿਕਾ ਨਿਭਾਈ ਗਈ ਸੀ।
ਉਕਤ ਨਵੇਂ ਪ੍ਰੋਜੈਕਟ ਸੰਬੰਧੀ ਸੰਜੇ ਦੱਸਦੇ ਹਨ ਕਿ ‘ਆਨਲਾਈਨ 24x7' ਮੰਨੋਰੰਜਨ ਭਰਪੂਰ ਇਕ ਥ੍ਰਿਲਰ ਕਹਾਣੀ ਉਪਰ ਆਧਾਰਿਤ ਹੈ, ਜਿਸ ਦਾ ਨਿਰਦੇਸ਼ਨ ਕਰਨਾ ਕਾਫ਼ੀ ਚੁਣੌਤੀਪੂਰਨ ਰਿਹਾ ਹੈ, ਪਰ ਇਸ ਦੇ ਬਾਵਜੂਦ ਉਨ੍ਹਾਂ ਸਮੇਤ ਪੂਰੀ ਟੀਮ ਵੱਲੋਂ ਤਨਦੇਹੀ ਨਾਲ ਇਸ ਨੂੰ ਹਰ ਪੱਖੋਂ ਪ੍ਰਭਾਵੀ ਬਣਾਉਣ ਲਈ ਤਰੱਦਦ ਕੀਤੇ ਗਏ ਹਨ।
ਉਨ੍ਹਾਂ ਦੱਸਿਆ ਕਿ ‘ਔਸ਼ਨ ਫੈਨਟੈਸੀ ਇਵੇਟਸ ਪ੍ਰਾਈਵੇਟ ਲਿਮਿਟਡ ਦੇ ਪ੍ਰਬੰਧ ਨਿਰਦੇਸ਼ਕ ਵਿਪੁਲ ਸੋਪਾਨੀ ਇਸ ਵੈਬਸੀਰੀਜ਼ ਦੇ ਨਿਰਮਾਤਾ ਹਨ, ਜਿੰਨ੍ਹਾਂ ਨੂੰ ਇਸ ਕਹਾਣੀ ਨੂੰ ਫ਼ਿਲਮਬੰਧ ਕਰਨ ਪ੍ਰਤੀ ਕਾਫ਼ੀ ਜਨੂੰਨ ਰਿਹਾ ਹੈ , ਕਿਉਂਕਿ ਇਸ ਸੀਰੀਜ਼ ਨਾਲ ਦਰਸ਼ਕਾਂ ਨੂੰ ਬਹੁਤ ਹੀ ਅਲੱਗ ਪਰਸਥਿਤੀਆਂ ਦਾ ਆਨੰਦ ਉਠਾਉਣ ਦਾ ਮੌਕਾ ਮਿਲੇਗਾ।
ਉਨ੍ਹਾਂ ਦੱਸਿਆ ਕਿ ਇਸ ਸੀਰੀਜ਼ ਦੀ ਸ਼ੂਟਿੰਗ ਮੁੰਬਈ ਤੋਂ ਇਲਾਵਾ ਦੇਸ਼ ਦੇ ਹੋਰ ਕਈ ਵੱਖ ਵੱਖ ਹਿੱਸਿਆ ਵਿਚ ਪੂਰੀ ਕਰ ਲਈ ਗਈ ਹੈ ਅਤੇ ਇਸ ਉਪਰੰਤ ਪੋਸਟ ਪ੍ਰੋਡੋਕਸ਼ਨ ਕਾਰਜ ਵੀ ਤੇਜ਼ੀ ਨਾਲ ਸੰਪੂਰਨ ਕੀਤੇ ਜਾ ਰਹੇ ਹਨ। ਹਿੰਦੀ ਸਿਨੇਮਾ ਦੇ ਉਚਕੋਟੀ ਨਿਰਦੇਸ਼ਕਾਂ ਵਿਚ ਆਪਣਾ ਸ਼ੁਮਾਰ ਕਰਵਾਉਂਦੇ ਅਨਿਲ ਸ਼ਰਮਾ ਦੇ ਭਰਾ ਸੰਜੇ ਸ਼ਰਮਾ ਅਨੁਸਾਰ ਨਿਰਦੇਸ਼ਕ ਦੇ ਤੌਰ 'ਤੇ ਲੰਮੇ ਅੰਤਰਾਲ ਬਾਅਦ ਸਾਹਮਣੇ ਆਉਣ ਜਾ ਰਿਹਾ ਉਨ੍ਹਾਂ ਦਾ ਇਹ ਪ੍ਰੋਜੈਕਟ ਹਰ ਵਰਗ ਦਰਸ਼ਕਾਂ ਦੀ ਉਮੀਦ, ਕਸੌਟੀ 'ਤੇ ਪੂਰਾ ਖ਼ਰਾ ਉਤਰੇਗਾ ਅਤੇ ਇਸ ਦਾ ਸੰਪਾਦਨ ਵੀ ਇਸ ਵੈੱਬਸੀਰੀਜ਼ ਨੂੰ ਚਾਰ ਚੰਨ ਲਗਾਵੇਗਾ, ਜਿਸ ਦੀ ਜਿੰਮੇਵਾਰੀ ਉਹ ਖ਼ੁਦ ਸੰਭਾਲ ਰਹੇ ਹਨ।
ਇਹ ਵੀ ਪੜ੍ਹੋ:NMACC: ਸ਼ਾਹਰੁਖ ਖਾਨ ਦੇ ਡੈਪਰ ਲੁੱਕ 'ਤੇ ਫਿਦਾ ਹੋਈ ਦੀਪਿਕਾ ਪਾਦੂਕੋਣ, ਕੀਤਾ ਇਹ ਕਮੈਂਟ
