ਚੰਡੀਗੜ੍ਹ: ਹਿੰਦੀ ਸਿਨੇਮਾ ਦੇ ਦਿੱਗਜ ਅਦਾਕਾਰ ਸੁਨੀਲ ਸ਼ੈੱਟੀ ਵੱਲੋਂ ਪੰਜਾਬ ਵਿਖੇ ਫਿਲਮਾਈ ਗਈ ਆਪਣੀ ਪਹਿਲੀ ਐਡ ਫਿਲਮ ਸ਼ੂਟ ਕੀਤੇ ਜਾਣ ਦਾ ਕਾਰਜ ਮੁਕੰਮਲ ਕਰ ਲਿਆ ਗਿਆ ਹੈ, ਜਿਸ ਦੀ ਸ਼ੂਟਿੰਗ ਸੰਗਰੂਰ ਨੇੜ੍ਹੇ ਪੂਰੀ ਕਰ ਲਈ ਗਈ ਹੈ। ਪੰਜਾਬੀ ਫਿਲਮਾਂ ਦੇ ਮੰਨੇ ਪ੍ਰਮੰਨੇ ਲੇਖਕ ਰਾਜੂ ਵਰਮਾ ਦੀ ਰਹਿਨੁਮਾਈ ਹੇਠ ਫਿਲਮਾਈ ਗਈ ਇਸ ਐਡ ਫਿਲਮ ਨੂੰ ਸੰਗਰੂਰ-ਸੁਨਾਮ ਅਧੀਨ ਆਉਂਦੇ ਕਸਬੇ ਚੀਮਾਂ ਮੰਡੀ ਵਿਖੇ ਸਥਿਤ ਇਕ ਕੰਬਾਇਨ, ਟਰੈਕਟਰਜ਼ ਫ਼ਰਮ ਲਈ ਐਡਬੱਧ ਕੀਤਾ ਗਿਆ ਹੈ, ਜਿਸ ਵਿਚ ਸੁਨੀਲ ਸ਼ੈੱਟੀ ਸਮੇਤ ਸ਼ਾਮਿਲ ਹੋਏ ਕਲਾਕਾਰਾਂ ਵਿਚ ਦਿਲਾਵਰ ਸਿੱਧੂ, ਸਿਮਰਪਾਲ, ਮਲਕੀਤ ਸਿੰਘ, ਅਸ਼ੋਕ ਸ਼ਾਨ, ਅਨਮੋਲ ਵਰਮਾ, ਇਕੱਤਰ ਸਿੰਘ ਸਿੰਘ ਆਦਿ ਸ਼ਾਮਿਲ ਰਹੇ।
ਐਡ ਫਿਲਮ ਮੇਕਰ ਪ੍ਰਿੰਸ ਵੱਲੋਂ ਨਿਰਦੇਸ਼ਿਤ ਕੀਤੀ ਗਈ ਅਤੇ ਰਾਜੂ ਵਰਮਾ ਦੀ ਲੇਖਨੀ ਅਗਵਾਈ ’ਚ ਬਣਾਈ ਗਈ ਇਸ ਟੀਵੀਸੀ ਲਈ ਸੁਨੀਲ ਸ਼ੈੱਟੀ ਉਚੇਚੇ ਤੌਰ 'ਤੇ ਮੁੰਬਈ ਤੋਂ ਪੰਜਾਬ ਪੁੱਜੇ ਅਤੇ ਆਪਣੀ ਇੱਥੇ ਸ਼ੂਟ ਕੀਤੀ ਗਈ ਉਕਤ ਐਡ ਫਿਲਮ ’ਚ ਹਿੱਸਾ ਲਿਆ, ਜਿਸ ਨੂੰ ਆਉਣ ਵਾਲੇ ਦਿਨ੍ਹਾਂ ਵਿਚ ਵੱਖ ਵੱਖ ਪਲੇਟਫ਼ਾਰਮਜ਼ 'ਤੇ ਰਸਮੀ ਤੌਰ 'ਤੇ ਰਿਲੀਜ਼ ਕੀਤਾ ਜਾਵੇਗਾ।
ਜੇਕਰ ਸੁਨੀਲ ਦੀ ਇਸ ਐਡ ਫਿਲਮ ਨਾਲ ਜੁੜਨ ਦੇ ਖਾਸ ਪਹਿਲੂਆਂ ਬਾਰੇ ਗੱਲ ਕੀਤੀ ਜਾਵੇ ਤਾਂ ਇਸ ਲਈ ਇੱਕ ਅਜਿਹੇ ਸਟਾਰ ਦੀ ਜ਼ਰੂਰਤ ਸੀ, ਜਿਸ ਨੂੰ ਪੰਜਾਬ ਦੇ ਖੇਤਾਂ-ਬੰਨਿਆਂ ਅਤੇ ਉਥੋਂ ਦੀ ਕਿਸਾਨੀ ਲਈ ਇਸਤੇਮਾਲ ਹੋਣ ਵਾਲੇ ਟਰੈਕਟਰ-ਕੰਬਾਈਨ ਆਦਿ ਬਾਰੇ ਚੰਗੀ ਤਰ੍ਹਾਂ ਪਤਾ ਹੋਵੇ ਅਤੇ ਇਸੇ ਮੱਦੇਨਜ਼ਰ ਸੁਨੀਲ ਸ਼ੈੱਟੀ ਦੀ ਚੋਣ ਕਰਨ ਦੇ ਨਾਲ ਨਾਲ ਉਨਾਂ ਨੂੰ ਇਸ ਵਿਚ ਪੰਜਾਬੀ ਕੁੜਤੇ ਪਜਾਮੇ ਨਾਲ ਦਰਸਾਇਆ ਗਿਆ ਹੈ, ਜਿਸ ਵਿਚ ਉਹ ਖੂਬ ਜੱਚ ਵੀ ਰਹੇ ਸਨ।
ਓਧਰ ਇਸ ਐਡ ਲਈ ਸੁਨੀਲ ਸ਼ੈੱਟੀ ਨੂੰ ਆਨ ਬੋਰਡ ਲਿਆਉਣ ਵਾਲੇ ਲੇਖਕ ਰਾਜੂ ਵਰਮਾ ਦੇ ਹਾਲੀਆ ਫਿਲਮ ਕਰੀਅਰ ਵੱਲ ਨਜ਼ਰਸਾਨੀ ਕੀਤੀ ਜਾਵੇ ਤਾਂ ਪੰਜਾਬੀ ਸਿਨੇਮਾ ਲਈ 'ਲੁਕਣ ਮੀਚੀ', 'ਡੀਜੇ ਵਾਲੇ ਬਾਬੂ', 'ਵਾਰਦਾਤ', 'ਆਟੇ ਦੀ ਚਿੜ੍ਹੀ', 'ਕੁੜ੍ਹਮਾਈਆਂ', 'ਫੁੱਫੜ੍ਹ ਜੀ', 'ਗੋਲ ਗੱਪੇ', 'ਨੀ ਮੈਂ ਸੱਸ ਕੁੱਟਣੀ', 'ਉਮਰਾਂ ’ਚ ਕੀ ਰੱਖਿਆ' ਆਦਿ ਕਈ ਵੱਡੀਆਂ ਅਤੇ ਕਾਮਯਾਬ ਫਿਲਮਾਂ ਲਿਖਣ ਦਾ ਸਿਹਰਾ ਉਹ ਹਾਸਿਲ ਕਰ ਚੁੱਕੇ ਹਨ।
ਇਸ ਤੋਂ ਇਲਾਵਾ ਆਉਣ ਵਾਲੇ ਦਿਨ੍ਹਾਂ ਵਿਚ ਵੀ ਲੇਖਕ ਵਜੋਂ ਉਨ੍ਹਾਂ ਦੀਆਂ ਬਿਨ੍ਹਾਂ 'ਬੈਂਡ ਚੱਲ ਇੰਗਲੈਂਡ', 'ਦਰਾਣੀਆਂ ਜਠਾਣੀਆਂ', 'ਬੂ ਮੈਂ ਡਰ ਗਈ', 'ਮਾਨ ਵਰਸਿਸ਼ ਖ਼ਾਨ', 'ਲੱਡੂ ਬਰਫ਼ੀ' ਆਦਿ ਜਿਹੀਆਂ ਕਈ ਚਰਚਿਤ ਫਿਲਮਾਂ ਰਿਲੀਜ਼ ਲਈ ਤਿਆਰ ਹਨ। ਪੰਜਾਬੀ ਸਿਨੇਮਾ ਵਿਚ ਪੜ੍ਹਾਅ ਦਰ ਪੜ੍ਹਾਅ ਮਾਣਮੱਤੀਆਂ ਪ੍ਰਾਪਤੀਆਂ ਆਪਣੀ ਝੋਲੀ ਪਾ ਰਹੇ ਲੇਖਕ ਰਾਜੂ ਵਰਮਾ ਵੱਲੋਂ ਬਾਲੀਵੁੱਡ ਸਟਾਰ ਨਾਲ ਕੀਤੀ ਗਈ ਇਹ ਉਨ੍ਹਾਂ ਦੀ ਪਹਿਲੀ ਐਡ ਫਿਲਮ ਹੈ, ਜਿੰਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਐਡ ਫਿਲਮ ਉਨ੍ਹਾਂ ਦੇ ਕਰੀਅਰ ਦਾ ਇਕ ਹੋਰ ਟਰਨਿੰਗ ਪੁਆਇੰਟ ਹੈ, ਜਿਸ ਨਾਲ ਉਹ ਮੁੰਬਈ ਨਗਰੀ ਵਿਚ ਵੀ ਆਪਣੇ ਕਦਮ ਅੱਗੇ ਵਧਾਉਣ ਵੱਲ ਯਤਨਸ਼ੀਲ ਹੋ ਗਏ ਹਨ।
ਇਹ ਵੀ ਪੜ੍ਹੋ: Threat To Karan Aujla and Sherry Mann: ਜੱਸਾ ਗਰੁੱਪ ਨੇ ਕਰਨ ਔਜਲਾ ਅਤੇ ਸ਼ੈਰੀ ਮਾਨ ਨੂੰ ਦਿੱਤੀ ਧਮਕੀ, ਕਿਹਾ-'ਹਿਸਾਬ ਕਰਾਂਗੇ'
